1 Xeretarã kuery, pejapyxaka ke xee rombo'e ramo.
2 Xeayvu 'rã mba'emo re ambojojaa rupi.
3 Mba'emo nhanderu kuery nhandevy omombe'u rã
4 ha'e nungakue nanhamombe'u e'ỹi 'rã nhandera'y kuery pe.
5 Ha'e ae oeja raka'e oayvu Jacó kuery pe,
6 ikuai jevy va'e kuery voi oikuaa aguã,
7 Nhanderuete re ojerovia aguã,
8 tamoĩ kuery ikuaiague rami e'ỹ ikuai aguã,
9 Efraim ra'y kuery guyrapa reve-reve ikuai raka'e va'eri
10 Ojepe'apa Nhanderuete guexeve guarã ojapo va'ekue gui,
11 Hexaraipa okuapy hembiapokue
12 Nhomondyipaarã tamoĩ kuery renonde ojapo teĩ,
13 Ye'ẽ omboja'o vy omboaxapa heravy ha'e va'e rupi,
14 Ara py peteĩ arai ojekuaa va'e rupi ogueraa,
15 Tekoa e'ỹa py itaova ombovo vy
16 Ita gui omoẽ yy oxyry atã va'e,
17 Ha'e rami teĩ ha'e kuery ojejavy tema okuapy henonde.
18 Opy'a py Nhanderuete pe “Taexa” he'ia rupi ikuai.
19 Nhanderuete re ijayvu vy aipoe'i okuapy:
20 Ita re ombota uka vy ha'e va'e gui yy omboxyry va'ekue
21 Ha'e nunga Senhor oendu vy ojou vai.
22 Mba'eta ha'e kuery ndojeroviai Nhanderuete re,
23 Ha'e rami teĩ yva pe ha'e ijayvu vy
24 Ojapo ha'e kuery áry ho'a aguã maná ho'u aguã.
25 ha'e ramo peteĩ-teĩ ho'u okuapy mbojape anjo kuery rembi'u regua.
26 Ha'e gui ojapo yva gui yvytu kuaray oẽa katy gui oipeju aguã rami,
27 Ha'e rami vy xo'o ju ombou ha'e kuerya py yvy ku'i rami,
28 Ojapo ha'e kuery ikuaia mbyte ho'a aguã rami,
29 Ha'e ramo ho'u okuapy hevyatãmba peve,
30 Ha'e rami teĩ ha'e kuery nonhandu kuaavei.
31 Nhanderuete oexa uka opoxya ha'e kuery rovai.
32 Ha'e rami rire teĩ ha'e kuery ojejavy riae tema,
33 Ha'e nunga rupi ha'e ojapo ha'e kuery oikovea yvytu rami rive oaxapa vyvoi aguã rami,
34 Ojukapa ta ma ramo mae ma ojapukai okuapy ixupe,
35 Ima'endu'a ju Nhanderuete ha'e kuery pegua itaova oikoa re,
36 Ha'e rami teĩ ixupe ojapukai vy ijayvu porã merami rive okuapy,
37 Mba'eta opy'a py ndojerovia etei,
38 Ha'e rami teĩ Nhanderuete nhomboaxy va'e vy
39 Ima'endu'a ha'e kuery to'o rive ikuaia re,
40 Ha'e rami teĩ mbovykue rei e'ỹ hexe opu'ã rei okuapy tekoa e'ỹa py,
41 Nhanderuete pe “Taexa” he'i jepi,
42 Na'ima'endu'avei okuapy ipo'akaa re,
43 neĩ Egito yvy re hexa pyrã ojapoague re,
44 Mba'eta ha'e py yakã oĩ va'e tuguy ju ojapo va'ekue,
45 Ha'e kuerya py ombou heta mberu oixu'upa aguã,
46 Ha'e kuery mba'emo omono'õ 'rã va'ekue omboaxapa yxo rembi'urã,
47 Amandau ombou vy omomba va'ekue ha'e kuery uva ty,
48 Amandau py omomba hymba vaka kuery,
49 Ha'e kuery pe oexa uka opoxya,
50 Opoxya rupi ete oiko va'ekue,
51 Ojukapa Egito pygua ra'y kuery jypyguare ha'e javi,
52 Ha'e rã ojeupegua kuery ma oipe'apa vexa'i rami,
53 Oguereko porã ramo okyjea noendui okuapy.
54 Ogueraa yvy iky'a e'ỹ va'e katy,
55 Ha'e kuery renonde gui omoxẽmba ha'e va'e yvy pygua kuery,
56 Ha'e rami teĩ Nhanderuete Yvate ete va'e pe “Taexa” he'i ju okuapy,
57 Tamoĩ kuery ikuaiague rami ete ojepe'apa,
58 Mba'eta yvy'ã rupi ombojerovia atyrã ojapo vy
59 Ha'e nunga Nhanderuete oendu vy ipoxy.
60 Noĩvei ombojeroviaaty Siló tetã py oĩ va'e py,
61 Lei ryru ipo'akaa kuaa ukaa voi ogueraa uka amboae yvy katy,
62 Ojeupegua kuery omboaxapa kyxe py ijukaarã pe,
63 Ha'e ramo kunumigue tata omomba ramo
64 Sacerdote kuery voi kyxe py ojukapaa rã
65 Ha'e gui mae Senhor oikuaa pota okeague gui omyĩ va'e rami,
66 Ha'e vy ngovaigua kuery ojuka vy omboguevi atãmba,
67 Ha'e gui huvixarã ma José ramymino kuery va'e regua ndoiporavoi,
68 Ha'e rami 'rãgue py Judá regua oiporavo,
69 Ha'e áry ojapo ojeupegua henda iky'a e'ỹ va'e yva rami ete oĩ atã va'erã,
70 Ha'e rami vy oiporavo guembiguai Davi
71 Vexa'i re opena oikovya gui ogueru vy
72 Ha'e ramo opena oikovy anhetẽ rupi ipy'a va'e vy,