1 ᓃᒋᔖᓂᑎᒄ, ᒌᔥᐱᓐ ᔖᑰᒋᐦᐄᑯᑌ ᐊᐌᓐ ᒪᒑᑎᓰᐎᓂᔫ ᒋᔭᐙᐤ ᑳ ᐲᒋᔥᑳᑖᒄ ᑳ ᐸᔦᐦᒋᓰᑦ ᐊᐦᒑᐦᒄ ᒋᐹ ᐐᒋᐦᐋᐙᐤ ᐊᓐ ᐊᐌᓐ ᒋᔮᒻ ᒉᒌ ᒦᓄᐱᑌᒄ ᑖᓐ ᐙ ᐃᔑ ᐸᔅᒉᐸᔨᑦ᙮ ᔮᒀᒦᔥᑖᓱᒄ ᑲᔦ, ᐁᑳ ᒉᒌ ᐊᓯᒋᐸᔨᔦᒄ ᑲᔦ ᒋᔭᐙᐤ ᒉᒌ ᐊᑎ ᒪᒋᑑᑕᒣᒄ᙮
2 ᒫᒦᔅᑯᒡ ᐐᒋᐦᐄᑐᒄ ᐁ ᐋᔨᒧᐦᐅᔦᒄ᙮ ᐆ ᐃᐦᑎᔦᑴ ᒋᑲ ᐃᐦᑑᑕᒧᐙᓈᐙᐤ ᑖᓐ ᑳ ᐃᑕᔓᐌᑦ ᙭᙮
3 ᒌᔥᐱᓐ ᐊᐌᓐ ᒋᐦᒋᐌ ᐁ ᐃᑌᔨᒥᓱᑦ ᐋᑦ ᒫᒃ ᐁᑳ ᐎᔦᔥ ᐃᑌᔨᐦᑖᑯᓯᑦ ᐎᔭ ᑌᑲᔥ ᐎᔦᔑᒥᑎᓲ᙮
4 ᒥᓯᐌ ᐹᐦᐯᔭᒄ ᐊᐌᓐ ᒋᐹ ᓈᓂᑑ ᒋᔅᒉᔨᒥᓲ ᑯᐃᔅᒄ ᑳ ᐃᐦᑎᑴ᙮ ᑯᐃᔅᒄ ᒫᒃ ᑳ ᐃᐦᑎᑴ, ᑮᐹ ᒉ ᒫᒥᐦᒋᐦᐄᓱᑦ, ᓇᒧᐃ ᒣᒋᒻ ᑲᑕ ᐅᐦᒋ ᑲᓇᐙᐸᐦᑕᒧᐌᐤ ᑯᑕᒃ ᐊᐌᔫ ᑖᓐ ᑳ ᐃᐦᑎᔨᒡ᙮
5 ᐌᔥ ᒥᓯᐌ ᐊᐌᓐ ᑎᐹᓐ ᒋᐹ ᐃᐦᑑᑕᒻ ᑖᓐ ᐊᓂᔫᐦ ᑳ ᐃᑕᔓᒥᑯᑦ ᒋᔐᒪᓂᑑᐦ ᐎᔭ ᒉ ᐃᐦᑑᑕᐦᒃ᙮
6 ᐊᓐ ᐊᐌᓐ ᑳ ᒋᔅᑯᑕᒧᐙᑲᓅᑦ ᒥᔻᒋᒧᐎᓂᔫ ᒋᐹ ᒥᔦᐤ ᐊᓂᔫᐦ ᑳ ᒋᔅᑯᑕᒫᑯᑦ ᒉᒌ ᐋᐸᒋᐦᑖᔨᒡ ᒥᓯᐌ ᑖᓐ ᐁ ᐃᔑ ᒥᔪ ᐊᔮᑦ ᒉᒀᔫᐦ᙮
7 ᐁᑳᐐ ᐎᔦᔑᒥᑎᓱᒄ, ᓇᒧᐃ ᐊᐌᓐ ᒋᑲ ᒌ ᐎᔦᔑᒣᐤ ᒋᔐᒪᓂᑑᐦ᙮ ᐌᔥ ᐊᓂᔫ ᒉᒀᔫ ᒉ ᐸᒋᔥᑎᓇᒧᑴ ᐊᐌᓐ ᐊᓂᑌ ᐊᔅᒌᐦᒡ ᐁᐅᑯᓐ ᐊᓂᔫ ᒉ ᓂᐦᑖᐅᒋᓂᔨᒡ ᐊᓂᑦ᙮
