1 Ko puŋgo na, a Zhɔbu wì si sɛnrɛ ti lɛ ma para maa sepilige ki daŋga.
2 Wìla para ma yo fɔ:
3 Yɛnŋɛlɛ sa ti na sepilige ki kɔ ki wɔ wa,
4 Ki pilige ye, Yɛnŋɛlɛ sa ti ki kanŋga diwi,
5 Diwi gbɔlɔ mbe ye ki pilige ki ni konaa kunwɔ pi diwi wi tɔn ki na,
6 Diwi gbɔlɔ mbe ye mbege pilige ki tɔn pew,
7 Ee, ki yembinɛ li ni, jɛlɛ ka ka ya yere kugbɔ ni,
8 Yɛnŋɛlɛ sa ti mbele pe maa piliye yi daŋgi pege yembinɛ li daŋga,
9 Ki yembinɛ li yindogo yɔn wɔnŋgɔlɔ ke pye diwi,
10 Katugu lara nda tìla na kugbɔ ki lɛ, ki yembinɛ li sila kala la pye mbe ti paga kanla se,
11 Yiŋgi na mi sila si ku wa na nɔ wi lara na sesaga?
12 Yiŋgi na lere la si ta mala teŋge wa wi tɔɔrɔ ti na?
13 Ndɛɛ ko sila pye, anmɛ mi yɛn ma sinlɛ ma pye yɛyinŋge na wa fanga ki ni,
14 Mi jɛn na pye wa wunlumbolo poro naa tara ti legbɔɔlɔ pe ni,
15 Mi jɛn na pye wa wunlumbolo piile pe ni, poro mbele tɛ la pye pe yeri,
16 Nakoma mi se jɛn na pye laga, mi jɛn na pye
17 Wa ko laga ko ni, lepeele pe se ya mbe kapege pye lere na,
18 Kasopiile pe yɛn wa yɛyinŋge na,
19 Lepigile naa legbɔɔlɔ pe yɛn ja,
20 Yiŋgi na Yɛnŋɛlɛ li mɛɛ mbele pe yɛn na jɔlɔ pe yaga pe ma yanwa pi yan?
21 Pe maa kunwɔ pi singi, ɛɛn fɔ pila pan mbe pe lɛ,
22 Ndɛɛ ki pye pe fanra ti ta, a pe pe le,
23 Mi yɛn lere wa, ŋa wi suu karisaga ki jɛn,
24 Katugu jɛngɛ ŋga mila jɛɛn ko ki pye na yaakara re,
25 Ŋga mi yɛn na fyɛ ki yɛgɛ, ko ki mala ta,
26 Mi woro na yɛɛ kan, yɛyinŋge woro na na, wogosaga si woro na na;