1 Dévidi gụru ebvu-a nụ Chipfu lẹ mbọku, Chipfu nafụtakotaru iya l'ẹka ndu ọhogu iya l'ophu; kelekele kẹ Sọlu.
2 Ọ gụru sụ:
3 Ọo Chileke mu bụ agbara-mkpuma, mu agbabajẹ je edomia onwomu.
4 Ọo Chipfu ono, bụ onye gbaru g'a jajẹ iya ajaja ono bẹ mu arakuje;
5 Anwụhu shiwaa chie mu ẹgbirigba l'olu.
6 Ẹkpa oyi alị-maa nwụa mu kpalaa.
7 Ọle teke mu eje iphe-ẹhuka bẹ mu rakuru Chipfu.
8 Noo ya bụ; eliphe l'ophu tehu kparịkpari; nmakọta jiijiijii.
9 Ẹnwuru ọku, shi iya l'imi akpụ kẹ tụutuutuu.
10 Ọ dọjaha akpaminigwe kẹ tararara; ọ bụru iya alụfuta.
11 Ọ nọdu l'eli chierobu phezeta.
12 O woru ọchii kpuchia onwiya;
13 Icheku-ọku, ata pfụpfupfu
14 No iya; Chipfu gbẹ l'akpaminigwe tụa egbigwe.
15 Ọ gbaa apfụ gude chịkaa ndu ọhogu iya.
16 Chipfu ziru unme fuu gbọoru ndu ọhogu iya ụja.
17 Chipfu gbẹ l'imigwe tụfu ẹka;
18 Ọ nafụtakwaru mu phọ l'ẹka ndu ọhogu mu, ọkpehu dụ;
19 Mbọku ono, mu eje iphe-ẹhuka ono bẹ ẹphe tsoru mu ọgu;
20 Ọo yẹbedua kutaru mu dobe l'ẹka mu nọ tụsaru ẹhu.
21 Chipfu buru mu nggo; kẹle mu bụ onye pfụberekoto;
22 Noo kẹle ọ bụepho ụzo, Chipfu tọru bẹ mu anọduje etso.
23 Ekemu Chipfu bẹ mu nwụbekotaru ẹnya g'ọ ha.
24 Ọ tọ dụkpodaa ẹka ụta dụ mu l'ẹhu l'atatiphu iya.
25 Chipfu buru mu nggo; kẹle mu bụ onye pfụberekoto;
26 Ndu yeru ngu obu bẹ iigoshije l'i yeru obu.
27 Ndu obu phẹ gụru ìphóró bẹ iidobejeru obu ìphóró.
28 Ndu wozeru onwophẹ alị bẹ ịidzotaje;
29 Ọo gụbedua, bụ Chipfu bụ orọku mu.
30 Eshinu iiyeru mu ẹka bẹ mu e-tso ikpoto ndu ojọgu ọgu.
31 Ụzo Chileke bẹ ntụcha adụdu m'ilile;
32 ?Bụ onye bụbaa Ọkalibe, dụ nụ, abụdu Chipfu kpoloko?
33 Ọo Chileke emeje g'ike dụ mu.
34 Oomeje gẹ mu pfụ shọoshoo gẹ mgbada;
35 Ọ ziru mu; mu maru g'aalwụje ọgu;
36 Ọo gụbe Chipfu egbobutaje mu; shi ẹgube ono dzọo mu ndzụ.
37 I mesataru ụzo mu ọsa; g'ọkpa te echiswafu mu.
38 Mu gude ọso chịa ndu ọhogu mu; gwee phẹ arakabya;
39 Mu chiru phẹ pyakapyaka; k'ọphu ẹphe ta adụedu ike gbelibaa ishi ọzo.
40 Ọo ike nkengu bẹ mu gude eje ọgu.
41 Ndu ọhogu mu bẹ i meru; ẹphe chie ọkpa l'ọso.
42 Ẹphe chia mkpu; ọphu ọ dụdu onye gbaru phẹ mkpu.
43 Mu gwerụ phẹ uji mee phẹ; ẹphe dụ g'urwuku, dụ l'alị.
44 Ị nafụtaru mu l'ẹka ndu etso mu opfu;
45 Ndu ọhozo ephozekọtaru mu.
46 Meji tọfukota iphe, bụ ndu ọhozo ono;
47 Chipfu nọkwa ndzụ; unu tua agbara-mkpuma nkemu ono ẹpha!
48 Ọo Chileke ejeje agwata ụgwo iphe, ndu ọhogu mu meru mu.
49 Ọonafutaje mu l'ẹka ndu ọhogu mu;
50 Noo g'o gude mu je a-pfụru l'iphu ọhamoha kele gụbe Chipfu ekele.
51 Onye eze, ọ họtaru bẹ oomeje g'o mekpee l'ọgu.