1 Henen a'atana ya moltaon mahkay Apo Dios nan ay ulog an Leviathan hinan baybay,
2 Ya alyon Apo Dios di,
3 Ti Ha"in an Dios di manalimun hinan inatanom'un greyp ta gun'u hibugan,
4 Ti adia' mahkay bumugot.
5 Mu wa ay ta pohdon nan buhul an baliwa' dida
6 Ya udum hi algaw ya nan tatagu' an holag Jacob an hi Israel di ohah ngadana
7 Ya inali' an hi Isaiah di,
8 At pumpakak ditu'un ten numbabluyan tu'u ta iyuy ditu'uh nan buhul tu'uh udum an babluy.
9 Mu gahin hi un tu'u du'gon di gun tu'u pumbaholan ya unna aliwan di bahol tu'u.
10 Ti minganuyda nan nun'a'allup an babluy tu'u an umatdah nan mapulun.
11 at mun'ahpa'da,
12 Mu udum hi algaw ya ohha'ohhaon ditu'un amungon an holag Israel an mete"ah nan Wangwang an Euphrates ta engganah pogpog di ad Egypt.
13 Ya henen a'atana ya ma"adngol nan ipagangoh tu'un talampet an pangayag tu'uh nan i'ibba tu'un mun'a'utaw hi ad Assyria ya ad Egypt. At mumpumbangngadda ta middumdan ditu'un mundayaw ay Apo Dios eden pento'nan duntug ad Jerusalem.”