1 ባቢሎኔ ካዎ ናቡካዳናጾሬይ፥ ኢዛ ኦላንቻቲ ኡባይኔ ኢዚ ሃሪዛ ካዎቴ ጋርሳን ዲዛ ካዎቲኔ ዴሬ ኡባይ፥ ዬሩሳላሜኔ ኢዚ ዩሾን ዲዛ ካታማታ ኡባ ኦሊዛ ዎዴ ሃ ቃላይ ጎዳፔ ኤርማሳኮ ዪዴስ።
2 ጎዳ ኢስራኤሌ ጾሳይ፥ «ዩሁዳ ካዎ ሴዴቂያሳኮ ባዳ፥ ‹ታኒ ሃ ካታማዮ ባቢሎኔ ካዎ ኩሼን ኣ ኢማና፤ ኢዚካ ሃ ካታማዮ ታማን ጹጋና።
3 ኔኒ ኢዛ ኩሼፔ ኬሳ ኤካካ፤ ኔኒ ዲኤታናኔ ኢዛስ ኣ ኢሜታና፤ ኔኒ ኔ ኣይፌን ባቢሎኔ ካዎ ቤኣና፤ ኔናራ ኢዚ ቲራን ጋይቲ ሃሳያና፤ ሄሳፌ ጉዬ ኔኒ ባቢሎኔ ቢታ ባና።
4 « ‹ጊዶ ኣቲን ዩሁዳ ካዎ ሴዴቂያሳ! ጎዳ ቃላ ሲያ! ኔኒ ኦላን ሃይቃካ፤
5 ኔኒ ሳሮ ሃይቆ ሃይቃና፤ ኔፔ ሲንን ካዎቲዳ ኔ ኣዋቲ ሃይቂን ኢስቲ ቦንቾስ ታማ ኤዳ ማላ ኔኒ ሞጌቲዛ ጋላሲካ ኢስቲ ኔ ቦንቾስ ታማ ኤና፤ ሂስቲዲ «ዎ! ዎ! ኑ ካዎዞ!» ጊዲ ኔስ ዬካና፤ ሃይሳ ሃ ቃላ ዮቲዳይ ታና ጎዳ› ጌስ ጋዳ ዮታ» ጊዴስ።
6 ሄሳፌ ጉዬ ናቤ ኤርማሲ ሃ ቲንቢቴ ኡባ ዩሁዳ ካዎ ሴዴቂያሳስ ዬሩሳላሜን ዮቲዴስ።
7 ሄ ዎዴ ባቢሎኔ ካዎ ኦላንቻቲ ዬሩሳላሜ ካታማኔ ዩሁዳን ኢስታ ዩሾይ ጊምቤቲ ኡቲን ኣቲዳ ላኪሼኔ ኣዜቄ ጌቴቲዛ ካታማታ ኦሊሼ ዴቴስ። ጊምቤቲ ኡቲዳ ካታማታፔ ኣቲዳይቲ ሃይታ ጻላ።
8 ካዎ ሴዴቂያሲ ኣይሌቴ ጋርሳን ዲዛይታ ላኣ ኬሳናስ ዬሩሳላሜን ዲዛ ኣሳ ኡባራ ጫቄቲዳፔ ጉዬ ጎዳ ቃላይ ኤርማሳኮ ዪዴስ።
9 ኢሶይ ኢሶይ ኢብራዌ ጊዲ ኡቲዲ ኣቱማ ኣስ ጊዲን ዎይኮ ማጫ ኣስ ጊዲን ኣይሌቴን ዲዛዴ ላኣ ዬዳና ቤሴስ፤ ኣይሁዳታፔ ኦኒካ ባ ኢሻ ኣይሌ ሂስቲ ሃራናስ ቤሴና።
10 ሃይሳ ሃ ጫቆ ቃላን ኩዪዳ ሹሜቲኔ ዴሬይ ኡባይ ባንታ ኣቱማኔ ማጫ ኣይሌታ ኣይሌቴፌ ኬሳናሲኔ ናምኣን ዛሪዲ ኣይሌቴን ሃሮንታ ኣጋናስ ቃላ ቃቺዳ።
11 ጊዶ ኣቲን ባንታ ቆፋ ላሚዲ ኣይሌቴፌ ላኣ ዬዲዳ ባንታ ኣቱማኔ ማጫ ኣይሌታ ዛሪዲ ኣይሌቴን ሃሪዳ።
