3 किरिस्तुनाहेंदाल वळ्कंतोर इत्तदुना बारेमते, मिमेट आनवल बतल इंचि पूसकींतिर. किरिस्तु मीहाटीं कमजोरि आयो गानि मीलोप्पो ताकत आसि मनंतोर.
4 बारित्ते, किरिस्तु कमजोर आसि मत्तस्के ओन क्रुसुनपोर्रो मोल्लां कोह्किसि वेलाळ वाटतुर, अयना गानि पेनदा ताकतते ओर मर्रा तेदसि जीवाते मंतोर. मोमोटगुडा ओनालेसींगे कमजोर मंतोम, गानि मोमोट मीवाहाटीं पेनदा ताकतते किरिस्तुनतोनि जीवाते मनंतोम.
5 मिमेट नाकुन परिक्सा कीसि हूळना दानकन्ना, मिमेट विस्वासमते मंतिरा हिल्लिरा, मीवद-मिमेट परिक्सा कीसि हुळाट. अस्के येसु किरिस्तु मीलोप्पो मंतोर इंचि अनपिच्चोना? अल्हा अनपिच्चाकोंटे मिमेट ओना लोकुल्क आयिर इनकुंटु.
6 नावा आसे मंता, मिमेट परिक्सा कीसि हूळते, मोमोट निजमे किरिस्तुना प्रेरितुल्कुम इंचि मीक अनपिच्चंता.
7 ओक्काला मोमोट निजम प्रेरितुल्कुनालेसीं मीक दिस्साकोन्नागुडा, बतल सत्तेम मंता अदे कियाना इंचि मीहाटीं पेनदुक पारतना कीसेक मंतोम.
8 मिमेट सत्तेमते ताकते दानकु विरोद मोमोट किय्योम, गानि सत्तेमताहाटींगे सहायम कींतोम.
9 मोमोट कमजोर मत्तोरालेसीं दिस्साना गानि बतल आयो, मिमेट ताकतते मत्ते माक आनंदम आंता. इल्हा मिमेट ताकतते बेर्सेक होंदना इंचि, मोमोट पारतना कीसेक मंतोम.
10 अदुनहाटीं सामि मीकुन नासडेम कियालय आयो गानि, गट्टिगा निलाहलय नाक अदिकारम हीतोर. नना मिहगा वातस्के नावा अदिकारमते मीतोनि कडक वळ्कना वेला वायामन्नि इंचि, मिहागटाल लक्कु मनेंकेने इव पोल्लें रासेक मंतन.
11 विस्वासुल्कुनिटा! नना आकिरते वेहानद इदे गदा, कुसिते मंटु. मीवा गुनम बेस इर्राट, वरोंक-वरोर दैरनेम हीम्टु, उंदि मनसुने मंटु, सांतिते मंटु, अस्के पावरम आनि सांति हियाना पेन मीवातोनि मनंता.
12 मिमेट वरोंक-वरोर कलियतस्के पवित्र पावरमते जोहार कीम्टु.
13 इग्गेटा पवित्र लोकुल्क अंटोर मीकु जोहर वेहासेक मंतुर.
14 सामि येसु किरिस्तुना कुर्पा, पेनदा पावरम आनि पवित्र आत्माता तोळ मी अंटोरतोनि मन्निकांटी.