1 א פּוֹלוֹס שְׁלִיחַ יֵשׁוּעַ הַמָּשִׁיחַ בִּרְצוֹן אֱלֹהִים אֲנִי וְטִימוֹתִיּוֹס אָחִינוּ אֶל־עֲדַת אֱלֹהִים בְּקֹרִנְתּוֹס וְאֶל־כָּל־הַקְּדוֹשִׁים אֲשֶׁר בְּאֶרֶץ אֲכַיָּא׃
2 ב חֶסֶד וְשָׁלוֹם יִתֵּן לָכֶם אֱלֹהִים אָבִינוּ וַאֲדֹנֵינוּ יֵשׁוּעַ הַמָּשִׁיחַ׃
3 ג בָּרוּךְ הוּא הָאֱלֹהִים אֲבִי אֲדֹנֵינוּ יֵשׁוּעַ הַמָּשִׁיחַ אֲבִי הָרַחֲמִים וֵאלֹהֵי כָל־נֶחָמָה׃
4 ד הַמְנַחֵם אֹתָנוּ בְּכָל־צָרָה וְהַנֹּתֵן לָנוּ כֹּחַ לְנַחֵם אֲחֵרִים בְּכָל־צָרָתָם בַּתַּנְחוּמִים אֲשֶׁר נֻחַמְנוּ מֵאֵת אֱלֹהִים׃
5 ה כִּי כַּאֲשֶׁר עָצְמוּ מַכְאֹבֵינוּ בַּעֲבוּר הַמָּשִׁיחַ כֵּן עַל־יְדֵי הַמָּשִׁיחַ יַעַצְמוּ הַנִּחֻמִים לָנוּ׃
6 ו אִם־אָפְפוּ עָלֵינוּ רָעוֹת נֹחַם וְיֶשַׁע יֵצְאוּ לָכֵם מֵהֶן וְאִם־נִמְצָא נֹחַם אַתֶּם הֵם הַמְנֻחָמִים כִּי־יִגְדַּל כֹּחֲכֶם מִסִּבְלוֹת הַצָּרוֹת הָאֵלֶּה אֲשֶׁר נִסְבֹּל גַּם־אֲנָחְנוּ׃
7 ז וְיֶשׁ־לָנוּ תִּקְוָה נֶאֱמָנָה בְּדַעְתֵּנוּ כִּי כַּאֲשֶׁר חֵלֶק לָכֶם בַּצָּרָה כֵּן יִהְיֶה לָכֶם חֵלֶק גַּם־בַּנֶּחָמָה׃
8 ח כִּי אֵין־נַפְשֵׁנוּ לְהַעְלִים מִכֶּם אַחֵינוּ אֶת־הַצָּרוֹת אֲשֶׁר עָבְרוּ עָלֵינוּ בְּאַסְיָא כִּי כָבְדוּ מִמֶּנּוּ עַד־מְאֹד וְכִי־כָשַׁל כֹּחַ הַסַּבָּל עַד כִּי־גַם לְחַיֵּינוּ אָמַרְנוּ נוֹאָשׁ׃
9 ט וַאֲנַחְנוּ דִבַּרְנוּ עִם־לִבֵּנוּ לֵאמֹר מִשְׁפַּט־מָוֶת נִגְזַר עָלֵינוּ לְבִלְתִּי נִבְטַח עוֹד בְּנַפְשֵׁנוּ כִּי אִם־בֵּאלֹהִים הַמְחַיֶּה אֶת־הַמֵּתִים׃
10 י אֲשֶׁר הִצִּילָנוּ מִן־הַמָּוֶת הַקָּשֶׁה הַזֶּה כִּי מַצִּיל הוּא וְלוֹ הוֹחַלְנוּ כִּי יַצִּילֵנוּ עוֹד׃
11 יא כִּי גַּם־אַתֶּם תָּחוּשׁוּ לַעֲזָר־לָנוּ בִּתְפִלַּתְכֶם וּבָזֹאת רַבִּים יוֹדוּ לֵאלֹהִים עַל־מַתְּנַת הַחֶסֶד אֲשֶׁר נָתַן לָנוּ בִּתְפִילַת רַבִּים׃
