1 Watong, augu no God nong i halon iau,
2 Iau sip bia no nugu sinasaring na hanuat tupas ugu.
3 Kanong warah, no nugu nilon i hung ma ra tinirih
4 Di was tikane iau ma diet ing diet wara hinaansur ures napu tano lulur na minaat.
5 Di te waak se tar iau tika ma ira minaat.
6 U te bul iau narako tano lulur nong i manga hansur ures napu
7 No num ngalngaluan i manga ubal iau,
8 U te kap talur tar iau ma ira nugu bilai na harwis,
9 Ira matagu i rawa ra sunuah.
10 Hohe, u la hamines ira num tamat na melmel na gingilaan na kinarup ta ira minaat? Taie.
11 I tutun bia di hinawas palai utano num harmarsai narakoman ta ira midi,
12 Diet nunure tar mah ira num tamat na melmel na gingilaan na kinarup tano subaan na kankado? Taie.
13 Iesen iau suah ukatiga ho ugu wara harharahut, Watong.
14 Watong, wara bih bia u malok se iau
15 Mekaia laah ing iau ga sigar bulu, iau ga kap ra tamat na ngunngutaan ma ga hutet bia ni maat.
16 No num ngalngaluan i te sal bus iau.
17 Tano kidilona bung bakut diet saal luhutane iau hoing tiga taahit,
18 U te kap leh sukun iau ira nugu harwis ma diet ing iau la sip tar diet.