1 पेन्तिकोसए त्हिंइर खमा, येशूए फिर बिश्वास लब्मैं ताँन् क्ल्ह्यो घ्रिर खागु तल।
2 च त्हेर्न स्वर्गउँइँले तिखेर्न थेबै खैं खब् धों तसि चमैं टिबै धिं न्हों ताँन् प्लिंयाँइ।
3 झाइले मिए ले धों तबै सै चमैं ङाँर म्रोंयुसि चमैं ताँनए फिर टिइ।मिले धों तबै पबित्र प्ल्ह युबा|src="CN01890c.png" size="col" loc="br" ref="२:३"
4 छतमा चमैं ताँन् परमेश्वरए पबित्र प्ल्हजी प्लिंयाँइ, धै पबित्र प्ल्हजी पिंबै शक्तिउँइँले चमैंइ स्यो-स्योबै क्युइर पोंबर होंइ।
5 स्वर्गए न्होंर मुँबै ताँन् ह्युलउँइँले परमेश्वर म्हाँदिबै यहूदीमैं च त्हेर यरूशलेमर टिल।
6 छाबै कै थेसि ल्हें म्हि चर खागु तइ, झाइले चमैं प्लेटोयाइ तलेबिस्याँ ताँनइ खें-खेंमैंए क्युइर पोंरिब थेइ।
7 झाइले चमैं ताँन् बेल्ले प्लेटोयासि, “चु पोंब्मैं ताँन् गालीलथेंमैंन् आङिं वा?” बिसि बिबर होंइ।
8 “खैले चुमैं ताँनइ ङ्योए ह्रोंसए क्युइर्न पोंरिब ङ्योइ थेइमुँ?
9 ङ्यो चुर पार्थीमैं, मादीमैं, एलामीमैं, मेसोपोटामियाथेंमैं, यहूदीयाथेंमैं, कापाडोकियाथेंमैं, पोन्टसथेंमैं नेरो एशियाथेंमैं मुँ।
10 झाइले फ्रिगिया, पामफिलिया, मिश्र नेरो कुरेनी चेंदोले मुँबै लिबियार्बै ल्हें क्ल्ह्योउँइँले खब्मैं नेरो रोम ह्युलउँइँले खबै यहूदी नेरो यहूदीमैंने क्ह्रिब्मैं ङ्हिना ङ्हिन् मुँ।
11 झाइले क्रेटथेंमैं नेरो अरबीमैं या चुर मुँ। चमैंइ परमेश्वरए थेबै केमैंए बारेर पोंरिब ङ्योइ ह्रों-ह्रोंसए क्युइर थेरिइमुँ!”
12 चमैं ताँन् अलमल् तसि प्लेटोयाइ, धै घ्रिइ-घ्रिने “चुए अर्थ तो जा?” बिबर होंइ।
13 दिलेया अरूमैंइ नि लसि बिइ, “चुमैं प्हाइ म्हेरइमुँ।”
14 पत्रुसइ अरू कुल्मिंबै चेला चिब्मैं च्युसे घ्रिने बालुन् रासि थेबै कैले चर्बै म्हिमैंने बिइ, “ओ यहूदीयार्बै म्हिमैं, नेरो ताँन् यरूशलेमथेंमैं, क्हेमैंइ ङए ताँ छेनाले थेसि चु ताँ क्होद्।
15 क्हेमैंइ मैंब् धोंले चुमैं प्हाइ आम्हेरइमुँ, तलेबिस्याँ तोगो न्हाँगर्बै कु मत्त्रे ह्राइमुँ।
16 योएल अगमबक्ताइ स्योमा बिबै ताँ चुन् ग:
17 ‘नुखबै त्हिंइजरे छ तब्मुँ बिसि परमेश्वरजी बिइमुँ,
18 ओं, च त्हिंइर ङइ ह्रोंसए सेवा लब्मैंए फिर
19 ङइ मुर औदिबै केमैं,
20 याहवेहए थेबै ह्वे चारबै त्हिंइ खब् भन्दा ओंसों
21 दिलेया याहवेहए मिं किंब्मैंइ मुक्ति योंब्मुँ।’
22 “ओ इस्राएलीमैं, चु ताँ थेद्, नासरतथें येशू परमेश्वरजी कुल्मिंबै म्हि मुँन बिब क्हेमैंइ सेरिगे नेरो क्होरिगे बिसि परमेश्वरजी येशूउँइँले शक्तिए केमैं, प्लेटोयाबै केमैं, नेरो चिनुमैं उँइँमिंसि क्हेमैंए म्हाँजोरि प्रमाण पिंल् खाँइमुँ। खीजी चु केमैं लब क्हेमैंइ सेइमुँ।
23 दिलेया परमेश्वरजी ओंसोंन् चाँजो लसि येशूलाइ क्हेमैंए योर पिंवाँइ। धै दुष्ट म्हिमैंउँइँले क्हेमैंइ येशू क्रूसर च्योवासि सैवाइ।
24 सैवालेया परमेश्वरजी खी सिबउँइँले धबै सोगों लमिंइ। तलेबिस्याँ खी सिबै सिबन् तल् आखाँमल।
25 चु ताँर दाऊदइ या येशूए बारेर छले बिइमुँ,
26 छतसि ङ खों न्होंर सैं तोंरिमुँ,
27 तलेबिस्याँ क्हिजी ङए प्ल्ह क्रोंर्न वाथेंरिब् आरे,