12 יב וְזֹאת הִיא תְהִלָּתֵנוּ אֲשֶׁר לִבֵּנוּ לְעֵדוּת לָנוּ כִּי בְנִקְיוֹן כַּפַּיִם וּבְנֶפֶשׁ זַכָּה כְּלֵב אֱלֹהִים הִתְהַלַּכְנוּ בְּקֶרֶב הָאָרֶץ וְאַף כִּי־בְקֶרֶב מַחֲנֵיכֶם וְלֹא בְחָכְמַת בָּשָׂר וָדָם כִּי אִם־בְּחֶסֶד אֱלֹהִים׃
13 יג כִּי לֹא־כָתַבְנוּ אֲלֵיכֶם דָּבָר זוּלָתִי אֵת אֲשֶׁר אַתֶּם קֹרִאים וּמְקַיְּמִים וְגַם הוֹחַלְתִּי כִּי־תָקִימוּ דְבָרַי עַד־הַקֵּץ׃
14 יד וְכַאֲשֶׁר הָיִינוּ לִתְהִלָּה לַאֲנָשִׁים מִכֶּם הַמַּכִּירִים אֹתָנוּ כֵּן אַתֶּם לִתְהִלָה לָנוּ בְּיוֹם יֵשׁוּעַ אֲדֹנֵינוּ׃
15 טו וּבַבִּטָחוֹן הַזֶּה הָיָה אֶת־לְבָבִי לָבוֹא אֲלֵיכֶם אָז לָתֵת לָכֶם לִוְיַת־חֵן שֵׁנִית׃
16 טז וְלַעֲבֹר דֶּרֶךְ עֲלֵיכֶם אֶל־מַקְדּוֹנְיָא וּמִמַּקְדּוֹנְיָא לָשׁוּב אֲלֵיכֶם וְאַתֶּם תְּשַׁלְּחוּנִי אָז אֶל־אֶרֶץ יְהוּדָה׃
17 יז וְכַאֲשֶׁר הָיָה כֵן אֶת־לְבָבִי הֲכִי בָזֹאת נִמְהַר לֵב הָיִיתִי אוֹ הֲכִי הָיְתָה מַחֲשַׁבְתִּי כְּמַחֲשֶׁבֶת בָּשָׂר וָדָם וַיְהִי בְּפִי הֵן וְלֹא לֹא וָהֵן כָּאֶחָד׃
18 יח עַל־אֱמוּנַת אֱלֹהִים כִּי־דְבָרֵנוּ אֲלֵיכֶם לֹא הָיָה הֵן וָלֹא׃
19 יט כִּי בֶן־הָאֱלֹהִים יֵשׁוּעַ הַמָּשִׁיחַ אֲשֶׁר אֲנִי וְסִלְוָנוֹס וְטִימוֹתִיּוֹס קָרָאנוּ אֹתוֹ בֵינֵיכֶם הוּא לֹא הָיָה הֵן וָלֹא כִּי רַק־אֱמֶת בּוֹ׃
20 כ וּבוֹ כָל־הַבְטָחוֹת אֱלֹהִים אֱמֶת וְאָמֵן עַל־יָדֵינוּ לִכְבוֹד אֱלֹהִים׃
21 כא כִּי־אֱלֹהִים הוּא אֲשֶׁר הֲקִימָנוּ בַמָּשִׁיחַ עִמָּכֶם וַיִּמְשְׁחֵנוּ בְּמִשְׁחַת קַדְשׁוֹ׃
22 כב וְגַם־הָיָה לָנוּ לְמַחְסֶה עֹז וְאֶת־רוּחוֹ נָתַן בְּלִבֵּנוּ לְעֵרָבוֹן לָנוּ׃
23 כג וַאֲנִי לֵאלֹהִים אֶקְרָא לְעֵדוּת לִי כִּי מֵחֶמְלָתִי עֲלֵיכֶם לֹא־בָאתִי אֶל־קֹרִנְתּוֹס עַד־עָתָּה׃
24 כד כִּי לֹא לְהִשְׂתָּרֵר עַל־אֱמוּנַתְכֶם הִנֵּנוּ כִּי אִם־רַק כַּחֲבַרִים לְהַגְדִּיל טוּבְכֶם אֲשֶׁר בֶּאֱמוּנָה אַתֶּם חַיִּים׃