12 ሄሳ ጊሻስ ጎዳ ቃላይ ኤርማሳኮ ዪዴስ።
13 ጎዳ ኢስራኤሌ ጾሳይ፥ «ታኒ ኢንቴ ኣዋታ ጊብጼፔ ኣይሌቴ ቢታፌ ኬሲዳ ዎዴ ኢስታራ፥
14 ‹ባና ኣይሌቴስ ኣ ኢሚዳ ኢንቴ ዳቦ ኢብራዌታ ኡሱፑን ላይ ሃሪዳፔ ጉዬ ላፑን ላይን ላኣ ዬዶ› ጋዳ ጫቄዲስ፤ ጊዶ ኣቲን ኢንቴ ኣዋቲ ታ ጊዛዝ ሲዮንታ ኢጺዲ ባ ሃይ ሃራሶ ዬጊዳ።
15 ሃኢ ኢንቴ ማሮቴን ጌሊዲ ታ ሲንን ሎኦ ኦሶ ኦዴታ፤ ኢንቴ ኢሶይ ኢሶይ ኢብራዌ ጊዲዳ ኢንቴ ዳቦቲ ኣይሌቴፌ ላኣ ኬዛና ማላ ኣዋጂዴታ፤ ታ ሱንይ ኢዛን ጼይጌቲዛ ኬን ታ ሲንን ጫቆ ቃላ ጌሊዴታ።
16 ጊዶ ኣቲን ሃኢካ ኢንቴ ኢንቴ ቆፋ ላሚዲ ታ ሱን ቱኒሲዴታ። ኢንቴ ላኣ ዬዲዳ ኣቱማኔ ማጫ ኣይሌታ ዛሪዲ ኣይሌቴን ሃሪዴታ» ጌስ።
17 ሄሳ ጊሻስ ታኒ ጎዳይ፥ «ኢንቴ ታስ ኣዛዜቶንታ ኢጺዲ ኢንቴ ኢሻታኔ ኢንቴ ዳቦታ ኣይሌቴፌ ላኣ ዬዲዛ ኣዋጃ ኣዋጂቤኬታ፤ ቤኢቴ ታኒ ኢንቴ ቦላ፥ ‹ላኣ› ኣዋጃ ኣዋጃና፤ ሄሲካ ኦላን፥ ኢታ ሃርጌኒኔ ኮሻን ኢንቴ ኩንዳና ኣዋጃ፤ ታኒ ኢንቴና ሳኣ ቦላ ዲዛ ካዎቴቲ ሻጴቲዛ ሚሽ ኦና።
18 ታናራ ጫቄቲዳ ቃላ ሜንዳይታኔ ታ ሲንን ጫቄቲዳ ቃላ ፖሎንታ ኣሳታ ኢስቲ ማሪ ሹኪ ኢዛ ኣሾ ናምኡ ኬሲ ሻኪ ዎዲ ኢዛ ጊዶራ ኣዳይሳ ታኒካ ኢስታ ኦና።
19 ዩሁዳኔ ዬሩሳላሜ ካሌዛይታ፥ ካዎ ኬ ሹሜታ፥ ቄሴታኔ ማራ ኣሻ ጊዶራ ኣዳ ዴራ ኡባ፥
20 ታኒ ኢስታ ሼምፖ ዎናስ ኮይዛ ኢስታ ሞርኬታ ኩሼን ኣ ኢማና፤ ኢስታ ኣሃይ ሳሎ ካፎታሲኔ ዶኣታስ ቁማ ጊዳና» ጌስ።
21 ጎዳይ፥ «ታኒ ዩሁዳ ካዎ ሴዴቂያሳኔ ኢዛ ሹሜታ ኢስቲ ዎና ኮይዛ ኢስታ ሞርኬታ ኩሼን ሄይቲካ ጉ ዎዴስ ኢንቴና ኦሎ ኣጊዳ ባቢሎኔ ካዎ ኦላንቻታ ኩሼን ኣ ኢማና።
22 ታኒ ኢስታ ኣዛዛና፤ ኢስቲ ሃ ካታማዮ ኦላና ማላ ታኒ ዛራ ኤሃና፤ ኢስቲካ ካታማዮ ኦሊ ኦይካናኔ ታማን ጹጋና፤ ታኒ ዩሁዳ ካታማታ ኣሲ ባይንዳሶ ቡላ ኬሳና» ጌስ።