1 Xeruete, xereraa jepe xerovaigua kuery gui.
2 Xereraa jepe teko vai apoa kuery gui,
3 Mba'eta ha'e kuery ma nhuã ojayvy xerekove oipe'a aguã.
4 Mba'eve py atekoavy ramo e'ỹ ha'e kuery ojapura xemoingo axy aguã.
5 Ndee ma Senhor Xeruete ixondaro reta va'e,
6 Ha'e kuery ma pytũ ma ramo onhendu okuapy jagua rami
7 Opa marã onhendu okuapy.
8 Ha'e rã Senhor, ndee repuka 'rã ha'e kuery re.
9 Xemombaraetea, ndee ae roarõ va'e,
10 Xeruete xemboaxy vy ou 'rã xembojoyvyarã.
11 Ha'e rami avi ejukapa eme guive, xejavegua kuery hexaraipa e'ỹ aguã.
12 Tove ha'e kuery onhemboyvatea rupi ae to'apa
13 Emokanhy ndepoxya rupi, emokanhymba,
14 Pytũ ma ramo jagua rami ha'e kuery onhendu okuapy
15 Opa rupi ikuai ho'u va'erã oeka va'e rami,
16 Ha'e rã xee ma aporaei 'rã ndepo'akaa re.
17 Ha'e nunga rupi Xemombaraetea, ndevy pe aporaei 'rã aikovy.