1 APU DIOS, baddanganak anhan te dakol di buhul kun makihuggin ha-on.
2 Hay mipanggep ke ha-on di kalkalyon dan kanan day “Kon ihwang Apu Dios hidiyen tagu?”
3 Mu takon di athidiy kanan da, APU DIOS, ya inilak an ihwangak ke he-a hi ngannen ad-adin maat. Patulidonak ya ipadayawak ke he-a.
4 Deket mumpahpahmokak an mundasal ke he-at baddanganak on dingngol muy dasal ku nah bilid an kad-am.
5 Ya deket nahuyopak nah hilong ya iadugak ke he-at malinggopak an bumangun nah biggatna.
6 Kinali adiyak tumakut nadah kalibulibun buhul kun nunlikkub ke ha-on.
7 Umina ka anhan ta ihwangak, APU DIOS, te he-ay Dios ku. Dadagom nadan buhul kut maid di mangat hi gaga-iho ke ha-on.
8 Kon bokon he-a, APU DIOS, di nangamung an mangipangapput hi pinhod mun pangapputon? Hana ot ta bendisyonan dakamin tatagum.