1 N dheglu ‑nu, ‑kɔ 'a‑ ꞊blɛɛ ‑a 'ka bhë, 'ka dho dɔ ‑a 'ka gɛnngdhö ka ‑bha ‑zo ‑yö ‑Zlan ‑bha ‑sü 'gü, ‑klu kwa Dëmɛ ‑bha ‑sü 'ka. ꞊Dhɛ 'ö ꞊ya kë 'dhö, a‑ 'piö 'sönggö ‑sönggö kö 'aan‑ n 'yan dɔ ka 'ö 'ka n ꞊zuö' 'glu dhi ‑na ꞊duö 'ö 'ka n ‑ma yuö ꞊truën 'ka bhë ka ‑bha.
2 Evodi kaa‑ Sɛntisö, a ‑bhɛa ka ‑dhë 'sönggö ‑sönggö kö ka ꞊zuö' ‑yaan kë do ꞊nɛ 'ta ‑sü kwa Dëmɛ 'piö ‑mɛ ‑nu ꞊zuö' 'dhö.
3 Bhi ‑de 'pö, n 'bhamɛ 'ö yuö do 'a‑ kë ‑na ꞊nɛ 'ü‑ kë ‑na 'pö ‑së 'ka bhë, a‑ ‑dhɛ ü ‑gɔ kö dhoo ‑nu ꞊plɛ 'wo bhë 'ü 'dho ‑an ‑dhë kö ‑waan 'wun ma wo 'ko ‑ta. Bhii dhoo ‑nu ꞊plɛ 'wo bhë oo, Klema oo, 'iin n ‑ma yuökëyɔɔ ‑nu 'töüdhö 'ö ‑Zlan ꞊ya ‑an 'tɔ ‑ya ꞊toëpö ‑këdhösü 'sëëdhɛ ‑be 'gü bhë, ‑wo ‑nu n ‑dhë 'ö 'yi 'wuntaɔsë ‑ta ‑ko zë, 'wuntaɔsë bhë ‑a ꞊blɛɛ' ‑sü 'ka mɛ ‑nu 'saadhö ‑dhë kö ‑yaan 'dho 'dhiö.
4 Ka ꞊zuö' 'glu ‑yö dhi ‑kplawo kwa Dëmɛ 'gü! A‑ ‑pö ka ‑dhë 'zü ꞊nɛɛ: Ka ꞊zuö' 'glu ‑yö dhi!
5 ‑Ka kë 'lëëlë mɛ 'saadhö buëndhö, bhii kwa Dëmɛ nu ‑yi 'yaa ꞊gbiin gbɔ!
6 Kö ꞊kun 'ka ‑ya pë gbɛ ꞊zɔnng' ‑ta, 'kɛɛ pë 'töüdhö 'ö ka ‑bha ‑wun ‑yö yö ‑a ‑bha yi 'oo yi 'ka, ‑kaa ‑dhɛ ‑Zlan ‑gɔ ‑bhɛa ‑a ‑dhë ‑sü ꞊zuö' 'plɛ 'ka waa‑ ‑a zuö pö ‑sü 'ka!
7 ꞊Ya kë 'dhö, ‑Zlan ‑bha ꞊zuöyagluu 'ö ꞊va 'ö ꞊zië' mɛ 'bhee‑ ‑bha 'wundɔdhe 'saadhö ‑ta bhë, ‑yö ‑dho ‑a kë kö ka ꞊zuö' waa‑ ka ‑bha ‑zotadhe ‑yaan 'to Yesu Klito ‑bha zian ‑ta.
8 N dhegluzë ‑nu, pë 'a dho ‑a pö ka ‑dhë 'zü 'ö tɔɔ: Ka ‑bha ‑zotadhe ‑yö 'dho pë 'ö 'wun gia‑ 'ka, pë 'ö ꞊bhlë 'kpɔ ‑pë 'ka, pë 'ö kpengdhö, pë 'ö 'puu, pë 'ö ‑dhɔ ꞊kaa' ‑pë 'ka, pë 'ö 'gianzë, pë 'ö ‑së, pë 'ö‑ 'tɔ bhɔ ‑sü 'dhö ‑së ‑an 'piö ꞊zian'.
9 Pë ‑nu 'ö 'ka ‑an ꞊daan 'ö 'ka ‑an yö n 'piö, pë ‑nu 'ö 'ka ‑an ma n 'dhii waa‑ pë ‑nu 'ö 'ka n yö ‑an kë ꞊dhia bhë, pë ‑nu 'wo bhë 'saadhö, ‑ka ‑an kë! ꞊Ya kë 'dhö ‑Zlan 'ö ꞊zuöyagluu nu kwa ‑dhë bhë ‑yö ‑dho kë ka 'piö.
10 N ꞊zuö' 'glu ‑yö ‑dhi ꞊duö kwa Dëmɛ 'gü, bhii 'ö tɔɔ 'töng ꞊plëëzë 'ö ‑ziö bhë, ka ‑yɛ 'zü ‑dëüwo, 'ka ka ‑bha ‑dhɔ ‑zɔn n ‑dhë, ‑nu n ‑dhë ‑sü 'ka. 'Kö ‑kë ꞊nɛ ‑a ‑dhɛ ‑yö ꞊glɔɔ kaa nu n ‑dhë 'siö‑, a‑ ꞊tɛi' dɔ ꞊nɛ kaa ka bo ‑ya n ‑wun ꞊zɔnng' ‑ta ‑sü 'ka, 'kɛɛ ‑a kë ‑kɔ 'slë yaa kë ‑dhö ka ‑gɔ bhë yö ‑mü.
