1 Ha'e ramo Jó ombovai vy aipoe'i:
2 — Anhetẽ, xee voi aikuaa rã ha'e rami ae.
3 Mba'eta xapy'a rei hexeve avakue nhombojovake ramo
4 Ha'e ma opy'a py oikuaapa ha'e ipo'akapave va'e.
5 Ha'e ma oipe'a 'rã yvyty ikuai va'e oikuaa okuapy e'ỹ re.
6 Ha'e ma yvy omomyĩ vy oguerova 'rã oĩa gui,
7 Kuaray pe ha'e ijayvu rã ndojopevei 'rã.
8 Ha'e ae'i oipyo va'ekue yva,
9 Ha'e ma jaxy-tata apoare: Ursa, Hendy guaxu va'e,
10 Ha'e ma mba'emo tuvixa va'e oikuaapy e'ỹ apoa,
11 Ma'ẽ, xapy'a rei xeyvy'iry rupi ha'e oaxa rã xee ndaexai 'rã.
12 Mba'emo ha'e oipe'a ta ramo mava'e tu ojoko 'rã?
13 — Nhanderuete ma nomboaxa rivei 'rã opoxya.
14 Ha'e ramo mba'exa tu xee ambovai ta?
15 Xee xereko porã va'e rire teĩ ixupe ma ndaxeayvu kuaai 'rãgue.
16 Hery rupi ajapukai rã ombovai teĩ
17 Mba'eta xemou'ũ yvytu atã va'e py,
18 Ha'e ndoejai xepytuẽ aguã rive.
19 Xapy'a rei ipo'akaa re aikuaa potaxe ramo ma ha'e aipoe'i 'rã: “Apy ma aĩ.”
20 Xee ma heko porã va'e aiko va'e rire teĩ xeayvu py ae rive 'rãgue aexa uka xereko vaia.
21 — Ha'e rami avi xee ma anhetẽ rupi xepy'a va'e, xenhe'ẽ py ndajeayvuveikue py aiko,
22 Xevy pe ma opa mba'e peteĩ'i rami meme merami.
23 Mba'emo vai jojuka xapy'a ramo
24 Heko vai va'e kuery po py omboaxaa ma yvy
25 — Xe'ára aikoa ma onha va'e gui oaxa pojavave.
26 Oaxa pojava ovy kanoã jai rogue gui ojapo pyre rami,
27 Xapy'a rei xee aipoa'e 'rã: “Xee xerexarai 'rã ajexavaia re,
28 Ha'e rami va'e rire teĩ haxy aendu va'e xemongyje teri 'rãgue,
29 Ha'e rami vy xembopaga 'rãe.
30 Xapy'a rei yro'y rykukue py ajau,
31 teĩ ndee yapo py ju 'rã xemombo.
32 Mba'eta Nhanderuete ma xee ramigua ava e'ỹ oiko.
33 Ndoikoi orembyte
34 Xe'áry rupi gui yvyra po'i'i ha'e oipe'a,
35 ha'eve 'rãgue akyje e'ỹ re xeayvu aguã.