1 Inanuha' an nanannod hi pamadangan Apu ay ha"in,
2 Ti ginuyuda' hidih nan ma"ibluh an bitu an napnuh luyo' ta impata'doga' hinan batu,
3 Ya intuduwana' hi balbalun kanta ta way mikantah pangulguda' hinan maphod an inatmun ha"in, Apo Dios,
4 Mawagahan nan tagun hi Apu tu'u di pangehdolanah nan nitaguana,
5 O Apu an Diosmi, nidugah an do'ol ahan di ina'inatmuh mun'aphod ya umipanoh'a an mid olog di tagun mangat,
6 Ya bo'on nan animal an me'nong ay He"ay pohdom,
7 At hiyanan tayaa' an immali ta ipa'annung'u nan aat'un inalin nan nitudo' hinan Uldinmu.
8 At mun'am'amlonga' an mangat hinan pohdom, O Apo Dios'u,
9 Ya inul'ulgud'uh nan na'amungan di do'ol an tatagum nan aat di ana'ahhamadmu,
10 ti adi' ahan pohdon an italepon ya anggay hi nomnom'u nan maphod an ina'inatmu,
11 At adim ni' ahan pogpogon, Apu, nan homo'mun ha"in
12 Ti ten lene'woha' hitun nidugah an adi mabilang tun ligat'u ya tun bahol'un adida ma'yap
13 At baliwana' ni' ahan Apu,
14 Ya lugluom di punnomnom nan buhul'un adi manghop an mamatoy ay ha"in ta la'tot mungngohngohpelda,
15 Ya bainom ya palungdayaom daden amin an mangalin ha"in di,
16 Mu ipadenolmu ni' an amin nan mundayaw ay He"a ta umamlongda,
17 Ya ta"on unna' nawotwot ya do'ol goh di mahapul'u mu nonomnomona' damdama ay Apu.