1 Mumpasalamat taku ke APU DIOS te hiya ya maphod!
2 Mumpasalamat taku nah Katagtag-ayan an Dios.
3 Mumpasalamat taku ke hiya an Ap-apun am-in di aap-apu.
4 Hiya ya abuy nangat nadah umipamodwong an adi kabaelan di tagu.
5 Lintunay kabunyan gapuh laing na.
6 Inha-ad nay nipab-unan tun luta nah dallom di baybay.
7 Lintunay bulan ya algo.
8 Impumbalinay algon kay ap-apu nah mapat-al.
9 Impumbalinay bulan ya bittuwon an kay ap-apu nah hilong.
10 Pinate nay panguluwan an imbabalen di iEgypt.
11 Ot ipanguluna nadan tatagunan holag Israel an tumayan ad Egypt.
12 In-usal nay ongal an kabaelanan nangipangulu didan tatagunan holag Israel an timmayan hidi.
13 Impunhi-anay danum nah Maingit an Baybay.
14 Ot ipanguluna nadan tatagunan umagwat.
15 Mu inanud na nadan tindalun iEgypt ya nan patul da.
16 Impanguluna bo nadan tatagunan holag Israel an indalan da nah adi maboblayan.
17 Numpate na nadan papatul an ongal di kabaelana.
18 Takon nadan nundingngol an patul ya pinatena.
19 Dadiye ya hi Sihon an patul di Amorite.
20 Ya hi Og an patul di Bashan.
21 Ot ipaboltanay boble da nadah tataguna.
22 Indat nah dadiyen boble nadah tatagunan holag Israel ta pumboblayan da.
23 Ugge ditaku inwalong an tataguna handih naapputan taku.
24 Inihwang ditakun hiya nadah buhul taku.
25 Indadaanay kanon am-in di lintuna.
26 Kinali mumpasalamat taku ke hiya an Dios hi langit.