1 मारी वातोन क समळो, ए याकुबन डाहडा, ए इसराएलन घोरानान नीयाव करनीया समळो, काय नीयावन पुरावो जाननो तुमरो काम नी हय?
2 तुमु ते भलाय सी छेटा आरु बुराय सी मोंग राखो, तमु मारा लोगहन न खालड़ी चेड़े
3 तुमु म्हार लोगहन क मास बी खाय लेयो, आरु हेनकी चामड़ी चेड़ लेयो, तुमु हेनका हाड़कान क हांडा मा पकाड़ने करीन तोड़ी न्हाको आरु हेनको मांस हान्डाम पकाड़ने करीन टुकड़ा टुकड़ा करो।
4 त्या उना समय मा योहोवा न रावनीया करसे, पुन त्यो हेनकी नी समळे, उना टेम पर त्यो हेनका भुण्डला कामन कारण हेनु सी मुय फिराय लेसे।
5 योहोवान यो वचन छे की जो कागळिया मारी परजा क भटकाड़ देय, आरु जव हेनको खाने जड़तो रये, तव सांती सांती आयड़ता रये, आरु कदाम कोय हेनका मुय मा काहय नी आपे, ती हेका वीरुध मा लड़ाय करने करीन तीयार हुय जाय।
6 इना कारण तुमु पर असी रात आवसे, की तमुक देखने बी नी जड़े, आरु तुमु असा आंधाराम पड़सो की सार नी देखाड़ सको कागळीयान क वाटे दाहड़ो डुब जासे, आरु दाहड़ो रयसे ते बी हेनु पर आंधारो हुय जासे।
7 दर्सन देखने वाळा लाजवाय जासे, आरु सार नीकाळने वाळान मुंय फिका पड़ जासे; आरु सब ने सब आपसा हुट क ढाक अतरान करीन लेसे की परमेश्वर भेनी रयीन जवाब नी जड़तो।
8 पुन हाव ते योहोवान आत्मा सी ताकत, नीयाव आरु जीक हात करीन पाको छे की हांव याकुब क हेको पाप आरु इसराएल क हेको पाप देखाड़ सोको।
9 ए याकुबन घोरानान डाहडा, ए इसराएलन घोरानान नीयाव करने वाळा आरु आखी सुतरी वातन क बदलने वाळा, यी वात समळो।
10 तमु सीयोनन हत्या करीन आरु योरुसालेम क भुण्डलो बनावीन वातड़ो करो।
11 तमरा अगळवानीया पयसिया खायीन नीयाव करे, आरु पुजारा पयसिया मांगीन धरमन वात सिकाड़े, आरु कागळिया पयसियान करता सार नीकाळे, ते बी यो कयीन योहोवा पर भुरसु राखे की योहोवा हामरे वीच मा छे, अतरान करीन पीड़ा हामरे पर नी आवे।
12 अतरान करीन तुमरा कारण सी सीयोन क जुपी न खेत बन जासे, आरु योरुसालेम उजाड़ोन ढीग होय जासे, आरु जीना बोयड़ा पोर परमेस्वरन मन्दीर बोनलो छे, त्यो जोंगोलोन उचला जागान सारको होय जासे।