1 א פּוֹלוֹס שְׁלִיחַ יֵשׁוּעַ הַמָּשִׁיחַ בִּרְצוֹן אֱלֹהִים אֶל־הַקְּדוֹשִׁים בְּאֶפְסוֹס וְאֶל־אֲשֶׁר נֶאֱמָן לִבָּם לִפְנֵי יֵשׁוּעַ הַמָּשִׁיחַ׃
2 ב חֶסֶד וְשָׁלוֹם יִתֵּן לָכֶם אֱלֹהִים אָבִינוּ וְיֵשׁוּעַ הַמָּשִׁיחַ אֲדֹנֵינוּ׃
3 ג בָּרוּךְ הוּא הָאֱלֹהִים אֲבִי אֲדֹנֵינוּ יֵשׁוּעַ הַמָּשִׁיחַ אֲשֶׁר בֵּרַךְ אֹתָנוּ מִשְּׁמֵי מְעוֹנוֹ בְּכָל־בִּרְכַּת הַנֶּפֶשׁ בַּמָּשִׁיחַ׃
4 ד כַּאֲשֶׁר בּוֹ בְחָרָנוּ עַד לֹא נוֹסְדָה אָרֶץ לִהְיוֹת קְדֹשִׁים וּתְמִימִים לְפָנָיו׃
5 ה וּבְאַהֲבָתוֹ יְעָדָנוּ מֵרֹאשׁ לִהְיוֹת לוֹ לְבָנִים עַל־יְדֵי יֵשׁוּעַ הַמָּשִׁיחַ כְּחֵפֶץ לִבּוֹ הַטּוֹב׃
6 ו לְתִפְאֶרֶת עֹז חַסְדּוֹ אֲשֶׁר־גָּמַל עָלֵינוּ בִּידִידוֹ׃
7 ז כִּי־בוֹ נִמְצָא פְדוּת וּסְלִיחָה לְחַטֹּאתֵינוּ בְּדָמוֹ הַשָּׁפוּךְ כַּהֲמוֹן חֲסָדָיו׃
8 ח אֲשֶׁר הִרְבָּה עָלֵינוּ בְּכָל־חָכְמָה וּבִינָה׃
9 ט וַיּוֹדַע לָנוּ אֶת־סוֹד רְצוֹנוֹ כַּעֲצָתוֹ הַטּוֹבָה הַיְעוּצָה בְלִבּוֹ מִקֶּדֶם׃
10 י לְקַבֵּץ בַּמָּשִׁיחַ בִּמְלֹאת יְמֵי הַפְּקֻדָּה כֹּל אֲשֶׁר בַּשָּׁמַיִם וְכֹל אֲשֶׁר בָּאָרֶץ וְהָיוּ בוֹ לַאֲחָדִים׃
11 יא וְגַם עַל־יָדוֹ נַחֲזִיק בַּמּוֹרָשָׁה כַּאֲשֶׁר נִבְחַרְנוּ לָהּ מֵאָז מִטַּעַם הָעֹשֶׂה כֹּל כַּעֲצַת חֶפְצוֹ׃
12 יב לְמַעַן יֵרָאֶה עָלֵינוּ הֲדַר כְּבוֹדוֹ בִּהְיוֹת אֲנַחְנוּ הָרִאשֹׁנִים אֲשֶׁר בָּטַחְנוּ בַּמָּשִׁיחַ׃
13 יג וּבוֹ בֹטְחִים גַּם־אַתֶּם אַחֲרֵי אֲשֶׁר שְׁמַעְתֶּם אֶת־דְּבַר הָאֱמֶת אֶת־דְּבַר הַבְּשׁרָה לִתְשׁוּעַתְכֶם וְכַאֲשֶׁר הֶאֱמַנְתֶּם בּוֹ כֵּן גַּם־נֶחְתָּמִים אַתֶּם בְּרוּחַ הַקֹּדֶשׁ כַּאֲשֶׁר דִּבֵּר׃
14 יד אֲשֶׁר עֵרָבוֹן הוּא לְמוֹרָשָׁתֵנוּ עַד אֲשֶׁר־תִּגָּאֵל וְהָיְתָה־לָּנוּ לַאֲחֻזָּה לִתְהִלַּת שֵׁם כְּבוֹדוֹ׃
15 טו וַאֲשֶׁר עַל־כֵּן גַּם־אָנֹכִי אַחֲרֵי שָׁמְעִי אֶת־אֱמוּנַתְכֶם בְּיֵשׁוּעַ אֲדֹנֵינוּ וְאַהֲבַתְכֶם לְכָל־הַקְּדוֹשִׁים׃
16 טז לֹא חָדַלְתִּי מֵהוֹדוֹת בַּעַדְכֶם וּלְהַזְכִּירְכֶם בִּתְפִלּוֹתַי׃
17 יז כִּי אֱלֹהֵי יֵשׁוּעַ הַמָּשִׁיחַ אֲדֹנֵינוּ אֲבִי הַכָּבוֹד יִתֵּן לָכֶם רוּחַ הַחָכְמָה וְהֶחָזוֹן לָדַעַת אֹתוֹ׃
18 יח וּלְהָאִיר עֵינֵי שִׂכְלְכֶם לְהַשְׂכִּיל מָה הִיא תִקְוַת קְרוּאָיו וּמֶה חֹסֶן כָּבוֹד לִקְדשָׁיו בְּנַחֲלָתוֹ׃
19 יט וּמָה עֹצֶם גֹּדֶל גְּבוּרָתוֹ אֲשֶׁר פָּעַל בָּנוּ הַמַּאֲמִינִים בּוֹ לְפִי תֹקֶף עֻזּוֹ׃
20 כ הוּא אֲשֶׁר פָּעַל בַּמָּשִׁיחַ בַּאֲשֶׁר הֲקִימוֹ מִן־הַמֵּתִים וַיּוֹשִׁיבֵהוּ לִימִינוֹ בַּמָּרוֹם׃
21 כא גָּבוֹהַּ מִכָּל־מִשְׂרָה וְשִׁלְטוֹן וּגְבוּרָה וּמֶמְשָׁלָה וּמִכָּל־אֲשֶׁר נִקְרָא בְשֵׁם גַּם־בָּעוֹלָם הַזֶּה וְגַם־בָּעוֹלָם הַבָּא׃
22 כב וְכֹל שָׁת תַּחַת רַגְלָיו וַיִּתְּנֵהוּ לְרֹאשׁ לְכָל־הָעֵדָה׃
23 כג אֲשֶׁר הִיא גְוִיָּתוֹ וּמְלֹאוֹ כִּי מָלֵא הוּא אֶת־כֹּל בַּכֹּל׃