1 Deginbali, we-igargan be wisgubalirgebed:
2 Ar ade, dulemar-weyobid nonikoed:
3 Dule-sabed-gwen-niksurmalad.
4 E-aimargi-aibinmalad.
5 Yamo Bab-Dummad-Igar-Maidba-daeyob damalad.
6 Ar we-dulemar, negayaa-negayaa doge-doge gudidamalad, adi, omegan-binsaed-satemalad-binsaed-gaegar. Degi, omegan-isguedgi-nanadimalad-binsaed-gaegar. Ar we-omegana galagwensuli bina-gutuu damaladid.
7 Ar we-omegan, ibmar-durdakdimalan-inigwele, gege igar-napiragwad-maid durdakmalad.
8 Ar we-dulemala, igi Janes, Jambresʼbogwa Moisés-abin-gwisgusmala, abayobi we-dulemarde, igar-napiragwadgi gwisgudimarmogad. We-dulemar-e-binsaed nue-isgusmalad. Jesúsʼgi-bensulid-igargi amba benmalad.
9 Ar we-dulemar-e-igar gwen nasguosulid. Igi Moisés-e-ibagangi, Janes, Jambres-ebo-igar-noar-imaksamalad magar-daksamala, deyob, we-dulemar-noar-e-ibmar-imaked magar daklemogoed.
10 Timoteo, bedi, an-ibmar-odurdaksadba be nanadiid. Degi, an-daedba be nanadiid. Ibi-ular-an-gudigusadba be nanadibalid. Degi, igi an Jesúsʼgi-bensuli-nanadii, deyob be nanadiid. An bonigan-abin-galakusurdaed be daksad. An-sabgued, degine, gwae-gwae-an-itosulid be nue-daksabalid.
11 Deginbali, dulemar an-baregindiid nue be wisbalid, an-solegagwar-naibi-itodiid be wisbalid. Degine, igi-an Antioquíaʼgi-gusa, igi-an Iconioʼgi-gusa, degi, igi-an Listraʼgi-gusa, be wisbalid. Bab-Dummaddi ise-baregillear-an-wilesad bela amargi an-bendaksad.
12 Ar deyobi, bela Cristo-Jesúsʼgi-nue-islimakar-nanabimaladga solegagwar-naibi-itoged-igar ega nue-maibalid.
13 Dule-isganamardi, dulemar-yardakdimaladdi, aka bur bule isgumai gudoed. Dulemar-yardakdii, degine, na dukin yardakledii gudmaloed.
14 Timoteo, bedina, ibmar-durdaksadgi-bensuli be gudii guo, ibmar-durdaksadba be gatik nanao. Ar be wisid, doamar be-odurdaksananae.
15 Ar bato be bipigwaunni Bab-Dummad-Garda-Islidikid-Maid be wisi gudiid. Ar we-gardade sunna igar-abonolegedsik, Cristo-Jesúsʼgi-bensuliguedgi, ibmar-wisi be-imaked.
16 Bab-Dummad-Garda-Narmakar-Maid bela Bab-Dummad-sogsadba narmaklesad. Bab-Dummad-Garda ibnuedid:
17 Adi, Bab-Dummad-sordamar inniki-Bab-Dummad-Garda-durdaksadba, bela guagwar nabir ibmar-nueganbi imakdii guegar.