8 ᐊᐌᓐ ᒫᒃ ᐱᓯᒄ ᓂᑕᒧᒄ ᑳ ᐃᔑ ᐱᒫᑎᓰᑦ ᒋᑲ ᐃᔑᓈᑯᓂᔫ ᒉᒃ ᒉ ᐊᑎ ᐗᓈᒋᐦᑖᑦ ᐅᐱᒫᑎᓰᐎᓐ᙮ ᐁᒄ ᒫᒃ ᐊᐌᓐ ᒥᒄ ᐁ ᐃᔑ ᓂᑐᐌᔨᒥᑯᑦ ᑳ ᐸᔦᐦᒋᓯᔨᒡ ᐊᐦᒑᐦᒄ ᐃᔑ ᐱᒫᑎᓰᑌ ᒋᑲ ᐊᔮᐤ ᑳᒋᒉ ᐱᒫᑎᓰᐎᓂᔫ᙮
9 ᐁᑳᐐ ᒋᑲ ᐅᐦᒋ ᓴᔅᑲᒌᓈᓅ ᐁ ᒥᔪᑑᑕᒧᐦᒄ᙮ ᐌᔥ ᑲᑕ ᐅᑎᐦᒋᐸᔫ ᑖᓂᑌ ᒉ ᒦᑯᔨᐦᒄ ᒋᑎᐸᐦᐊᒫᑯᓰᐎᓅ ᐁᑳ ᐴᓃᑴ ᐁ ᒥᔪᑑᑕᒧᐦᒄ᙮
10 ᒥᒄ ᒫᒃ ᒉ ᐃᔥᐱᔥ ᒦᑯᐙᐅᐦᑴ ᒉᒌ ᒥᔪᑑᑕᒧᐦᒄ ᐁᑯᓐ ᒨᔥ ᐃᔑ ᑯᒋᐦᑖᑖᐤ ᒉᒌ ᐃᔑ ᒥᔪᑑᑕᒧᐦᒄ, ᒨᔥ ᒥᓯᐌ ᐊᐌᓐ ᒉᒌ ᐙᐐᒋᐦᐄᐦᒄ᙮ ᐁᑎᑑ ᒫᒃ ᐊᓂᒌ ᑳ ᑖᐺᔨᒫᑣᐤ ᒌᓴᔅ ᒋᐹ ᐐ ᒥᔪᑑᑕᐙᓅᒡ᙮
11 ᓂᔭ ᑆᓪ ᑳ ᒪᓯᓇᐦᐊᒫᑕᑯᒡ᙮ ᒋᐙᐸᐦᑌᓈᐙᐤ ᑖᓐ ᐁ ᐃᔥᐱᔥ ᒪᒪᐦᑲᔅᑖᔮᓐ ᐁᒄ ᐁ ᒪᓯᓇᐦᐄᒉᔮᓐ᙮
12 ᐊᓂᒌ ᑳ ᐐ ᓰᐦᒋᒥᑖᑯᒡ ᒉᒌ ᒋᔅᒋᓄᐙᒋᔓᑯᐌᒄ ᒥᒄ ᐐ ᓅᑯᐦᐄᓲᒡ ᐁ ᓇᓂᐦᐄᐦᑕᐦᒀᐤ ᒎᐗ ᐊᔨᒥᐦᐁᐤ ᐐᔓᐌᐎᓐᐦ ᑲᔦ ᒫᒃ ᓂᑐᐌᔨᐦᑕᒧᒡ ᒉᒌ ᒥᔻᒋᒫᑲᓅᑣᐤ᙮ ᐁᐅᒄ ᐅᔫ ᐁ ᐃᐦᑎᑣᐤ ᐁᑳ ᒉᒌ ᓇᓀᐦᑳᑌᔨᒧᐦᐋᑲᓅᑣᐤ ᐁ ᐋᔨᒨᒫᑣᐤ ᙭ ᐅᑖᔑᑌᔮᐦᑎᑯᒥᔫᐦ᙮
