1 Ô con, tàng con khoi rùp bàu am ngè baxon dèh ca mangai haten hatìa đòiq ca'naih dòih,
2 Tàng con 'bìq hlòp dèh ca bàu khoi hùaq,
3 Ô con, 'màng aih con khoi mùt ta tì mangai haten hatìa,
4 Paq am baiq toq mat con cùi,
5 Dŏih claih dađeh tìah ca jìu ragiang claih enh tì mangai lam axan,
6 Ô mangai aroh, lam ngan hmŏch beq;
7 'Nhac ca ùh i ca bùa,
8 Haq xôq padon dahwèq caq jò mùa padrang,
9 Ô mangai aroh, ìh ca'nùng cùi trùh jò leq hòm?
10 Cùi mòiq rahyàc, ca'nhip mat mòiq rahyàc,
11 Èh bìac pa jah trùh ca ìh tìah ca mangai atùng,
12 Mangai hadrùq hadriang, mangai ngang dù, aih mangai 'màng leq?
13 Haq cachìac mat, jôiq jènh,
14 Ta manoh haq i bìac amùa amech;
15 Taiq nen aih, can ranàc trùh ca haq da'ngàc;
16 I tadràu bìac Chuaq git,
17 Mat loq catèh, rapet loq amòng,
18 Manoh tình ca broq trong dù,
19 Mangai anoi hlài 'nùt wa capoch amòng,
20 Ô con, wèq bàu thê da baq beq,
21 Achìh đòiq haq ta manoh con hloi hloi,
22 Jò con lam, bàu aih jah 'nong con; jò con cùi, haq wèq con;
23 Ma jah 'màng aih bàu thê aih đen, bàu hnài aih can 'ngah,
24 Đòiq wèq con claih ca mangai cadrì ngang dù,
25 Manoh con paq ham ca can lem lình haq enh gùng,
26 Ma jah 'mang aih gù cadrì tango anang broq ca mangai calô toq ŏi i mòiq ha'nech 'benh raq;
27 I mangai calô leq jah đòiq ùnh mùt ta achong,
28 Loq i mangai jah cadiang lam ta ngia ùnh hi jènh haq ùh padŏc 'mòh?
29 Mangai leq lam trùh ta mai mangai haten ca haq hadai 'màng aih;
30 Wì ùh khìn mangai atùng,
31 Mahaq tàng haq 'bìq rùp, haq ep đèn hlài tapèh yàng;
32 Mangai leq broq tôiq tango anang ca gu cadrì, aih mangai pi i ca manoh loq 'nì;
33 Mangai aih 'bìq habau wa 'bìq khìn,
34 Taiq bìac tarènh, broq ca mangai ŏng nòih dìq jaq;
35 Haq ùh chìuq nhàn 'nhac ca am bàc 'bac,