1 मीवा नड्डुम वरोर बोगमतनम कीतोर इंचि नाक केंजावाता. ओर ओना बाबोना मुत्तो इत्ते सिन्ना यावान इरकुत्तोर अले! इसोंटा तप्पुड कबळ अविस्वासुल्कगुडा किय्युर.
2 इदुनाहाटीं मीक दुक्कम आया मत्ता, गानि मिमेट पेद्दिरकेम कीसेक मंतिर. असंटोन मीवा लोप्पोटाल पेचाहचि गेदुमगोम.
3 नना मिहागटाल मेंदुल्ते लक्कु मंतन, गानि आत्माते मीवातोनि मंतन. आत्माते मीवातोनि मत्ताहाटीं ओनद नना मुन्नेने न्यायम कीतन.
4 बस्के अय्ते मिमेट येसु सामिना पोरोलते उंदगा जमा आसि उदंतिर, अस्के आत्माते अगा मनंतन, अल्हेने मना सामि येसुना ताकत मीवातोनि मनंता.
5 असोंटा तप्पुड कबळ कियानोना मेंदुल्तुन नासडेम कियालय पेद्दा देय्यमता कय्दे अप्पजेप्पना. बारित्ते, ओक्कला ओर पस्चातापम कियानय्ते, सामि वायाना रोजुने ओना आत्मा पिस्सार.
6 मिमेट पेद्दिरकेम कियमळ बेस आयो, इच्चुर पुल्लाटा पिंडि वेल्लेन पिंडिते कल्पते, पूरा पिंडितुन पुल्लगा कींता अद मीक एरपाटे मंता.
7 पळाना पुल्लाटा पिंडितसंटोन तेंडसि पोहाचि मिमेट पूना पिंडि मुद्दा आया परांतिर, बारित्ते मिमेट निजमे पुल्लाटोर आयवाहाटीं, येसु किरिस्तु मना दाटसि होनना पंडुगुना गोर्रे पोरिनलेसीं मोक्कु आतोर.
8 अदुनहाटीं मनम पळाना पुल्लाटा पिंडितसोंटा कराब कबाह्कुने, दुस्ट गुनाल्कुने आयो गानि इमानदारता, सत्तेमता पुल्लगा आयवा हारिनसोंटा पंडुगु कियमळ गावाले.
9 नना मुन्ने रासि लोहता सिट्टिते, बोगमतनम कियानोरतोनि कलियसि मनमट इंचि रासि मत्तन.
10 इदुना अर्तम बोगमतनम कियानोरतोनि, आस्ति कियानोरतोनि, दोंगा कीसि तिनानोर्कुनतोनि, बोम्मांक मोळ्कानोर्कुनतोनि कलियसि मनामन्नि इत्ताप आयो. इल्हा इनानय्ते मरि दुनियातुने होळ्सा पींता.
11 नना इनना पोल्ले बतल इत्ते, मीवा लोप्पोटाल बोरन्ना ओनद ओर विस्वासिन इंतोर, गानि ओर बोगमतनम कियमळ, आस्ति कियमळ, बोम्मान मोळ्कमळ, अपमानम कियमळ, रिम्मा आयमळ, दोंगा कीसि तिनमळ इसोंटा गुनम ओनालोप्पो मनानय्ते ओनतोनि कलियसि मनमट, ओनतोनि गाटो तिनमट इंचि रासि मत्तन.
12 विस्वासम कियवोरा न्यायम नना बारि कीकन? बोर अय्ते विस्वासमते मंतुर, ओरा न्यायम मिमेट किय्यिरा?
13 विस्वासम कियवोरा न्यायम पेने कींता. अदुनहाटीं आ बोगमतनमतोन पेचाहचि गेदमट.