1 Aꞌnáj tɨnaꞌaj nu tyeꞌtyóotziꞌreꞌej naꞌmej ɨ Tavástaraꞌ,
2 Nyáaj nu áꞌnyatzaahuatyeꞌ ɨ Tavástaraꞌ jimi,
3 Tyicheꞌ néijmiꞌi jimi tyuꞌtáchuiicaj tyajta séej tyanaꞌaj aꞌhuatanyúucarityeꞌen
4 Tavástaraꞌ nu jimi jaatáhuoj tɨꞌij naatáhuɨɨreꞌen, aꞌɨ́ɨ puꞌij náanamuajriꞌ,
5 Aꞌɨ́ɨmaj ɨ maj jahuoo ɨ Tavástaraꞌ jimi
6 Aꞌíi pu huajíjhuacaꞌ ɨ tɨ quee jeꞌej tyéejviicueꞌ, Tavástaraꞌ puꞌij jáanamuajriꞌ
7 Aꞌɨ́jna ɨ tajapuá tɨ tyíꞌhuɨɨreꞌ ɨ Tavástaraꞌ jimi aꞌɨ́ɨ pu huáꞌchaꞌɨj ajta huaꞌ japua huatányuusij
8 Siataꞌaj jaatyéesej, siajta jeꞌen jáamuaꞌreej tɨ néijmiꞌi jɨn tyámuaꞌ een ɨ Tavástaraꞌ.
9 Siataꞌaj jaatyátzaahuatyeꞌen ɨ Tavástaraꞌ, néijmiꞌi ɨ maj jimi tyámuaꞌ een,
10 Aꞌɨ́ɨmaj ɨ chíjtyaanyiꞌij aꞌɨ́ɨ mu pueꞌéenyeꞌej muáꞌjuꞌun ɨ maj quee jeꞌej tyéejviicueꞌ, majta jajpuéetzij muáꞌjuꞌun matɨꞌɨj huatatájcun,
11 Musioꞌváꞌjuꞌ, nyiyóojmuaꞌ, siataꞌaj náanamuaj:
12 ¿Nyi páaxɨeꞌveꞌ paj jéehua áꞌtyeeviꞌin?
13 Pataꞌaj jaatapuáꞌcɨtaj tɨꞌij muaꞌ nyanúu quee jeꞌej puaꞌaj tyíꞌxaxaꞌtaꞌan,
14 Ajtáraꞌ aꞌɨ́jcɨ jitze ɨ tɨ jeꞌej puaꞌaj een, pajta jeꞌen tyámuaꞌ huárɨnyij,
15 Tavástaraꞌ pu huáꞌchaꞌɨj aꞌɨ́ɨjma ɨ tyétyacaa maj tyámuaꞌ een
16 Tavástaraꞌ pu huaꞌajchaꞌɨɨreꞌ aꞌɨ́ɨjma ɨ maj jeꞌej puaꞌaj tyityetyúuchaꞌɨj,
17 Tavástaraꞌ pu janamuaj aꞌɨ́jcɨ ɨ tyáataj tɨ tyámuaꞌ tyiꞌtyúuchaꞌɨj,
18 Tavástaraꞌ pu véjriꞌ séejreꞌ, tɨꞌij huaꞌ japua huatányuunyij aꞌɨ́ɨjma ɨ maj quee jeꞌej tyéejtyoovej ɨ juxɨéjnyuꞌcaa tzajtaꞌ
19 Aꞌɨ́jna ɨ tyáatɨꞌ tɨ tyámuaꞌ tyiꞌtyúuchaꞌɨj jéehua pu tyiꞌtɨ́j jɨn japuéjtzitaren,
20 Aꞌɨ́ɨ pu néijmiꞌi ɨ caríiraꞌ chaꞌɨj,
21 Aꞌɨ́ɨmaj ɨ maj jeꞌej puaꞌaj tyityetyúuchaꞌɨj aꞌɨ́j mu jɨn cuiꞌnyij ɨ maj jɨn jeꞌej puaꞌaj rɨcɨj,
22 Ajta aꞌɨ́jna ɨ Tavástaraꞌ aꞌɨ́ɨ pu huaꞌ japua huatányuusij aꞌɨ́ɨjma ɨ maj jimi tyíꞌhuɨɨreꞌ,