1 Bab-Jehová sogdebalid:
2 ¿Be wisi, goe-sapur milegega nii-walabigwa nanae?
3 Ar goe-sapur milesokalile, ega nued-aidegega, sinni sigisdaed.
4 Geb e-mimmigan sapurba dungudamalogua, na gannarbagus itomalale, e-nangi banguddamalad,
5 ”¿Doa moli-uayasuid-sapurbarmalad yogasaar gudiguega imaksa?
6 Ani an moli-uayasuidmarga, nega-dulesulidgan e-negga imaksad,
7 Na wargwen e-itolegedba-gudimarsoggua, neggweburgi-neg-oimaked bai itodasurmalad,
8 Deyob moli-uayasuidmar yalaganba gudidamalad,
9 ”Ar moli-bebe-nikad-ursilid, ¿sunna bega arbasar be ebinsae?
10 ¿Ar we-moli-ursilid, sunna be e-dukarba edinne?
11 ¿Ar we-moli-e-garganguedgi be bengusuli guoe?
12 ¿Sunna be we-moli ibmar-gwag-onmakega be imake?
13 ”Ar nuu-avestruzʼye-nugadi, weligwaledba na e-sakan mer-mer imakardaed,
14 We-nuu-dummad-dukar-suid e-akwa ukubgi urbed,
15 We-nuu-dummad e-akwa-sisad-birgi na annaele, gwen bai itosulid.
16 We-nuu-dummad e-mimmigan egadsuliyobi sabsur-imaked,
17 Ar Bab-Dummadi, nuu-dummad-dukar-suidga binsaed uksasulid.
18 Degi-inigwele, we-nuu, sakan-nallaa-imakdele, degi, abarmakde-sogele, molimarba bur bule abarmaked,
19 ”¿Ar be, molimarga gargangued uksasi?
20 ¿Ar be, moli ses-ichomakeyobi be imaksasi?
21 Moli sabsur-annanagusdaed, e-gargangued-nikadba weligwar itonadaed,
22 Moli dobed wissulid, ibmar dobsulid,
23 Sigumar moli-dikargi-nanaidi gornanaid,
24 Sabsur-abarmakedbali, dikasur-abarmakdedaed.
25 Ar moli gargote-itogele, abarmakega aka binnasur-bunnogar-gotedaed.
26 ”¿Ar bee be, noomar-gukuega imaksa?
27 ¿Ar be-sogedbali sulubagimar dikasuli-gukuega be imaksasi?
28 Ar sulubagi akwasaila-dummagan e-negga imaked, agi na e-gabed siid.
29 A-akale, bannaba na e-mas-gaega
30 Sulubagi-e-mimmigan ibmar-durgan-e-ablisgi ibmeremalad.