1 Munhana ta'un Apu Dios te hiya ya maphod di pangatna
2 Ot munhana ta'u hinan ma"id ha nipadunganan Dios
3 Ot munhana ta'u nimpe i Apu Dios an ap'apun an namin di ap'apu
4 Hiya ya ammunay waday abalinana an mangat hi nakaskasda'aw
5 Impatigonay la'ingna hi nunlumuwanah ad lagud
6 Ya hiyay nangigopnad hitun lutah nan tu'yap di liting
7 Ya hiyay nunlumu hi algo ya bulan
8 Ta nan algo ya dumilag hinan mapatal
9 Ya limmuna nan bulan ya nadan bittuwon ta diday dumilag hinan mahdom
10 Hiyay namateh nadan panguluwan an linala'in imbabalen nadan i Egypt
11 Ya hiyay nangipangulu i handidan a'ammod ta'un tinanud Israel ta tinaynandah ad Egypt
12 Ot gapuh nan ongal an abalinana ya impanguluna nimpe handidan a'ammod ta'uh nanaynandah ad Egypt
13 Ya nunhi"anona nan liting hidin nipotto'dah nan baybay an mumbolah ot pumbalinonah mamaga nan gawwana
14 Ta nangi'wan handidan a'ammod ta'un tinanud Israel an immagwat
15 Mu hana'en patul hi ad Egypt an didah nadan tindaluna ya nun'a'altingda i diyen baybay an mumbolah.
16 Ot ipanguluna nadan tatagunah nan agge naboblayan
17 Ya numpatena nadan ongal di abalinandan papatul
18 Ta numpatena nadan nundongol an papatul
19 Ta pinatena nan patul an hi Sihon an patul nadan tinanud Amor
20 Ya atbohdin pinatenah Og an patul hi ad Basan
21 Ta nadan boblen dadiyen pinatena ya indatnah nadan tataguna
22 Ta handidan a'ammod ta'u nimpen tinanud Israel an munhilbin hiyay nangdatana
23 Hi Apu Dios ya agge dita'u ingnganuy hidin na'abakan ta'u
24 Te inihwang dita'u hinadan binuhul ta'u
25 Ya hiyay mangdat hi itanud nadan limmuna
26 Ta hiya nan munhana ta'u i Apu Dios hi ad abunyan