1 अप्पुलोस कुरेंति सहरते मननेंके, पौलुस वेरे-वेरे नाहकु तिरियसेके इपीसि सहरते वातोर. अगा ओन्क इच्चुर सिस्युल्क कलियतुर.
2 “मिमेट विस्वासमते वातस्के मीपोर्रो पवित्र आत्मा वाताना?” इंचि पौलुस ओर्कुन पूसकीतोर. अस्के, “मोमोट अय्ते पवित्र आत्मा मंता इंचिगुडा केंजा हिल्लोम,” इंचि आ सिस्युल्क इत्तुर.
3 पजा, “अय्ते मरि मिमेट बोना बापतिस्मा एततिर?” इंचि पौलुस पूसकीतस्के, “योहानुना बापतिस्मा एततोम,” इंचि ओर वेहतुर.
4 अस्के, “योहान अय्ते पापाल्कुनाल मनसु मार्सकुनना बारेमता बापतिस्मा हियुंदुर. इंका ओर लोकुल्कुंक, ओना पज्जोटाल वरोर वायानोर मंतोर, ओनपोर्रो, इत्ते येसुनपोर्रो विस्वासम कीम्टु, इंचि वेहुंदुर,” इंचि पौलुस इत्तोर.
5 इद केंजिस ओर येसु सामिना पोरोलते बापतिस्मा एततुर.
6 पजा बस्के अय्ते पौलुस ओरापोर्रो कय इरतोरो अस्के ओर अंटोरपोर्रो पवित्र आत्मा रेयता. ओर वेरे-वेरे बासाने वळकालय, बविस्यवानि कियालय दल्गुतुर.
7 ओर अंटोर कलियसि पन्नेंडु मंदि मत्तुर.
8 आयंका पौलुस मूड नेल्कुनदाका यहुदिल्कुना दर्मसास्त्रम कराहना लोते होनुंदुर. वेरियाकोंटा ओरतोनि चर्चा कीसि पेनदा राज्येमता बारेमते ओर्कु तेळियागोट्सि वेहुंदुर.
9 गानि ओरंटे इच्चुर जिद्दि मनकालोर मत्तुर. ओर विस्वासम किया हिल्लुर. अचोने आयका लोकुल्कुना मुन्ने पेन वेहता हर्दा बारेमते रोता-रोता पोल्लें वळ्कसेक मत्तुर. अदुनहाटीं पौलुस, सिस्युल्कुन ओना पज्जो केयकुत्तोर. आ लोकुल्कुन अग्गेन होळसि रोज तरन्नुसना मिटिंग बंगलाते होंचि चर्चा कियुंदुर.
10 रोंडु वर्सनदाका इल्हे ताकसेके मत्ताहाटीं आसिया एरिया पीसि मनना अंटोर यहुदि आनि युनानि लोकुल्क पेनदा पोल्लेतुन केंजतुर.
11 पौलुसना कयदाल पेन पेद्दा-पेद्दा अद्बूतामाता कबाह्क कीसेक मत्ता.
12 इंका लोकुल्क पौलुस इटता दस्तिगुड्डान, ओना सेल्लान रोगम मत्तोरगा ओते ओरा रोगाल्कंता होनुंदु, देय्याल्क इंका होळसि वित्तुंदुं.
15 अस्के आ देय्यम, “येसु अय्ते नाकु एरके, इंका पौलुसगुडा नाकु एरके. मरि मिमेट बोर आंदिर?” इंचि ओर्कुन पूसकीता.
16 पजा आ देय्यम पीसि मत्ता मनकल ओरापोर्रो अरसि, ओर्कुन इरगा तंतोर. अदुनहाटीं ओर इरगा देब्बां दल्गिसि नेत्तुर पोंगनेंकेन अद लोताल कपडिं केर्राकोंटेन पेय्सि विततुर.
17 इद संगति इपीसिते मनना अंटोर यहुदिल्कुंक, युनानि लोकुल्कुंक तेळियता. अदुनहाटीं ओर अंटोर इरगा वेरियतुर. येसु सामिना पोरोलता कदर बेर्स्सेके होत्ता.
18 इल्हा बोर लोकुल्क अय्ते विस्वासुल्क आतुरो, ओर कीता तप्पुकुन अंटोरा मुन्ने ओप्कुनालय दल्गतुर.
19 होदें-मंत्राल्कु कियानोर वेल्लेटुर लोकुल्क ओरा पुस्तकाल्क उंदगा जमा कीसि अवुन अंटोरा मुन्ने बोळस्तुर. पजा आ पुस्तकाल्कुना दरा लेक्का कीते एबै वेय्कुना (50,000) एंडि कोत्तानच्चोर मत्ता.
20 इल्हा सामिना पोल्ले बेस मजबुत आसेके नालुं मूलां पैलांचेके होत्ता.
21 इदंता जर्गुता पज्जो, पौलुस मेसिडोनिया, अकाया इनना एरियानाल येरुसलेम होनना पिलान पवित्र आत्माता सहायमतोनि कीतोर. अगा होत्ता पज्जो, बल्हा कीसि अयना रोम सहरतुन हूळापींता, इंचि इत्तोर.
22 दानहाटीं ओर तिमोति आनि इरास्तुस पोरोलता इव्वुर सेवाकुल्कुन मेसिडोनिया एरियाते लोहचीतोर. ओर कुद बारे इंका इच्चुं रोजकु आसिया एरियातेन आगतोर.
23 अव रोजकुने पेन वेहता हर्दा बारेमते वेल्लेन लोल्लिं आतां.
