1 Apu Dios, tanganu on'a immadawwi i ha''on?
2 Hanadan adi maphod di pangatda ya munlattuwagda an mamalpaligat hinadan nun'awotwot.
3 Te ilattuwagda nimpe nadan adi maphod an pohpohdondan aton.
4 Te hay punnomnomdah adolda ya na'abbaktuda ta hiya nan adida mumpaboddang i he"a te alyonday adi da'a anu mahapul.
5 Yaden maphod di pumbalinan nadan ato'atonda.
6 Te hay punnomnomda ya malingngopdah inggana.
7 Ya hay impa'inghadan ibagabaga ya idut ya layah ya panattatakut.
8 Ya eda mumbota' hinan nihaggon hinadan boble.
9 Ta nipaddungdah nan layon an mumbota'.
10 Ya gapu ta mabikahda ya pamaaggon inokmomanda nadan bota'onda.
11 Ya alyonda bo udot di, Ta'omman ot agge innilan Apu Dios datuwen at'atton ta'u te onadan titiggon.
12 Ot hanat dusaom ahan Apu Dios nadan mangamangat hi adi maphod.
13 Te tanganu udot on pihulon da'a i dadiyen adi maphod di pangatda.
14 Mu innila' an tigtiggom di punholholtapan nadan udum an tatagu.
15 Ot hanat dusaom nimpe nadan adi maphod di pangatda ta ingganah idinongda nadan adi maphod an ato'atonda.
16 Ot ta'on on mama"iddah tun boblem nadan mundayaw hi udum an dios mu da'mi'e ya he"ay Ap'apumi hi inggana.
17 Innila' Apu Dios an dongdonglom di dasal nadan mapalpaligat ta pa'amlongom damdama dida.
18 Ya ita'dogmu dida ya ta'on on nadan nun'apuhig.