1 Gun da'a dayawon, Apo Dios,
2 ti nidugah tun ahilalayah an tatagun do'ol di ipa'lehdah nun'appuhin ha"in,
3 Ya do'ol goh di nun'appuhih gunda hinapit ay ha"in an ta"on un mi'id ah dimmalat,
4 ya namag ya unna' buhulon an ta"on hi un nahamad di pamhod'un dida
5 Ya hay pallog nan maphod an inat'un dida ya nan nun'appuhi,
6 At hay atom ya nan paddungna an tagun nappuhiy pangatna di pi'pattoyna
7 Ya wa ay ta malpah an mahumalya ya ma'ah'upan ni' an hiya ya numbahol,
8 Ya he'he'dodom di pi'taguana ta nan haadna ya midat hinan udumnan tagu,
9 ya ta manguhu nan imbabaluyna,
10 Ya hene ta nan imbabaluyna ya unda hay lumane'le'od an umuy umanad'adaw,
11 Ya pun'alan ni' goh nan immutanganan amin nan wan hiya,
12 Ya mi'id ni' goh ah ohah mammo' ay hiya,
13 Ya mun'atoy ni' goh an amin nan holagna ta mapogpogda,
14 Ya maphod ni' hi un adi aliwan Apo Dios di numbaholan din o'ommoddah din penghana,
15 Ya adi ni' aliwan, Apo Dios, nan baholdan amin,
16 Ti henen tagu ya nidugah an adi ahan umigohgoh
17 Ya penhodnay un umidu'idut hinan udumnan tatagu,
18 Ya un madadawoh tuwalin umidut an umat hi punlubungana,
19 Ya ay lo'ob ni' nan idutna an niyuloh ay hiya ya ay bol'oh an nelelepot ay hiyah enggana!
20 Ya umat ni' hinay pamalloh Apo Dios hinan mamuhul ay ha"in,
21 Mu badangana' ni' ay He"a, Apo Dios, an na'abbagbagtu
22 Ti mahmo'a' an mahapul'uy badang,
23 Ya umata' hi ngauh nan mapuyaw an ag'agan ma'ubah,
24 Ya mungwogwog di lulug'uh agguy'u nangnanganan,
25 Ya aba'abatlana' hinan tatagun mangubat ay ha"in,
26 At badangana' ni' ahan, Apo Dios, ta baliwana' an dumalat nan nidugah an pamhodmu
27 ta way panginnilaan nan mangubat ay ha"in an He"a, Apo Dios, di namaliw ay ha"in!
28 Ya ta"on unna' idutan ay dida mu wagahana' ay He"a,
29 Ya adim iyabulut an mangabak danen mamuhul ay ha"in ta mabainandah enggana!
30 Mu ha"in, Apo Dios, ya ipadngol'uy punyamana' ya pundayaw'un He"ah
31 ti immannung an nidadaan'an bumadang hinan tatagun nun'awotwot