1 Tishɔnrɔ ti ka ku wa sinmɛ nuwɔ taan pi ni, ti maa jɔgɔ mboo nuwɔ pi ŋgban yɛgɛ ŋga na,
2 Kajɛnŋɛ wi jatere wi maa kee wi ni kalige na,
3 Ali na lembige ki kaa tanri la kee wa konɔ, tijinliwɛ na pye ki ni,
4 Na kundigi wi ka nawa ŋgban ma ni, ma koro le ma cɛnsaga,
5 Mì kapege ka yan laga tara ti na,
6 Lembige ka ma kaa cɛnsagbɔgɔ ta,
7 Mì kulolo pele yan pè lugu shɔnye na,
8 Lere ŋa wi yɛn na titɛgɛ woo, ki fɔ wi mbe ya to wa ki ni;
9 Lere ŋa wi yɛn na sinndɛɛrɛ woo, ki fɔ sinndɛlɛgɛ mbe ya mboo wɛlɛgɛ;
10 Na gbɔnlɔgɔ ki yɔn kiga pɛn, na lere sigi yɔn ki yɔ,
11 Sanni wɔɔrɔ yigifɔ wi saa jɛnmɛ pi pye, na wɔɔgɔ ka lere wa nɔ,
12 Kajɛnŋɛ wi yɔn sɛnrɛ ti ma ti leele pe ma yɛnlɛ wi na;
13 Ki ma ki sɛnrɛ ti lɛ lembigewe sɛnrɛ ni, mbe sari kɔ yara tijangara sɛnrɛ ni.
14 Lembige ki maa sɛnrɛ ti lege na kee.
15 Lembige ki tunŋgo ki maga te jaga,
16 Tara nda ti wunlunaŋa wi yɛn pyɔ jɛɛ,
17 Ɛɛn fɔ tara nda ti wunlunaŋa wi sege ki yɛn mɛgbɔgɔ fɛnnɛ wogo,
18 Tiyanra to ti ma ti sɛnwee wi go ki naayeri wi ma kɔn ma to;
19 Leele pe ma sɔgɔlɔ gbɔlɔ li sɔgɔ mbe nayinmɛ li,
20 Maga ka sɛnpere yo wunlunaŋa wi na, ali yɛrɛ wa ma kotogo na;