1 א שִׁמְעוֹן פֶּטְרוֹס עֶבֶד יֵשׁוּעַ הַמָּשִׁיחַ וּשְׁלִיחוֹ אֶל־אֲשֶׁר נֹאחֲזוּ עִמָּנוּ בָּאֱמוּנָה הַיְקָרָה וּבְצִדְקַת אֱלֹהֵינוּ וּמוֹשִׁיעֵנוּ יֵשׁוּעַ הַמָּשִׁיחַ׃
2 ב חֶסֶד לָכֶם וְשָׁלוֹם רָב בְּדַעַת אֱלֹהִים וְיֵשׁוּעַ אֲדֹנֵינוּ׃
3 ג כַּאֲשֶׁר נָתַן לָנוּ יְהוָֹה בִּגְבוּרָתוֹ כָּל־מִשְׁעַן הַחַיִּים וְיִרְאַת שָׁמָיִם עַל־יְדֵי דַעַת הַקֹּרֵא אֹתָנוּ בְּעֹז צִדְקָתוֹ׃
4 ד וְעַל־יָדָם נָתַן לָנוּ הַבְטָחוֹת גְּדֹלוֹת יְקָרוֹת עַד־מְאֹד לְהַנְחִיל לָכֶם חֵלֵק מִטֶּבַע אֱלוֹהַּ אַחֲרֵי אֲשֶׁר נִצַּלְתֶּם מִשַּׁחַת וְתַאֲוֹת הָעוֹלָם׃
5 ה בַּעֲבוּר זֹאת הִתְאַמְּצוּ בְכָל־מְאֹדְכֶם לְהוֹסִיף אֶל־אֱמוּנַתְכֶם צְדָקָה וְאֶל־צְדָקָה דָּעַת׃
6 ו וְאֶל־דַּעַת מַעְצָר לְרוּחַ וְאֶל־מַעְצָר לְרוּחַ כֹּחַ הַסַּבָּל וְאֶל־כֹּחַ הַסַּבָּל יִרְאַת אֱלֹהִים׃
7 ז וְאֶל־יִרְאַת אֱלֹהִים אַחֲוָה וְאֶל־אַחֲוָה אַהֲבָה׃
8 ח כִּי אִם־אֵלֶּה תִהְיֶינָה בָכֶם כְּדֵי הַמִּדָּה אוֹ יֶתֶר עַל־הַמִּדָּה לֹא תוּכְלוּ לָשֶׁבֶת בַּעֲצַלְתַּיִם מִבְּלִי עֲשׂוֹת פְּרִי בְּגַן הַדַּעַת לְיֵשׁוּעַ הַמָּשִׁיחַ אֲדֹנֵינוּ׃
9 ט כִּי הָאִישׁ אֲשֶׁר אֵלֶּה אֵין־לוֹ הוּא עִוֵּר אוֹ עֹצֵם עֵינָיו מֵרְאוֹת וְשֹׁכֵחַ אֶת־טָהֳרָתוֹ מֵחֲטָאָיו הָרִאשֹׁנִים׃
10 י וְעַל־כֵּן אַחַי עֲשׂוּ כָל־אֲשֶׁר בְּכֹחֲכֶם לְקַיֵּם כִּי נִקְרֵאתֶם וְנִבְחַרְתֶּם אֶל־נָכוֹן וְאִם כֵּן תַּעֲשׂוּ לֹא תִכָּשְׁלוּ לָנֶצַח׃
11 יא כִּי בָזֶה יִפָּתַח לָכֶם הַשַּׁעַר לְמַלְכוּת עוֹלָם אֲשֶׁר לַאֲדֹנֵינוּ מוֹשִׁיעֵנוּ יֵשׁוּעַ הַמָּשִׁיחַ׃
12 יב עַל־כֵּן לֹא אֶרֶף מֵהַזְכִּירְכֶם תָּמִיד עַל־אֵלֶּה אַף כִּי־יְדַעְתֶּם אֶת־הָאֱמֶת בַּאֲשֶׁר הִיא וּבָהּ אַתֶּם מְיֻסָּדִים׃
13 יג וְרַחַשׁ לִבִּי דָּבָר טוֹב לְהַעֲלוֹת עַל־רוּחֲכֶם וּלְהָעִיר אֶתְכֶם כָּל־יְמֵי שִׁבְתִּי בְאָהֳלִי הַזֶּה׃
14 יד כִּי יֹדֵעַ אֲנִי כִּי חִישׁ יִצָעַן אָהֳלִי כַּאֲשֶׁר גַּם־יֵשׁוּעַ הַמָּשִׁיחַ אֲדֹנֵינוּ גִּלָּה אֶת־אָזְנִי׃
15 טו וְהִנְנִי עָמֵל כַּיּוֹם לְבִלְתִּי יָמוּשׁ מִכֶּם זִכְרוֹן הַדְּבָרִים הָהֵם גַּם־אַחֲרֵי חֲלִיפָתִי׃
16 טז כִּי לֹא אַחֲרֵי מִשְׁלֵי שָׁוְא וּמַדּוּחִים הָלַכְנוּ כַּאֲשֶׁר הוֹדַעְנוּכֶם אֶת־גְּבוּרוֹת אֲדֹנֵינוּ יֵשׁוּעַ הַמָּשִׁיחַ וּבֹאוֹ כִּי אִם־עֵינֵינוּ הָיוּ רֹאוֹת אֶת־הוֹד פָּנָיו׃
17 יז כַּאֲשֶׁר נָשָׂא כָבוֹד וָעֹז מֵאֵת הָאֱלֹהִים הָאָב כְּבֹא אֵלָיו קוֹל מֵהֲדַר גְּאוֹנוֹ לֵאמֹר זֶה בְּנִי יְדִידִי אֲשֶׁר בּוֹ רָצְתָה נַפְשִׁי׃
18 יח וְאֶת־הַקּוֹל הַהוּא שָׁמַעְנוּ בְאָזְנֵינוּ יֹצֵא מִן־הַשָּׁמָיִם בִּהְיוֹתֵנוּ עִמּוֹ בְּהַר הַקֹּדֶשׁ׃
19 יט וּדְבַר הַנְּבוּאָה בָּרוּר לָנוּ כַּיּוֹם פִּי שְׁנָיִם וְאַתֶּם תֵּיטִיבוּ לָשִׁית אֵלָיו לֵב כְּמוֹ אֶל־לַפִּיד בֹּעֵר בְּמַחֲשַׁכִּים עַד אֲשֶׁר יִבָּקַע הַשַּׁחַר וְאוֹר הַיּוֹם יִזְרַח בִּלְבַבְכֶם׃
20 כ וְזֹאת יָדֹעַ תֵּדְעוּן מֵרֹאשׁ כִּי נְבוּאַת כִּתְבֵי הַקֹּדֶשׁ אֵינֶנָּה תְלוּיָה בְּפִתְרוֹן הַפֹּתֵר אֹתָהּ לִרְצוֹנוֹ׃
21 כא כִּי מֵעוֹלָם לֹא־יָצְאָה נְבוּאָה מִפִּי אִישׁ לִרְצוֹנוֹ כִּי אִם־אַנְשֵׁי אֱלֹהִים הַקְּדוֹשִׁים הִבִּיעוּ מִן־הָאֱלֹהִים כַּאֲשֶׁר נְתָנָם רוּחַ הַקֹּדֶשׁ לְהַבִּיעַ׃