1 ओळी वेदी बाबळीयान लाकड़ान, पाच हात नांबी आरु पाच हात चवड़ी बनवाड़जी; वेदी चाय खुटाय होयनो जुळे, आरु हेकी उचाय तीन हातन होयनो जुळे।
2 आरु उना च्यारो कुना पर च्यार सींग बनवाड़जी; त्यो उको सातमा एकुत् टुकड़ान हये, आरु उको पीतळ सी ढाळाड़जी।
3 आरु ओको रुखड़ो चुटनेन ठिकरा, आरु पावड़िया, आरु वाटका, आरु दाताळ्यो पावड़ो, आरु सुपड़ीया बनवाड़जी; हेनको आखो सोमान पीतळन वनवाड़जी
4 आरु उको पीतळन जाळीन एक झारु बनवाड़जी; आरु उको च्यारो छिवनीया मा पीतळन च्यार कड़ीया बनावड़जी।
5 आरु उना झारा को वेदीन च्यारो मेर कंगनीन नेचो असो लगवाड़जी कि त्यो वेदी क उचान विच लोगुन पुगे।
6 आरु वेदी लियन बाबळीयान लाकड़ान डांडा बनावजी; आरु उको पीतळ सी ढाळाड़जी।
7 आरु डांडा कड़ा मा डालजे कि जव वेदी चुटे तव त्या हेनका भुरसे रोये।
8 वेदीन तख्तो सी खोखली बनवाड़जी; जसो त्यो इना बयड़ा पर तुको देखाड़ीयो हुतो तसोज बनावजी।
9 ओळी निवासन आंगना को बनावजी। उको दोखेवरे तरफ ते वाटयला सुवाळा छिंदरान सब परदा मेळावीन ओकी नाम्बाय सोव हातन हय; एक तरफ ते हतरोत् हयनो जुळे।
10 आरु हेनका लिय वीस खाम्बा बनवाड़जी, आरु हेनको वाटे पीतळन वीस कुरचिया बनी, आरु खाम्बान छोल्ला आरु हेनकी पट्टी चाँदीन हय।
11 आरु उना रीतिये आँगनान बखेवरे भेनी नाम्बाय बी सोव हात नाम्बो परदो हय, आरु हेनको वाटे बी वीस खाम्बा आरु हेनका वाटे बी पीतळन वीस खाचा हये; आरु उना खाम्बान छोल्ला आरु पट्टीया चाँदीन हुयनो जुळे।
12 ओळी आँगनान चवड़ाय मा दखेवरे भेनी पचास हातन परदा हुयनो जुळे, आरु हेनका वाटे दस खाम्बा आरु खाचा बी दस हुयनो जुळे।
13 एक तरफ बी आँगनान चवड़ाय पचास हातन हुयनो जुळे।
14 आँगनान झोपलान एक तरफ पन्द्रह हातन परदा हुयनो जुळे, आरु हेनका वाटे बी तीन खाम्बा आरु तीन खाचा हुयनो जुळे।
15 आँगनान झोपलान दिसरे तरफ पन्द्राह हातन परदा हुयनो जुळे, हेनका वाटे बी खाम्बा तीन आरु खाचा बी तीन हुयनो जुळे।
16 आँगनान झोपला वाटे एक परदो बनवाड़जी, जो नीळ्ळा, जामनीया आरु रातला रंगन छिंदरा आरु वाटायला सुवाळा छिंदरान घाटाळो बनलो वीस हातन हुयनो जुळे, हेनको वाटे खाम्बा च्यार आरु खाचा बी च्यार हुयनो जुळे।
17 आँगनान च्यारु मेर सब खाम्बा चाँदीन पट्टीया सी जुड़ायाला हुयनो जुळे, हेनकी छोल्ला च्यार चाँदीन आरु खाचा पीतळन हुयनो जुळे।
18 आँगनान नाम्बाय सोव हातन, आरु ओकी चवड़ाय पचास हातन, आरु परदानन उचाय पचास हातन हुयनो जुळे, ओकी परदा सुवाळा छिंदरा बनली हुयनो जुळे, आरु खाम्बान खाचा पीतळन हुयनो जुळे।
19 निवासन जागान भाती–भातीन ठाहरा आरु समान आरु उना सब खुँटा आरु आँगनान बी सब खुटा पीतळन हुयनो जुळे।
20 ओळी तु इसराएलीयान को यो हुकुम आपजी, कि म्हारे पास दीवलीया वाटे कुटिन निकव्ळा जैतुन चुखलो तेल ली आवजी, जिना सी दीवलीया सलींग धपता रये।
21 परमेश्वरन होजरी वाळा तम्बु मा, उना वीचमा वाळा परदा सी बाहर जो गवान चिट्ठी ओगळ हसे, हारुन आरु उना पोर्या दीवलीयान को सांतो सी लगाड़ीन सोन्दारे तक योहोवा भगवानन सामने सजाळीन मेले। यी रीति इसराएलीयान पीढ़ी वाटे जोलमकी बनली रयसे।