1 Donglonyu ta ikantaa' nan engha'
2 At binu'ayna ta nun'aanay batu,
3 At inalin din engha' di,
4 Hay ngadan nin di agguy'u inat hinan intanom'u ta numbalin hi umalinu?
5 At hay ato' ya pun'aan'un amin di luhad nan intanom'un greyp,
6 Ya ingnganuy'uh den intanom'u ta mumbalin hi inalahan
7 Ya hay nipaddungan nan intanom nan nidugah di abalinanan Dios
8 Mahmo' ayun tatagun gun pumla' hi luta ya abung
9 Ya dengngol'u nan hinapit Apo Dios an nidugah di abalinanan inalinay,
10 Ya nan ambilog an nun'atamman hi greyp
11 At mahmo' ayu ahan an bumuwabuwah an bumangon
12 Ya manu kogoh ti nan a'am'amunganyu ay an pun'am'amlonganyu ya idadaanyuy ma'an ya ma'inum,
13 At hiyanan ditu'un tatagun Apo Dios ya iyuy ditu'uh nan buhul hi udum an babluy,
14 At nan lubu' ya umambilog
15 At mabainan tu'un amin,
16 Mu nan nidugah di abalinanan Dios ya imannung an midaydayaw
17 At hay pumbalinan ten babluy mahkay ya matawan
18 At mahmo' ayun tatagun
19 Ya da'yun mangali goh udot hi,
20 Ya mahmo' ayun nahuhunniy nomnomnan mangalih un maphod nan nibahhaw,
21 Ya umat goh ay da'yun hay punnomnomyuh odolyu
22 ya da'yun nundongol an ma'innum hi bayah,
23 ya da'yun nibahhaw di pangipanuhnah nan tatagun
24 At hiyanan mipaddung ayuh dagamin namaganan an mapuulan,
25 At nidugah di bungot Apo Dios ay ditu'un tataguna,
26 At ayagana goh nan buhul tu'uh nan nun'iyadagwin babluy
27 Ya mi'id ah ohan didah mablay unu mida'leh,
28 Ya mun'atadom di panada,
29 Ya nan tindaluda ya umatdah layon an humeel hi un way dempapnah animal,
30 Ya hitun dumatngan daten buhul ya nidugah an waday mumbungug hi madngol