1 Xeruete, Xeruete, mba'e re tu xereja ri?
2 Xeruete, ára py ajapukai ramo naxembovai,
3 Ha'e rami teĩ ndee ma iky'a e'ỹ va'e reiko.
4 Oreramoĩ kuery ma ndere ojerovia raka'e.
5 Ndevy pe ha'e kuery ojapukai ramo reo jepe raka'e.
6 Ha'e rã xee ma taxo, ava e'ỹ merami,
7 Xerexaa kuery ha'e javi xejojai rei.
8 “ Senhor re rejerovia ramo tanderepy.
9 Ha'e rami teĩ ndee ma xetui'i aguã rami xeapo va'ekue.
10 Xetui'i guive ndevy aiko.
11 Aỹ ma enhemombyry eme xegui,
12 Heta ikuai toro nharõ rami xejoko va'e,
13 Xere ha'e kuery ijuru jai,
14 Yy rami anheẽ,
15 Yapo guigua pẽgue ipirupaa rami
16 Jagua kuery xembojere rei okuapy,
17 Aexapa xekãgue ha'e javi'i.
18 Xeao jomeme omboja'opa ma.
19 Ha'e rã ndee Senhor, ejepe'a eme xea gui.
20 Eraa jepe xerekove ha'e kuery kyxe gui,
21 Xereraa jepe ke guary juru gui,
22 Ha'e rami rire xeryvy kuery oendua py xema'endu'a 'rã nderery re,
23 “ Senhor renonde pejererokyjea rupi pendekuai va'e, peroporaei.
24 Mba'eta ha'e naxemboaxy e'ỹi ajexavai rã,
25 Mba'eta ndegui ae ou ijaty va'e kuery mbyte xee rogueroporaei aguã.
26 Ha'e ramo iporiaukue'i okaru 'rã okuapy hevyatãmba peve.
27 Ha'e nunga rupi yvy apy peve ima'endu'aa 'rã Senhor re,
28 Mba'eta Senhor pegua ae ipo'aka aguã.
29 Yvy regua oguerekopa rei va'e kuery voi okaru vy ombojerovia 'rã okuapy.
30 Tamymino kuery voi ha'e oipotaa rami 'rã ikuai.
31 Ha'e kuery ou vy omombe'u 'rã ixuguigua teko porã.