1 पजा पडनालुं वर्सां आतंका नना मर्रा येरुसलेम होत्तन. अस्के नातोनि बरनाबास मत्तोर. मोमोट होननेंके नातोनि तीतु इनानोनगुडा पीसि ओतन.
2 नाकु अगा तप्पाकोंटा होनापींता इंचि पेन वेहचि हुपिस्ताहाटीं नना होत्तन. पेनदाहाटीं नना कीता कस्टम एर्तम आयानायो इंचि यहुदि आयवोर्क नना वेहता बेसता कबुरतुन अगटा लीडर्कुन बाजुंक केय्सि ओर्क वेहतन.
3 नातोनि मत्ता तीतु युनानि मनकल आंदुर. अयना ओना कतना कियनाहाटीं ओर लीडर्क जबरदस्ति किया हिल्लुर.
4 गानि मावा लोप्पो इच्चुर लोकुल्क विस्वासुल्कुनलेसीं आसि मक्किस होळियतुर. येसु किरिस्तु माकुन यहुदिल्कुना नियमाल्कुना गुलामगिरिताल पलाते पेचाह्तदुन चुपचाप हूळसि, माकुन मर्रा गुलामगिरिते अरहचि नासडेम कियना उद्देसमते ओर वातुर.
5 गानि येसु सामिना बेसता कबुरता सत्तेम बस्केळ्क मीलोप्पो मनना इंचि मोमोट मात्रम ओरा पोल्लेन असले नम्मा हिल्लोम.
6 अगा मत्ता लीडर्क, नना वेहतव्टे बवे पोल्लें कल्पा हिल्लुर. पेनदा मुन्ने अंटोर समानमे. अदुनहाटीं ओर लोकुल्क बच्चोर पेद्दोर्क अयना बेसे, नाकु बतल पिकिर हिल्ले.
10 ओर माकु उंदे पोल्ले वेहतुर, अद बतल इत्ते मोमोट अगा होत्तस्के गरिब लोकुल्कुंक सहायम कियना इंचि. नाकगुडा अदे कबळ कियना आसे मत्ता.
11 कोन्नि रोजकुंक केपल अंताकिया सहरते वातोर. अगा वातस्के ओर उंदि तप्पु कीतोर. अदुनहाटीं ओर कीतद तप्पु इंचि ओन्क मोकोम मुन्नेन वेहतन.
12 असल बतल आता इत्ते, याकोबनगटाल इच्चुर यहुदि विस्वासुल्क केपानगा (पत्रु) वातुर. आ लोकुल्क वायनदाका केपल यहुदि आयवा विस्वासुल्कुनतोनि कलियसि तिनुड-उनुळ कियुंदुर. गानि बस्के अय्ते ओर वातुर, अस्केटाल मात्रम कतना आता लोकुल्कुंक वेरियसि, केपल यहुदि आयवा विस्वासुल्कुनाल लक्कु आतोर.
13 इंका ओर कियनद हूळसि वेरे यहुदि विस्वासुल्कगुडा अल्हे कियालय दल्गतुर. अचोने आयका बरनाबासगुडा ओरव्टेन कलियतोर.
14 पजा ओर बेसता कबुरता सत्तेमतुन एरपाट कीसि ताकसेक हिल्लुर इंचि नाकु तेळियतस्के नना केपन, “निमे यहुदि जातितोन आसिगुडा यहुदिल्कुना रीति-रिवाजकुन पीसि ताकसेक हिल्लिन. असोंटस्के यहुदि आयवोर्कुन यहुदिल्कुना रीति-रिवाजकुन पीसि ताकालय बारि जबरदस्ति कीसंतिन?” इंचि अंटोर मुन्नेन पूसकीतन.
15 बोर्कुन अय्ते मना यहुदिल्क पापिर्क इंचि इंतुर आ जातिते मनम पुट्टा हिल्लोम, मनम पुटतस्केटाल यहुदिल्कुमे.
16 अयना मूसाना नियमतुन पीसि ताकते आयो, गानि येसु किरिस्तुन विस्वासम कीतेन वरोर मनकल नीतिमंतुड आंतोर इंचि इंदके मनाकु एरपाट मंता. अदुनहाटीं येसु किरिस्तुन विस्वासम कीताहेंका नीतिमंतुल्क आयगोम इत्ता उद्देसमते मनम यहुदिल्क येसुनपोर्रो विस्वासम कीतोम. बारित्ते मूसाना नियमतुन पीसि ताकतोर बोरे मनकल नीतिमंतुड आयोर.
17 नीतिमंतुल्क आयनाहाटीं नियमाल्कुन पीसि ताकका, मनम किरिस्तुन विस्वासम कींतोम. इंचि इच्चुर यहुदिल्क मनाकुन पापिर्क इंचि इनकुंतुर. इत्ते बतल किरिस्तु पापम किया वेहालय वातोरा? अल्हा असले आयो.
18 यहुदिल्कुना बव नियमकुन अय्ते नना होळसीतनो, अवे नियमकुनपोर्रो मर्रा ताकानय्ते नना मूसाना नियमाल्क तपतोने आंतन.
19 इत्ते मुन्ने नना मूसाना नियम परकारम ताकसेके पिसालय हूळुंदुन, गानि बस्केळ्क अवुन पीसि ताका पराकोंदुन. इंदके पेनदाहाटीं पिस्सना इंचि अवुनंता होळस्तन. दीना अर्तम बतल इत्ते यहुदिल्कुना रीति-रिवाजकुनाहाटीं नना हाताप आतन.
20 नाकुन किरिस्तुनतोनि क्रुसुनपोर्रो वेलाड वाटमळ जर्गता इत्ते, इंदके नावा पळाना पिस्वर हासोत्ता. गानि नावा लोप्पो किरिस्तु जीवाते मंतोर. इंदके नावा ई मेंदुलते मनना जीवा, नाकुन बच्चोनो पावरम कीसि नावाहाटीं ओना जीवातुन हीता पेनदा मर्रिनपोर्रो नना विस्वासम कीताहेंका दोर्कतद आंद.
21 पेनदा कुर्पातुन नना विलवा हिल्ले इंचेक हिल्लेन. गानि मूसाना नियम परकारम ताकसि मनकालोर नीतिमंतुल्क आयानय्ते मनाहाटीं येसु किरिस्तु हायना अव्सरम मनाहिल्ले मरि.