28 क्हिजी ङने छ्ह योंबै घ्याँ उँइँमिंइ,
29 “ओ अलि-अङाँमैं, ङ्योए खे दाऊदए बारेर क्ह्रोंसेंन्ले ङइ क्हेमैंने बिल् खाँम्। खी सिइ धै पावाइ, खीए छगों तिंयाँ समन् मुँ।
30 दिलेया दाऊद अगमबक्ता तबइले परमेश्वरजी फैबै बाछा धोंलेन् चए सन्तानउँइँले म्हि घ्रि चए क्ल्ह्योर म्रुँ तल् पिंब्मुँ बिसि खिइ ओंसोंन् था सेल।
31 छतसि परमेश्वरजी कुल्मिंबै म्रुँ ख्रीष्ट सिसि धबै सोगों तबै बारेर दाऊदइ ओंसों ओंनोंन् म्रोंबइले खिइ चु ताँ प्ह्रिथेंइ,
32 चुन् येशू परमेश्वरजी सिबउँइँले सोगों लमिंइ। चु ताँए साक्षि ङि ताँन् मुँ।
33 परमेश्वर आबाजी येशूलाइ थेब् लमिंसि खीए क्योलोउँइँ थेंइँमुँ। धै ह्रोंसजी बाछा फैब् धोंले येशूलाइ पबित्र प्ल्ह पिंइ। च पबित्र प्ल्ह प्रभु येशूजी तोगो ङिए फिर कुमिंब् ग। चु ताँमैं क्हेमैंइ तोगो थेइमुँ, म्रोंइमुँ।
34 तलेबिस्याँ स्वर्गर क्रेयाबै म्हि दाऊद आङिंल, दिलेया दाऊदइ ह्रोंसैन बिइ,
35 ङइ क्हिए शत्तुरमैं क्हिए प्हले न्होंर आलन् समा
36 छतसि तारे इस्राएलर्बै ताँन् म्हिमैंइ चु ताँ छेनाले क्होरिगे: क्हेमैंइ क्रूसर च्योवाबै चु येशून् परमेश्वरजी ताँन् म्हिमैंए प्रभु नेरो जोगेमिंबै म्रुँ ख्रीष्ट लमिंइँमुँ।”
37 चु ताँ थेसि चमैंए सैंर खैला तोला तइ। धै चमैंइ पत्रुस नेरो अरू कुल्मिंबै चेला चिब्मैंने “ओ आघें-अलिमैं, तारे ङिइ तो लले?” बिसि ङ्योएइ।
38 पत्रुसइ बिइ, “ङिइ आछ्याँबै केमैं लना बिसि क्हेमैं ताँनइ ह्रों-ह्रोंसए आछ्याँबै केमैं पिसि परमेश्वरउँइँ सैं एद्, धै क्हेमैंए पाप क्षमा तबै ल्हागिर येशू ख्रीष्टए मिंर बप्तिस्मा किंन्। छलमा परमेश्वरउँइँले क्हेमैंइ पबित्र प्ल्हए बरदान योंब्मुँ।
39 परमेश्वरजी ‘पबित्र प्ल्ह पिंब्मुँ’ बिसि फैबै बाछा क्हेमैंए ल्हागिरि, क्हेमैंए सन्तानए ल्हागिरि, नेरो अरू ह्रें-ह्रेंगो मुँबै अरू ह्रेंर्बै म्हिमैंए ल्हागिरि ग। ङ्योए प्रभु परमेश्वरजी हुइब्मैं ताँनए ल्हागिर च बाछा फैइमुँ।”
40 छतसि “चु दुष्ट पुस्ताउँइँले क्हेमैंइ ह्रोंसलाइ जोगेद्,” बिसि पत्रुसइ अरू ल्हें ताँउँइँले चमैंलाइ क्होमिंइ।
41 झाइले पत्रुसए ताँ क्वेंबै म्हिमैंइ बप्तिस्मा किंइ। च त्हिंइर्न योदा आयोदा हजार सोंदे म्हिमैं चमैंए फिर थब्दिइ।
42 चमैं प्रभु येशूए फिर बिश्वास लसि कुल्मिंबै चेला चिब्मैंने लोदै, संगति लदै, बालुन् चब् चसि प्रभु भोज चदै, खोंयोंन् बिलै प्राथना लरिमल।
43 कुल्मिंबै चेला चिब्मैंइ ल्हें औदिबै केमैं लदै ल्हें चिनुमैं उँइँमल। छतसि ल्हें म्हि परमेश्वरने ङ्हिंबर होंइ।
44 येशूए फिर बिश्वास लब्मैं ताँन् बालुन् टिमल, धै चमैंने मुँबै तोन्दोंरि सैमैं गमस्तर तमल।
45 चमैंइ ह्रोंसए क्ल्ह्यो न्हें नेरो अरू सैमैं चुँसि योंबै मुइ खाँचो तब्मैंलाइ चुमिंमल।
46 चमैं त्हिंइ ह्रोंसे मन्दिरर खागु तमल, धै धिं-धिंर चमैं सैं घ्रिले प्रभु भोज चसि सैं तोंदै बालुन् चब् चब्रें लमल।
47 झाइले परमेश्वरए मिं क्वेदै, ताँन् म्हिमैंउँइँले मान योंमल। धै प्रभुजी त्हिंइ ह्रोंसे जोगेमिंबै म्हिमैं चमैंए फिर थप्दिमिंब्रें लमल।