1 Ot alyon Job di,
2 Ot onha mabalin an damoton di a'at di umukayunga' ya tun ligato'
3 ot wan indamdamotna mu hanadan panag hinan da'ging di baybay.
4 Te paddungnay impanan Apu Dios i ha"on datuwen punligata' ta ay kodot an initmog di adol'u.
5 Undan munlili nan atap an animal hi'on dakol di holo' hi anona onu e mungkongaw nan baka hi'on waday anona.
6 Hana ni'mon ma"id ha ahinan makan ot adi pohdon an anon ya namama moh nan pulaw hinan itlug an ma"id ahan ha tamtamna.
7 Ha"on ya ma"id ha pohod di pangana' te athidiy panamtam'uh nadan makan.
8 Ya alyon bon Job di, Pohdo' tayyan tobalon Apu Dios nan dawadawato' i hiya.
9 Ya udu'dulnay patayona' ot attog i hiya.
10 Onha nin ha innila' an patayona' ot wan nunhiglay amlong'u an ta'on on nunhiglay holholtapo'.
11 Te kimmapuy mo ahan teey adol'u ot daan hanan e mangit'itpol ya ma''id damdama ha namnamao' hi e' pumhodan.
12 Ya undan batu onu gombang hatun adol'u ta adina ikinay mahakit.
13 Te nunhigla tayya tun holholtapo' ya adi' abalinan an boddangan di adol'u.
14 Te nan tagun nunhiglay punligatana ya mahapulnay boddang nadan ibbana an ta'on on inwalongnay pangulugnah nan ongal di abalinanan Dios.
15 Mu da'yun i'iba ya ma"id ha dinol'un da'yu te umat ayuh nan wa"el an ma"id'e ha udan on namaganan.
16 hi'on mun'a'umah nadan dalallu.
17 Mu wa'et inugawan ya matdu'.
18 Ta wadaday mungkumilhu an mangihingngin e manama' hi liting mu lo'tat ya matedah nan agge naboblayan on ma"id ha uminumanda.
19 Ya datuwen mumpungkumilhu ya nalpudah ad Tema ya hi ad Seba.
20 Ta madinoldan waday liting hi akhupanda.
21 Ya athidiy umatanyu an impatigoyun ma"id ha iboddangyun ha"on.
22 Mu tanganu on ayu athina, te undan attog numbagaa' i da'yu ta waha idatyun ha"on onu waha imbaga' hi bayadanyu ha tagu ta boddangana'?
23 Ya undan waha nangalya' hi ihwanga' i da'yu hinadan binuhul'u ya hinadan mamalpaligat i ha''on?
24 Ya undan waday tinigoyuh numbahula'?
25 Nan panugun di ohan tagun maphod di pangatna ya mahkit hi e pangngolan.
26 Wa nin eh'an alyonyu on pa'addonglo' nadan itugunyu hinan athinan hay punnomnomyu ya ma"id ha hunung nadan ib'ibagga' an gapu ta athitun nunhiglay punligata'.
27 Matigoh nan pangatyun ha"on an umat ayuh nadan tatagun ihbutday napuhig.
28 Ot hay dawato' ya pa'tiggonyu tun a'at'u.
29 Ot hanat idinongyun mangibagabaga hi manu'e ya numbahula' ta wan abulutonyun ta'on on athitu ya nanongnay amaphod di pangat'u.
30 Umman adiya' ma'layyah.