1 Omuwuluko ogubawaire abʼeibyaire lya Yusufu, gwatandikiire ku Mwiga oYoludaani okumpi nʼe Yeriko, e buzwaisana wʼensulo egyʼamaizi egyʼe Yeriko, ni guniinaniina okuzweraawo ni gubita omwidungu ni guwulukira omu kyalo ekyʼensozisozi ekyʼe Bbeseri.
2 Ni gweyongerayo okuzwera e Bbeseri nga niikyo oLuuzi ni gusala okwaba omwAtaloosi, ekyalo kyʼaBaaluki,
3 awo ni gwikirira e bugwaisana, ni gwaba omu kyalo kyʼaBayafuleeti, okutuukira nakimo oku kitundu kyʼe Bbesi Koloni eKyʼansi nʼoku Gezeri, ni gukoma oku Nyanza oMeditereniani.
4 Batyo oManase nʼEfulaimu, abʼeibyaire lya Yusufu ni basuna omuwuluko ogwabwe.
5 Gunu niigwo omuwuluko ekika kyʼEfulaimu ogukyasunire okusinzirira oku miryango gyakyo:
6 era ni yeeyongera paka ku nyanza oMeditereniani. Okuzwera e Mikimesasi e mambuka, nʼegeda okusimba e buzwaisana nʼeyaba e Taanasi Siiro, nʼebitawo nʼeyaba e Yanowa ekiri e buzwaisana.
7 Awo nʼeserengeta okuzwa e Yanowa nʼeyaba Ataloosi nʼe Naala, ni yeeguunya oku Yeriko, nʼewulukira oku Yoludaani.
8 Okuzwa e Tapuwa ensalo nʼesimba e bugwaisana, okwaba oku Mwiga oKaana, nʼekoma oku nyanza oMeditereniani. Ogwo niigwo omuwuluko ogubawaire ekika kyʼEfulaimu okusinzirira oku miryango gyakyo.
9 Era okwo nʼogaitaku nʼebibuga nʼebyalo ebibyeruguuliriirye ebibakiwaire okuzwa oku muwuluko gwʼekika kya Manase.
10 Cooka tibabbingiremu aBakanani ababbaire omu Gezeri; paka lwatyanu aBakanani batyama omu Beefulaimu neye basuukire bagalama kukoleranga Beefulaimu mirimo.