1 Nani shinpita noya ya'huëcaiso marë' sha'huitohuachina, Cacoposo' ya'ipi hui'ninpita amatërin. Huë'pachinara itapon:
2 Canpitaso hui'nahuëpitanquëma'.
3 ‘Quëmaso' Nopino, paninanquën.
4 Inapocamaso nipiranhuë', co huachi inapoaranhuë'.
5 ‘Simion, Nihui, canpitaso, napopináchin cancantërama'.
6 Niyontonamaquë, ama onporo tëranta ya'noisohuë'.
7 Tanan ni'niro'sa pochin no'huitërama'.
8 ‘Quëmaso' Cota, iyaparinpita pa'yataponën.
9 Quëmaso' conpa masho, Cota itëranquën.
10 Co inso tëranta hua'an quëran, quëmaso' Cota, ocoiarinënhuë'.
11 Cotaso notohuaro' oparohuanaton, mora'huanënta', co apiratarinhuë'.
12 Ya'pirinpitanta', huino quëran quëhua quëhuashin ninin.
13 ‘Quëmaso' Saporono, marë yonsan parti ya'huapon.
14 ‘Quëmaso' Isacaro, chiníquën mora pochin nisaran.
15 “¡Noyachi iso no'pa' paya! Yashi yashin chinochachináchin,” tëcapon.
16 ‘Quëmaso Tano, quëmaora huëntonënquë ya'huëpisopita catahuaran.
17 Ya'huan yaquëtëtërinso pochin nisaran.
18 Ina quëran Cacoposo' Yosë nontaton tapon:
19 A'napita hui'ninpitanta yonquiaton taantarin:
20 ‘Quëmaso' Asiri, noya noya cosharo ya'huëtarinquën capacaso'.
21 ‘Quëmaso' Nipitari, co camainënquënso costaponhuë'.
22 ‘Quëmaso Cosi, i'sha yonsanquë huayo huanirinso pochin ninan.
23 Pë'chinan camayoro'sa', no'huirinquën.
24 Quëmaso nipirinhuë', chini chiníquën tanpatëran.
25 Yosënëhuë chachin, catahuapënquën.
26 Tata mashocoro'sa iráca, noya ya'huëca'huaso marë' sha'huitërinaco.
27 ‘Quëmaso' Mincamin, pa'pi mapinton tanan ni'nira pochin nicapon.
28 Ina pochin Cacopo shonca cato hui'ninpita noya ya'huëcaiso marë' sha'huitërin. Inapita quëran shonca cato Israiro huëntono'sa pipipi.
29 A'na tahuëri Cacoposo', hui'nipita camairin: “Co hua'quiya quëranhuë' chiminarahuë huachi. Chiminpato, shimashonëhuëpita pa'pitopiso pirayan po'moontaco. Iti huënton piyapi, Ipron itopisori, ina no'paso' hua'anëntopirinhuë'.
30 Maquipiraquë nanin ya'huërinso yonquiato napotarahuë. Inaso', Canaan parti ya'huërin. Mamiri notënanquë ya'huërin. Ina no'pa' mini iráca tata mashoco Apraan nipa'pitacaiso marë' pa'anin. Ina pirayan no'pa' ya'huërinsorë chachin naporo Ipron pa'antërin.
31 Inaquë Sara, Apraan, inapita chiminpachinara ya'conpi. Tata Isaco, mama Nipica inapitanta inaquë chachin ya'conpi. Inaquë canta', sa'ahuë Nia itërahuëso ya'conin.
32 Ina no'paso' naninë chachin, Iti huënton piyapi'sa pa'antopi,” itërin.
33 Cacoposo' hui'ninpita camairinso tonitohuachina, pë'saranënquë quëhuëantarin. Quëhuënaso chachin, chiminin huachi.