24 देमेत्रि पोरोलतोर वरोर कमसालोड मत्तोर. ओर अर्तेमि इनना पेनदा गुळितालेसींटव एंडिता गुळिं तयार कीसि अम्मुकुनुंदुर. दीनहेंदाल ओनगा कबळ कियानोर्क रिकम हिलाकोंटा कबळ दोर्कुंदु.
25 आ कमसालोड, ओनगा कबळ कियानोर्कुन आनि ओनालेसीं कबळ कियाना इंका वेरेतोर्कुन अंटोर्कुन जमा कीसि ओर्कु इल्हा वेहतोर, “दादालोरिटा! मीकु अय्ते एरपाटे गदा, ई दंदाहेंदाल मनाकु बेस कोत्तां दोर्कंतां.
26 ई पौलुस इपीसि सहरता आनि दग्गेर-दग्गेरा पूरा आसिया एरियाता लोकुल्कुंक, ‘मनकल कीता पेनकु निजम पेनकु आयों,’ इंचि ओर्क एकरेवुल्क वेहसेक ओर्कुन बदलांचतोर. इद संगतितुन मिमेट हूळतिर आनि केंजतिर गुडा.
27 दीनहेंदाल मना दंदाक मत्ता बेस पोरोल बदनाम आंता. मना पेद्दा पेन अर्तेमिना गुळिता इलवागुडा दांता. इचोने आयका सिराप आसिया एरियातेन आयो गानि पूरा दुनियाता अंटोर लोकुल्क मोळ्कनसोंटा ई पेनदुक मत्ता पेद्दातनमगुडा हिलाकोंटा आंता,” इंचि इत्तोर.
28 इसोंटा पोल्लें केंजसि ओर इरगा होंगुंक वासि, “इपीसितोरा पेन अर्तेमि अन्नि पेनकुंकन्ना पेद्दा पेन आंद,” इंचि वरगेयालय दल्गुतुर.
29 अदुनहाटीं सहरते लोल्लि आता. पजा लोकुल्क मेसिडोनिया एरियाताल वाता गयुस आनि अरिसतरकुस पोरोलतोर इव्वुर्कुन दोर्का पीतुर. ईर इव्वुरगुडा पौलुसुनतोनि कलियसि पय्नेम कियुंदुर. अय्ते लोकुल्क अंटोर उंदि आसि ओर्कुन पीसि नाटकम बंगलातगा जोरसे इग्गिसेक पीसि विततुर.
30 पौलुस लोकुल्कुना मुन्ने होनना इनकुत्तोर गानि सिस्युल्कु ओन होना हिया हिल्लुर.
31 आसिया एरियाता इच्चुर अदिकारिल्क पौलुसना दंटातोर मत्तुर, ओरगुडा, “निमे नाटकम बंगलाते होंचि दोकाते अरमा,” इंचि कबुर लोहचि ओन्क विनंति कीतुर.
32 अस्के बोरो बतलो, बोरो बतलो इल्हा पेद्दा लोल्लि कियालय दल्गुतुर. वेल्ले मंदिक अय्ते ओर अगा बताहाटीं जमा आतुर अदगुडा एर्का हिल्ले.
33 यहुदि लोकुल्क सिकंदर पोरोलतोन वरोर मनकन मंदिताल पेरसि मुन्ने निलाहतुर. सिकंदर कय ऊपसि-ऊपसि लोकुल्कुंक समजांचलय हूळतोर.
34 गानि ओरगुडा वरोर यहुदि मनकल आंदुर इंचि तेळियतारित्ते ओर अंटोर रोंडु गंटानदाका उंदे आवाजते, “इपीसितोरा पेन अर्तेमि अन्नि पेनकुंकन्ना पेद्दा पेन आंद,” इंचि वरगेयसेके मत्तुर.
35 अस्के सहरता अदिकारि मंदितुन सांत कीतोर. सांत कीसि, “अरे इपीसि लोकुरिटा, बेस पोरोल होत्ता अर्तेमि पेनदा गुळितुन आनि स्वर्गमताल अरता दाना पवित्र बंडा बोम्मातुन बेस कापाळना सहर इपीसि सहर आंद, इद पोल्ले दुनियाकंता एरपाटे मंता.
36 इद पोल्लेतुन बोरे हिल्ले इन्नोर. अदुनहाटीं मिमेट सांत मंटु, विचारम कियाकोंटा गाबर आसि बतले कियमट.
37 ईर मनकालोर अय्ते मना पेनदा गुळिताल बतले दोंगा किया हिल्लुर. मना पेनदा अपमानमगुडा किया हिल्लुर. अय्नागानि मिमेट ईरकुन इगे पीसि वातिर.
38 ओक्कला देमेत्रिसुंक आनि ओनतोनि कलियसि कबळ कियानोर्कुंक गिंटा बोरादन्ना विरोदमते बतलन्ना वेहनद मनानय्ते कोरटकुना तल्पुक कुल्ले मंतां, अगा ओर वरोनपोर्रो वरोर तप्पुक-दोसेल्क वेहकुना परांतुर. ओरां केंजालय अगा अदिकारिल्कगुडा मंतुर.
39 अयना इंका बतलन्ना वेरेतदुन बारेमते वळकानद मनानय्ते दाना पय्सला मना पंचादिते किया वच्चु.
40 इय्याला इगे बतल अय्ते जर्गतनो दीनद पूरा दोसेम मना तल्लापोर्रेन अर्रनलायक मंता. इद जर्गुता गटना बेसताहाटींगे जर्गुता इंचि रुजुव कियालयगुडा मनागा बतले हिल्ले.” इंचि इत्तोर.
41 इल्हा इत्ता पजा ओर पंचादि मारता इंचि वेहतोर.