1 Hiyah te ingkatan David ay Apo Dios hidin namaliwan Apo Dios ay hiya ta agguy pinatoy Saul ya ta"on un an amin nan buhulna.
2 An inalinay:
3 Hiya an nangibaliw ay ha"in hinan buhul'u,
4 At hi Apo Dios an nahamad hi madayaw di numpabadanga',
5 Ti hidin hi'ihi'itangan ataya'
6 ya paddungna goh di tali an nibobod ay ha"in,
7 At gapuh nan nidugah ahan an numanomnoma' ya numpahpahmo'a' ay Apo Dios,
8 Ya gapuh boholnah nan buhul'u ya immalyog tun luta,
9 Ya paddungnay mun'ahu' di olongna,
10 Ya piniwa'nad daya ta nun'ohop,
11 At nilugan hinan muntadyapan an cherubim
12 an nale'woh di odolnah nan ma"ang'angitit an bunut an napnuh udan.
13 Mu dumalat nan nidugah an humiliana ya nidugah an umanilat.
14 Hiya an na'abbagbagtun Dios ya hay oha goh hi umatan di bungotna ya ay idul,
15 at nun'ipalayawna nan buhul an dumalat hinan ilat an paddungnay nun'ipananan dida.
16 Ya namaganan nan baybay ta ma"attig di dopona,
17 Ya ta"on un wad abuniyan ya paddungnay nunluung
18 Ta binaliwana' ay Hiyah nan mun'abi'ah,
19 Ti hidin nunligligata' ya immaliday buhul,
20 Ya manu ay binadangana' ya binaliwana' ay Hiyah nan atata'ot an ma'at ay ha"in
21 ti miyunnudan hinan nahamad ya maphod an pangat'uy inatnan ha"in
22 ti inunud'u nan Uldina an agguy'u inat nan nappuhi ta agguy'u din'ug Hiya.
23 Ya an amin din inyuldina ya immannung an inunud'u an agguy'u nginohoy.
24 Inilanan mi'id di numbahola' ay Hiya,
25 at hiyanan indatna an Dios di lagbu' an miyunnudan hinan nepto' an aat'u
26 Hi Apo Dios ya minaynayun di pangipapto'nah nan tatagun mangedenol ay Hiyah enggana,
27 Ti nahamad di atonah nan maphod di ugalina,
28 Ya nan mumpa'ampa ya baliwana,
29 Ya nipaddung hi Apo Dios hi dilag'u
30 Ya Hiya ay di bumadang ay ha"in ya abalina' an abakon nan mangubat ay ha"in,
31 At Hiyay ay hapiaw an mananin amin hinan mihi'ug ay Hiya
32 Hiya ya anggay di Ap'apu,
33 Hiyay Dios an alpuwan di bi'ah'u,
34 Ya Hiya nongkay di mangidat hi abalina' an tumagtag an umat hi amabi'ah di ulha
35 Ya idatnay abalina' an mi'gubat
36 at hiyanan nangabakona',
37 Ya gapuh nangipapto'anan ha"in at paddungnay agguya' nihungpul hinan dalan.
38 Mu ha"in numpamdug ay dida ta engganay numpatoy'u didan amin,
39 at hiyanan mid mangiballoh
40 ti indatnay bi'ah'un ni'gubat ta inabak'u nan buhul'u.
41 Ya impata'otna dida ta limmayawda,
42 Ya hidin nanganapdah bumadang ay dida ya mi'id,
43 At hiyanan numpatoy'u dida an paddungnay un'u nunggimu' dida
44 At immannung an binaliwana' ay Apo Dios hinan nangohoy an tatagu
45 Ya an amin di ibaga' ya unudonda,
46 ti din buhul'u ya wumogwogdan mumpangabuhu' hinan nipo"oyanda
47 At madayaw hi Apo Dios an wagwadah enggana!
48 Hiya nan Dios an mangiballoh hinan buhul'u,
49 Ti binaliwana' hinan aton nan mun'abungot an buhul'u,
50 At hiyanan nan anabagtun Apo Dios di hapihapito' hinan tataguh nan abablubabluy,
51 Ti nangabakona' an alin pento'na,