1 Ot inayun bon Job an alyon di,
2 Mahkit di nomnom'u te ta'on on ma''id ha bahul'u ya athituy na'at i ha''on.
3 an ta'on on ituwen nabatin pi'taguwa'
4 ya hanat ma"id ha ibaga' hi adi maphod onu ha layah.
5 Ot adi' abuluton an nipto' nan imbagayu i ha''on.
6 Ya inaynayun'un mangat hi maphod.
7 Hanat dusaon Apu Dios nadan mi'buhul i ha"on an umat hi pundusanah nadan mangmangngat hi adi maphod.
8 Ta ma"id ha namnamaon nan adi umunud i Apu Dios hi'on pogpogonay nitaguwana.
9 Ya dumatong'ey punligatanda ya adi donglon Apu Dios di dasalda.
10 Te ma"id ha amlongdan mundayaw i hiya an ongal di abalinanan Dios ya adida uggan mundasal i hiya.
11 Ot aga ta tudduwan da'yuh nan a'at nan ongal di abalinanan Dios.
12 Mu nomnomnomonyu an unhaot adi gahin hi ituddu' te tinannigoyuy a'atna mu tanganu on athina an ma"id ha hunung nadan ibagabagayu.
13 Nan ongal di abalinanan Dios ya dusaona nadan mangmangngat hi adi maphod.
14 Ta ta'on on dakol di imbabaleda mu matedah gubat ya nada'en udum ya matedah inagangda.
15 Ya hanada'e bon mihwang i dadiye ya hay dogoh di mamaten dida.
16 Ya ta'on on nitapu"ul di inamungdah silber an umat i ha nitapu"ul an hupu' ya dakkodakkol di lubungda
17 mu bokon diday mangilubung te nadan tatagun imbilang Apu Dios hi maphod.
18 Ya mangammadah baleda mu agge nahamad an umat hi balen di kakawwa.
19 Ta kadangyandah ad uwani mu ahida pangigib'an an ma"id an namin di kinadangyanda.
20 Te ma'ibagan dumatong han atatakut an punligatanda an umat hinan dumakolan di liting ya inyanudna dida.
21 an malpuh nangappit hi tuluwan di algo ya inye"ena dida.
22 Ta atonday abalinandan mangihwang hi adolda mu onaot on ih'ihbod ta mumpinnati'da an paddungnay ma"id ha homo' nan puwo' i dida.
23 Ta paddungnay tagu nan puwo' an palpalakpakana ya nginihngihilana dadiyen mun'iya'addib.