1 Bab-Dummad sunmakded, weyob sogded:
2 “Ani an be-Bab-Dummad-Jehová gued. Bemar Egipto-yargi maiga-wilebukmargu, ani an bemar-onosadid.
3 Melle bab-dummad-baid an-asabin be nikumalo.
4 Melle be ibmar-wilubgan sobmalo,
5 A-ibmar-wilubgan-asabin dulluu be imakosurmalad,
6 Ar dulemar-an-sabmaladdi,
7 Melle be-Bab-Dummad-Jehová-nug yogasaar be obaro.
8 Obunnoged-ibagi be obunnogo,
9 Ibanergwa (6) be arbaoed.
10 Ibagugledgindi (7), obunnoleged-ibad,
11 Ar ade, Bab-Jehová ibanergwa (6) arbasad.
12 Be-daedbali, be-bab-nug-odummodii, degi, be-nan-nug-odummodii be nanamalo.
13 Melle be dule-oburgo.
14 Melle be be-abirginsulid-ebo galagwensuli nanao.
15 Melle be ibmar-atursao.
16 Melle be gakansaar aimargi sunmako.
17 Melle be dule-baid-ibmarbina be sogo:
18 Bela Israel-dulemala e-sunnagwad mar-gollomakmaid itosmargua, degine, gar-trompeta-binnasur-goled itosmarbargua, deginbali, mar-dakarmakmaid daksamarbargua, degi, yar waa-moodo-siid daksamarbargua, Israel-dulemar nue-dobee itodmalad, wawanmakdemalad. Degisoggu, yargi bannabaa ambikusmalad.
19 Agi, Moisésʼga sogdemalad:
20 Moisés Israel-dulemar-abin sogded:
21 Israel-dulemardi, Moisés mogir-guduregedgi-Bab-Dummad-maidse-nadedi bannabaa dakbuk gusad.
22 Bab-Jehová Moisésʼga sogded:
23 Melle bemar orgi-ibmar-sobaled, manigi-ibmar-sobaleddibe, be-bab-dummadga anyob be imakmalo.
24 ” ’Bab-Dummadga-ibmar-ogumakar-ukleged-aila-sobega, anga be napa sobmaloed. A-ailagi be we-ibmarmar ukmaloed:
25 Ar bemar anga ibmar-ogumakar-ukleged-aila-akwa be sobbiele, unnila be akwamar-sobarsulid urbe-urbe be imakmalo, ar ade, bemar, akwa esgorogi sobdele, wede bar ibmar-ogumakar-ukleged-aila-nuedga guosulid.
26 Degine, anga ibmar-ogumakar-ukleged-aila melle arsan-nika imako. Ar bemar agi nakwialile, be-abgan daklego-itole.’ ”