1 O Apu, He"ay ihi'uga' hi mamaliw ay ha"in,
2 At donglom ni' tun iluwalu' ta punnaudom an mamaliw ay ha"in
3 He"a, Apu, di paddungnay batun punhi'uga' ya baliw'u,
4 Ya adim ni' iyabulut an paddungnay mahulua' hinan nidadaan an huluh pangnadan ha"in
5 At e'kod'un He"ay nitagua'
6 Abohla' nan mundayaw hinan bulul
7 At mundenola' ya umamlonga' hinan adi mapogpog an pamhodmun ha"in
8 Ya agguya' impatiliw hinan buhul'u ti binaliwana'.
9 O Apo Dios, hom'ona' ni' ti ten maligligatana',
10 Ya ten munlunglungtuya' hitun nidugah an aligligata',
11 Ti an amin nan buhul'u ya pihupihulona',
12 at inaliwana' ay dida an paddungnay unna' natoy
13 Ya gun'u donglon di hapihapiton nan do'ol an buhul'un ha"in,
14 Mu He"ay pange'koda' an amin, Apu, ti He"ay Dios'u,
15 ya He"ay okod hinan ma'ma'at hitun nitagua',
16 Tigona' ni', ya igohgohana' an baalmu,
17 ya adim ni' abuluton di abaina', Apu, ti ten munluwalua' an mumpabadang ay He"a.
18 ta mun'apogpog nan pumpahpahiyaandan lumayalayah,
19 Immannung an nidugah an mun'aphod nan indadaanmun pumhodan nan mundayaw ay He"a.
20 Ya He"ay ihi'uganda,
21 Madayaw hi Apo Dios ti impattignan ha"in nan nahamad an pamhodnah din nunli'uban nan buhul'un ha"in.
22 Ya hidin timma'ta' ya alyo' hi unna' ingnganuy ay He"a,
23 At da'yun mundayaw ay Apo Dios ya ipattigyuy pamhodyun Hiya ti baliwana nan tatagun un'unnud ay Hiya,
24 At mahapul an ditu'un amin an manahalimid ay Apu tu'u