1 “सार्डिस नाँसर्बै बिश्वासीमैंलाइ लोदा सैंदा लबै ल्हागिर चर्बै चिबए मिंर चु ताँ प्ह्रिद् बिसि येशूजी यूहन्नाने ल्हैदिइ:
2 छतसि रेसि न्ह क्रों मि क्रों तद्, झाइले न्होंयाबै केमैं क्योंएँन्। तलेबिस्याँ क्हेमैंइ लबै केमैं ङए परमेश्वरए उँइँर ठिक आतब ङइ म्रोंइमुँ।
3 छतसि क्हेमैंइ तो लोइ, तो थेइ, च ताँ मैंन्। च ताँइ बिब् धोंले के लसि पाप लबउँइँले सैं एद्। क्हि न्ह क्रों मि क्रों आतइबिस्याँ ह्यो खब् धोंले क्हेमैंइ था आसेल्ले ङ युब्मुँ।
4 दिलेया क्हेमैं सार्डिसथेंमैं न्होंरि को-कोइ म्हिमैंइ क्वेंर क्ह्रि ङ्हाँल् आलब् धोंले पापउँइँले स्योसि छ्याँबै के लइमुँ। चमैं ङने प्रबै लायकर्बै तसि चमैं फोस्रे ब्योंबै क्वें खिसि ङने प्रब्मुँ।
5 “शैतान दुष्टए फिर ट्होगों तब्मैंलाइ ङइ फोस्रे ब्योंबै क्वें खिमिंब्मुँ। झाइले छ्ह योंब्मैंए मिं प्ह्रिथेंबै कितबउँइँले ङइ चए मिं मेटिरिब आरे। ङए आबाए उँइँर नेरो खीए स्वर्गदूतमैंए उँइँर ‘च ङल् ग’ बिसि ङइ ग्वाइ पिंब्मुँ।
6 “पबित्र प्ल्हजी बिश्वासीमैंने बिबै ताँ न्ह मुँब्मैंइ छेनाले थेरिगे।
7 “फिलाडेल्फिया नाँसर्बै बिश्वासीमैंलाइ लोदा सैंदा लबै ल्हागिर चर्बै चिबए मिंर चु ताँ प्ह्रिद् बिसि येशूजी यूहन्नाने ल्हैदिइ:
8 क्हेमैंइ लबै केमैं ङइ सेइमुँ। क्हेमैंने भों ल्हें आरेलेया क्हेमैं ङइ लोमिंब् धोंले प्रइमुँ, धै ङलाइ आपिइमुँ। ङइ क्हेमैंए ल्हागिर म्रा थोंथेंइमुँ, च म्रा खाबज्यै तोरल् आखाँ।
9 थेद्, को-कोइ दुष्टए न्होंर टिब्मैंइ ‘ङ यहूदी ग’ बिम् दिलेया चमैं क्ह्रोंसेंन्बै यहूदी आङिं। च स्योर्गुमैंलाइ ङइ क्हेमैंए प्हले फ्योबर ल्हैदिब्मुँ। झाइले ङइ क्हेमैंलाइ म्हाँया लरिमना बिब चमैं ताँनइ था सेब्मुँ।
10 पृथ्बीर्बै ताँन् म्हिलाइ जाँच लबर दुःख तबै त्हे खब्मुँ। दिलेया ङइ ‘ढुक्कले सैदिद्’ बिमा क्हेमैंइ ङिंइ, छतसि च जाँच लबै त्हेर खबै दु:खउँइँले ङइ क्हेमैंलाइ जोगेमिंस्यो।
11 ङ युनन् युम्। क्हेमैंइ ट्होसि योंल् त्हुबै इनाम खाबज्यै क्हेमैंउँइँले प्हेंइ बोल् आखाँरिगे बिसि क्हेमैंइ तो ताँर बिश्वास लइमुँ, च ताँर्न अझै छेनाले बिश्वास लद्।
12 “ट्होबै म्हिमैंलाइ ङइ ङए परमेश्वरए मन्दिरर्बै त्हो लमिंम्। झाइले चमैं मन्दिरउँइँले बैरु त्होंल् आत्हु। चमैंए ङ्होर ङइ ङए परमेश्वरए मिं प्ह्रिमिंब्मुँ, झाइले स्वर्गउँइँले क्युरु युबै परमेश्वरए छारा यरूशलेम बिबै सहरए मिं प्ह्रिमिंब्मुँ, झाइले ङए छारा मिं या च म्हिमैंए ङ्होर ङइ प्ह्रिमिंब्मुँ।
13 “पबित्र प्ल्हजी बिश्वासीमैंने बिबै ताँ न्ह मुँब्मैंइ छेनाले थेरिगे।
14 “लाउडिकिया नाँसर्बै बिश्वासीमैंलाइ लोदा सैंदा लबै ल्हागिर चर्बै चिबए मिंर चु ताँ प्ह्रिद् बिसि येशूजी यूहन्नाने ल्हैदिइ:
15 क्हेमैंइ लबै ताँन् के ङइ सेइमुँ। क्हेमैंए बिश्वास ललै आरे, ङ्युँबै आरे। क्हेमैं तो तलेया तिथु तस्याँ तमल।
16 दिलेया क्हेमैंए बिश्वास हलहलु तब् मत्त्रे मुँ, ललै आरे, ङ्युँबै आरे। छतसि ङइ क्हेमैंलाइ थुइवाब्मुँ।
17 क्हेमैंइ ‘ङ प्लब मुँ, ङलाइ तोए सैरै या खाँचो आरे,’ बिम्। दिलेया ह्रोंस् ङ्हो आसब, ङ्हाँदु, मि आम्रोंब, क्लुना मुँ बिब क्हेमैंइ था आसे।
18 छतसि ङइ क्हेमैंलाइ चु सल्ला पिंम्: क्हि प्लब् तबै ल्हागिर मिर खारदिबै छ्याँबै मारा ङउँइँले किंन्, म्हिमैंइ क्हेमैंलाइ क्लुना तब् आम्रोंरिगे बिसि खिबै ल्हागिर ङउँइँले फोस्रे ब्योंबै क्वें किंन्, झाइले क्हिए मि म्रोंरिगे बिसि ङउँइँले मि म्रोंल् लबै मैं किंसि फोद्।
19 म्हाँया लब्मैंलाइ ङइ हौदिमुँ, धै तार झोंम्। छतसि भों लसि क्हिइ लबै पापउँइँले सैं एद्।
20 थेद्, ङ म्रार रासि हुइमुँ। खाबज्यै या ङए कै थेसि म्रा थोंस्याँ ङ न्होंर खब्मुँ, धै चने बालु चब्मुँ, चै या ङने बालुन् चब्मुँ।ङ म्रार रासि हुइमुँ|alt="Jesus standing at the door, calling" src="DCC David Cook??" size="col" ref="3:20"
21 “शैतान दुष्टए फिर ट्होगों तब्मैंलाइ ङइ ङए राजगद्दिर ङने बालुन् क्हुँल् पिंब्मुँ। ङज्यै या ट्होसि ङए आबाने खीए राजगद्दिर क्हुँल् योंब् धोंलेन् ट्होबै म्हि या ङने बालुन् क्हुँल् योंब्मुँ।
22 “पबित्र प्ल्हजी बिश्वासीमैंने बिबै ताँ न्ह मुँब्मैंइ छेनाले थेरिगे।”