1 — Ha'e gui Jó, endu ke aikuaa va'e re xeayvu rã,
2 Aỹ ma xeayvu ta,
3 Xeayvua oikuaa uka 'rã xepy'a re anhetẽ va'e anho oĩa,
4 Nhanderuete Nhe'ẽ ae xemoingo va'ekue,
5 Xapy'a rei rembovai kuaa vy ke xembovai,
6 Ma'ẽ, Nhanderuete renonde ma ndee ramigua ae avi aiko,
7 Ha'e ramo xee noromongyjei 'rã,
8 — Anhetẽ xee aendua py ndeayvu rã
9 “Ha'eve va'e aiko, ajejavy va'e'ỹ.
10 “Ma'ẽ, Nhanderuete xembopagaa rupi onhea'ã,
11 Ha'e rami vy yvyra pa'ũ py omboty xepy,
12 Ha'e rami ndeayvuague ha'eve'ỹa ramigua ramo
13 Mba'e re tu ixupe ndeayvu ete vy
14 Ha'e rami 'rãgue py Nhanderuete ma peteĩ rami ijayvu ma vy
15 Nhandevy pe oexa ra'u uka 'rã mba'emo, pyávy mba'emo jaexaa rupi,
16 Nhandeapyxa voi oipe'a vy
17 ojapo aguã nhanhembopy'aa gui jajepe'a aguã rami,
18 yvykua katy nhanderekove oo rã ojoko vy,
19 — Nhanderupa rupi nhandetui ramo nhanembopaga 'rã haxy va'e py,
20 Ha'e ramo jajeguaru 'rã tembi'u gui,
21 Nhandero'o oĩ porã va'ekue aỹ ndojekuaavei.
22 Nhanenhe'ẽ oo tema 'rã yvykua katy,
23 — Xapy'a rei ou 'rã peteĩ anjo nhandere ojerure va'erã, mbovy e'ỹ ikuai va'e regua,
24 Ha'e ramo Nhanderuete nhanemboaxy vy aipoe'i 'rã anjo pe:
25 Ha'e rami rã nhandero'o hexaĩ ju 'rã nhanekyrĩ jave nhanembaraeteague rami,
26 Ha'e ramo jajerure 'rã Nhanderuete pe, ha'e rã nhanepytyvõ 'rã.
27 Ha'e ramo avakue oendua py japoraei reve aipoja'e 'rã:
28 Nhanderuete ojogua xenhe'ẽ yvykua py ooa gui,
29 — Ha'e va'e ha'e javi ma Nhanderuete ojapo
30 yvykua gui nhanderekove ogueru ju aguã,
31 Ha'e nunga rupi Jó, endu ke, ejapyxaka xeayvua re.
32 Ndee ndeayvu aguã rereko ri vy xembovai.
33 Ha'e gui mba'eve ndererekoi ri ramo ejapyxakave tema xeayvua re.