1 א פּוֹלוֹס שְׁלִיחַ יֵשׁוּעַ הַמָּשִׁיחַ עַל־פִּי דְבַר הָאֱלֹהִים מוֹשִׁיעֵנוּ וְעַל־פִּי הָאָדוֹן יֵשׁוּעַ הַמָּשִׁיחַ תִּקְוָתֵנוּ׃
2 ב אֶל־טִימוֹתִיּוֹס בְּנִי כְּבֵן מֵחֲלָצַי מִמְּקוֹר אֱמוּנָה חֶסֶד רַחֲמִים וְשָׁלוֹם לְךָ מֵאֵת אֱלֹהִים אָבִינוּ וּמֵאֵת יֵשׁוּעַ הַמָּשִׁיחַ אֲדֹנֵינוּ׃
3 ג בְּלֶכְתִּי לְמַקְדּוֹנְיָא בִּקַּשְׁתִּיךָ לָשֶׁבֶת בְּאֶפְסוֹס לְצַוֹּת עַל־אֲנָשִׁים אֲחָדִים לְבִלְתִּי יוֹרוּ תּוֹרָה נָכְרִיָּה׃
4 ד וְלֹא יִתְעַסְּקוּ בְדִבְרֵי אַגָּדָה וּבְתוֹלְדוֹת הַדֹּרוֹת חִשְּׁבֹנוֹת לְאֵין־קֵץ הַנֹּתְנִים יָדַיִם לְהִתְוַכֵּחַ וְלֹא לְחַזֵּק בֵּית־אֱלֹהִים בָּאֱמוּנָה׃
5 ה כִּי־תַכְלִית מִצְוַת הַתּוֹרָה הִיא אַהֲבָה בְּלֵב טָהוֹר בְּרוּחַ נָכוֹן וּבֶאֱמוּנָה נְקִיָּה מִכָּל־סִיג׃
6 ו אַךְ יֵשׁ אֲשֶׁר נָטוּ מִנִּי־אֹרַח וַיֵּלְכוּ אַחֲרֵי הֶהָבֶל׃
7 ז יִתְאַמְּרוּ לִהְיוֹת מוֹרִים בַּתּוֹרָה וְלֹא־יָבִינוּ אֵת אֲשֶׁר יְדַבֵּרוּן וְלֹא אֶת־הַדָּבָר אֲשֶׁר עָלָיו יַחְלֹטוּן׃
8 ח הֵן הַתּוֹרָה יָדַעְנוּ כִּי טוֹבָה הִיא אִם־יֵלֵךְ הָאָדָם בִּנְתִיבֹתֶיהָ כַּמִּשְׁפָּט׃
9 ט וְהוּא יָבִין כִּי תוֹרָה נְתוּנָה לֹא לְאַנְשֵׁי צֶדֶק כִּי אִם־לִבְנֵי בְלִיַּעַל מֹרְדִים פּשְׁעִים וְחַטָּאִים עֹשֵׂי תוֹעֵבָה וּנְבָלָה מַכֵּי אָב וְאֵם אוֹ מְרַצְּחִים׃
10 י נֹאֲפִים וְשֹׁכְבִים אֶת־זָכָר גֹּנְבֵי נֶפֶשׁ בָּנִים כֶּחָשִׁים וְנִשְׁבָּעִים לַשָּׁקֶר וְעוֹד אֲחֵרִים כְּמוֹהֶם מַמְרִים בְּתוֹרַת חַיִּים׃
11 יא כְּפִי בְּשׁרַת כְּבוֹד הָאֱלֹהִים בָּרוּךְ הוּא אֲשֶׁר הִפְקִיד בְּיָדִי׃
12 יב וּלְיֵשׁוּעַ הַמָּשִׁיחַ אֲדֹנֵינוּ הַמְאַזְּרֵנִי חַיִל אֶתֵּן תְּהִלָּה כִּי מָצָא אֶת־לְבָבִי נֶאֱמָן לְפָנָיו וַיַּקְרֵב אֹתִי לְשָׁרְתוֹ׃
13 יג אָנֹכִי אֲשֶׁר מְגַדֵּף הָיִיתִי לְפָנִים מְרַדֵּף וּמְחַבֵּל אַךְ רֻחַמְתִּי כִּי עָשִׂיתִי בִשְׁגָגָה בִּבְלִי־אֱמוּנָה׃
14 יד וַיִּגְדַּל חֶסֶד אֲדֹנֵינוּ עָלַי עַד־מְאֹד וֶאֱמוּנָה וְאַהֲבָה בְּיֵשׁוּעַ מְשִׁיחֵנוּ׃
15 טו אֱמֶת הַדָּבָר וְיָאֲתָה לְכָל־אָדָם לְקַבְּלוֹ כִּי יֵשׁוּעַ הַמָּשִׁיחַ בָּא אֶל־הָאָרֶץ לְהוֹשִׁיעַ אֶת־הַחַטָּאִים וְאָנֹכִי הָרֹאשׁ לָהֶם׃
16 טז וּבַעֲבוּר זֹאת רֻחַמְתִּי לְמַעַן יְגַלֶּה בִּי יֵשׁוּעַ הַמָּשִׁיחַ רִאשֹׁנָה אֶת־כָּל־אֹרֶךְ רוּחוֹ לִהְיוֹת לְמוֹפֵת לַבָּאִים אַחֲרַי אֲשֶׁר יַאֲמִינוּ בוֹ לְחַיֵּי עוֹלָם׃
17 יז וּלְמֶלֶךְ עוֹלָם שֹׁכֵן עַד אֲשֶׁר עַיִן לֹא תְשׁוּרֶנּוּ הוּא אֱלֹהִים אֶחָד וְהֶחָכָם לְבַדוֹ לוֹ הַגְּדֻלָּה וְהַתִּפְאֶרֶת מֵהָעוֹלָם וְעַד־הָעוֹלָם אָמֵן׃
18 יח אֶת־הַמִּצְוָה הַזֹּאת אֲנִי מְצַוְּךָ הַיּוֹם טִימוֹתִיּוֹס בְּנִי כַּאֲשֶׁר דִּבְּרוּ עָלֶיךָ הַנְּבוּאוֹת מֵאָז אֲשֶׁר עַל־פִּיהֶן תִּלָּחֵם מִלְחֶמֶת צֶדֶק׃
19 יט כִּי תַחֲזִיק בֶּאֱמוּנָה וּבְרוּחַ נָכוֹן וְלֹא כַאֲנָשִׁים אֲשֶׁר הָיְתָה רוּחַ אַחֶרֶת אִתָּם וָאֳנִיַּת אֱמוּנָתָם נִשְׁבְּרָה׃
20 כ וּמֵהֶם הוּמְנִיּוֹס וַאֲלֶכְסַנְדְּרוֹס אֲשֶׁר הִסְגַּרְתִּים בְּיַד הַשָּׂטָן לְמַעַן יִוָּסְרוּ וְלֹא יְגַדְּפוּ עוֹד׃