11 'Wun 'a‑ ꞊blɛɛ bhë, yaa kë ꞊nɛ n ‑ma ‑wun 'ö yö pë 'bhaa ‑bha, bhii ‑tosiadhe kë ‑sü 'ö ꞊zuögludhi 'ka, pë 'ö mɛ ‑gɔ 'iin 'yaa mɛ ‑gɔ ‑a ‑wun 'gü bhë, 'ma‑ ꞊daan'‑.
12 ‑Tosiadhe kë ‑sü 'ö 'fɛɛ 'gü waa‑ ‑a kë ‑sü 'ö ꞊bhɔɔ' 'gü, a ‑an 'plɛ këdhɛ ‑dɔ. 'Ö ‑kë ꞊nɛ ‑bhöpë ‑yö n ‑gɔ 'iin 'yaa n ‑gɔ, 'iin 'zü pë 'dhö n ‑gɔ ꞊va 'ö ‑lö n ‑zü oo, 'iin ‑yö n ‑gɔ 'tee 'ö yaa ‑mɔ n ‑ma oo, 'ma‑ 'plɛ kë ‑kɔ ꞊daan'‑; 'ö n 'glu ‑yö ‑dhi ‑a 'plɛ ‑wun 'gü, ‑dhɛ 'saadhö 'gü 'töng 'plɛ 'ka.
13 Pë ‑nu 'wo 'dhö 'töüdhö bhë, n ‑kɔ ‑yö ‑mɔ ‑an 'plɛ kë ‑sü ‑bha 'gügbeedhɛ 'ö Klito 'dhö ‑a nu ‑na n ‑dhë bhë ‑a ꞊kwaa'.
14 ꞊Ii‑, a‑ ꞊blɛɛ 'dhö 'kɛɛ nu 'ka‑ wo n ‑dhë n ‑ma 'wun 'gbee‑ 'gü bhë, ka‑ ‑kë ‑së.
15 Filipö ‑mɛ ‑nu, ka gia‑ ‑de ka‑ ꞊tɛi' dɔ ꞊nɛ 'töng 'a go ‑a 'ka ka ‑gɔ Maseduanë ‑sɛ 'gü kö 'ma ‑Zlan ‑wo ꞊blɛɛ' ‑sü zü dɔ, Yesu ‑wun ‑dhɛ 'wun gia‑ ‑mɛ ‑nu ‑dho 'kuë‑ ‑sü ‑nu 'ö 'wo ‑dhö 'töüdhö bhë, ka do 'kpaan ꞊nɛ 'ö ꞊ya kë 'ka pë ‑nu bɔ n ‑dhë.
16 Kö 'a ꞊tun Tesalɔnikö, pë ‑nu 'ö n ‑ma ‑wun ‑yö yö ‑a ‑bha, ka ‑an ‑bɔ n ‑dhë ‑gwaa ꞊plëëzë 'ka 'dhö.
17 'Kɛɛ, kö ꞊kun 'ö ‑kë ka ‑zo 'piö ꞊nɛ pë 'ö 'a‑ 'piö 'ö tɔɔ kö 'kaan‑ gbaɔ kë n ‑dhë ‑kplawo. 'Kɛɛ 'a‑ 'piö ꞊zian' kö pë ‑nu 'ö 'ka‑ kë ‑na n ‑dhë ‑kplawo bhë, ‑an ꞊truën ‑nu ‑waan kë ‑dhö ka ‑bha 'ka, 'iin kö ‑yö ‑da 'kuë‑ dhö, kö ‑yö kë ꞊va ‑Zlan 'piö.
18 Pë ‑nu 'töüdhö 'ö 'ka‑ dɔ Epafloditö ‑gɔ 'ö nuë n ꞊dhia bhë, ‑a 'plɛ ‑yö ‑lo n ‑ta. ‑Yö ‑mɔ n ‑ma 'ö‑ 'bhaa ‑yö to. 'Ö dɔ 'ö 'kwa‑ wo zlöö ꞊nɛ ‑a 'gü, pë ‑nu 'ö n ‑ma ‑wun ‑yö yö ‑a ‑bha 'dhiö ‑be bhë, 'ö‑ 'plɛ ꞊ya kë n ‑gɔ zlöö ꞊va 'ka. Ka ‑bha gbaɔ 'ö 'ka‑ ‑kë n ‑dhë bhë, ‑yö 'wun ‑së 'ö‑ ‑wun 'yi ‑yö ‑kan ‑Zlan 'dhi, 'ö ‑we ‑a ‑wun ‑bha ‑a 'ka;
19 (n ‑kɔ 'yaa ‑mɔ ‑a ‑bha kö 'a‑ ‑yɛ 'zü kë ka ‑dhë; 'kɛɛ) pë 'töüdhö 'ö ka ‑bha ‑wun ‑yö yö ‑a ‑bha, n ma ‑Zlan ‑bha ‑kë ꞊bhɔɔzë ‑sü ꞊duö bhë ‑a ‑wun 'gü, ‑yö ‑dho bɔ Yesu Klito 'gü 'ö‑ nu ka ‑dhë.
20 Kwa Dë ‑Zlan 'ö bhë ‑a 'tɔ ‑yö kë ꞊va ‑kplawo ‑yö dhoë 'dhiö. Amɛn.
23 Kwa Dëmɛ Yesu Klito ‑bha 'dhuë‑ ‑yö 'to ka 'saadhö ka 'piö!