1 Ya intuluy Job an himmapit an inalinay,
2 Ti nan tatagun nun'abaholan ya akawonday luta
3 Ya polhonda nan dongkin di nguhu,
4 Ya ibilangda nan nun'awotwot hi mi'id di hulbina,
5 At nan nun'awotwot ya mibilangdah umat hinan agguy na'amun animal
6 Ya mapilitandan umuy me'eb'ebto' hinan payaw di udum
7 Ya molo'dah nan amahdomahdom an mi'id ah lubungda,
8 Ya wa ay ta madloh di udan ya ma'potda,
9 Ya nan nun'abaholan ya alanda nan nguhun ungungan natoy hi amada ta pumbalinondah himbutda,
10 Nan nun'awotwot ya mapilitandan muntamuh payaw an mi'id ah lubungda ti mid atog di pangngalanda,
11 Manu ti mumpogpogohdah nan olibon miyammah lana,
12 Ya hidih nan babluy ya madngol di kilan nan mun'agadyuh an mun'atoy
13 Ya nan nun'abaholan an tatagu ya ngohoyondah Apo Dios,
14 Ya nan pumapatoy ya bumuhu' ta pumpatoyna nan nun'awotwot ya un mahkay tumalanu,
15 Ya nan gun umilugtap ya hohoddonay ahdomanana ti alyonay,
16 Ya wa ay ta mahdom ya punhogopday a'abung ta mangakawda,
17 Hay pa'appohpohdonda ya nan munhehellong an bo'on hay mapatal
18 Mu mun'a'ubahdah tun lutan umatdah nan upag hinan danum,
19 Ya nan atoy di nangpuh hinan nun'abaholan
20 Ta"on un hi inada ya inaliwanda,
21 Ya manu ay umat hinay ma'at ay dida ti na"appuhiy gunda inat hinan binabain bahig
22 Mu nan nidugah di abalinan Apo Dios ya ubahona nan mun'abi'ah
23 Olom ya iyabulut Apo Dios an mi'tagudah mi'id al'ali,
24 Nan nappuhiy pangatda ya manu ti ag'agadan umadangyan,
25 Undan way mangihaut an mangalih un nibahhaw?