1 Da'yun amin an tatagu ya ibugawyuy umamlonganyun Apo Dios!
2 Ya ikantayuy ipabagbagtuan di ngadana ya nan pundayawyun Hiya,
3 at alyonyun Apo Dios di,
4 Ya an amin nan wah tun luta ya He"ay dayawonda,
5 Nomnomonyu adya nan umipata'ot an ina'inat Apo Dios hi pumhodan nan tatagu
6 ti nunhiyanona nan danum hinan Mumbolah an Baybay ya nan Wangwang an Jordan
7 Ya Hiyay mun'ap'apuh mid pogpogna an dumalat nan nidugah an abalinana,
8 At an amin tu'un tatagu ya ipabagbagtu tu'uh Apo Dios,
9 ti punnonngonay ataguan tu'u,
10 Tinapngan da'min tatagum, O Dios,
11 Ya inyabulutmuy nibaludanmi,
12 Ya inyabulutmun abakon da'mih buhulmi ta omod un nidugah di nangipaligligatandan da'mi,
13 Umalia' hinan Timplum ta mun'ononga' hi Onong an Moghob
14 an hiyah ne din inali' hidin gutud di naguguluwa'.
15 At e'nong'un He"ay mataban kalnilu, ya nan baka, ya nan gandeng ta Onong an Moghob
16 At umali ayun amin an tatagun mundayaw ay Apo Dios
17 Ti numpabadanga' ay Hiya,
18 Mu gulat ta laylaydo' an mumbahol at adia' donglon ay Apo Dios,
19 mu immannung an dengngola' ay Apo Dios,
20 At dayawo' hi Apo Dios ti agguyna ingnganuy din inluwalu'