13 ᓇᒧᐃ ᐙᐙᒡ ᓇᓂᐦᐄᐦᑕᒧᒡ ᒎᐗ ᐊᔨᒥᐦᐁᐤ ᐐᔓᐌᐎᓐᐦ ᐊᓂᒌ ᑳ ᐸᒋᔥᑎᓂᓱᑣᐤ ᒉᒌ ᒋᔅᒋᓄᐙᒋᔣᑲᓅᑣᐤ᙮ ᒋᓂᑐᐌᔨᒥᑯᐙᐅᒡ ᒉᒌ ᒋᔅᒋᓄᐙᒋᔓᑯᐌᒄ ᒥᒄ ᒉᒌ ᒫᒥᐦᒋᒧᑣᐤ ᑲᔦ ᒋᔭᐙᐤ ᐁ ᒌ ᐃᐦᑑᑖᑖᑯᒡ ᒉᒌ ᒋᔅᒋᓄᐙᒋᔓᑯᐌᒄ᙮
14 ᓂᔭ ᒫᒃ ᐐ ᒥᒄ ᐯᔭᒄ ᒉᒀᓐ ᓂᒫᒥᐦᒋᐦᐄᑯᓐ, ᐁᐅᒄ ᐅᑎᐯᔨᐦᒋᑫᐤ ᒌᓴᔅ ᙭ ᐅᑖᔑᑌᔮᐦᑎᑯᒻ᙮ ᐌᔥ ᐊᓂᔫ ᑖᓐ ᑳ ᐃᐦᑎᑦ ᙭ ᐋᔑᑌᔮᐦᑎᑯᐦᒡ ᐁᐅᒄ ᐌᐦᒋ ᐁᑳ ᐋᐸᑌᔨᐦᑕᒥᐦᐄᑯᔮᓐ ᐊᓂᔫᐦ ᒉᒀᔫᐦ ᐊᓂᒌ ᐁᑳ ᑳ ᑖᐺᐅᒉᔨᒫᑣᐤ ᒌᓴᔅ ᓈᔥᒡ ᒋᐦᒋᐌ ᑳ ᐃᑌᔨᐦᑕᒥᐦᐄᑯᑣᐤ᙮ ᑲᔦ ᐎᔭᐙᐤ ᒫᒃ ᓇᒧᐃ ᒥᑐᓐ ᐋᐸᑌᔨᐦᑕᒧᒡ ᐊᓂᔫᐦ ᒉᒀᔫᐦ ᓈᔥᒡ ᒋᐦᒋᐌ ᑳ ᐃᑌᔨᐦᑕᒥᐦᐄᑰᒡ᙮
15 ᒉᔅᑎᓄᐙᒋᔣᑲᓅᑴ ᐊᐌᓐ ᒫᒃ ᐁᑳ ᒉᔅᑎᓄᐙᒋᔣᑲᓅᑴ, ᓇᒧᐃ ᒉᒀᓐ᙮ ᒋᔐᒪᓂᑑ ᐁ ᒌ ᒦᑯᔨᐦᒄ ᐅᔅᒋ ᐱᒫᑎᓰᐎᓂᔫ ᐁᐅᒄ ᒋᐦᒋᐌ ᐁ ᐃᑌᔨᐦᑖᑯᐦᒡ᙮
16 ᐁᒄ ᒫᒃ ᒥᓯᐌ ᐊᓂᒌ ᑳ ᓅᔓᓀᐦᐊᐦᒀᐤ ᐅᔫ ᒋᔅᑯᑕᒫᒉᐎᓂᔫ, ᒋᔐᒪᓂᑑᐦ ᒋᑲ ᒦᑰᒡ ᒋᔮᒣᔨᐦᑕᒧᐎᓂᔫ ᑲᔦ ᒋᑲ ᒋᔅᑎᒫᒉᔨᒥᑰᒡ ᑲᔦ ᐁᑯᓐ ᒉ ᐃᐦᑑᑕᐙᑦ ᒥᓯᐌ ᐅᑏᓃᒻᐦ᙮
17 ᐁᑳᐐ ᐊᐌᓐ ᓂᑲ ᐐ ᓇᓀᐦᑳᒋᐦᐄᒄ᙮ ᐃᐦᑕᑯᓐ ᑖᓐ ᑳ ᐃᔑ ᓇᒣᐦᐄᑯᔮᓐ ᓂᔫᐦᒡ ᙭ ᐅᐦᒋ ᐁ ᐊᑐᔥᑰᒃ᙮
18 ᐅᑎᐯᔨᐦᒋᑫᐤ ᒌᓴᔅ ᙭ ᒋᑲ ᔕᐌᔨᒥᑯᐙᐤ, ᓃᒋᔖᓂᑎᒄ᙮ ᐊᒣᓐ᙮