1 အိုဘုရားသခင်၊ ကိုယ်တော်သည် အကျွန်ုပ်တို့ကို စွန့်ပစ်တော်မူခဲ့ပါ၏။ အကျွန်ုပ်တို့ကို အရပ်ရပ်သို့ ကွဲလွင့်စေခဲ့ပါ၏။ ကိုယ်တော်သည် အမျက်တော် ထွက်နေခဲ့ပါ၏။ ယခု အကျွန်ုပ်တို့ကို ပြန်လည်ထူထောင် ပေးတော်မူပါ။
2 ကိုယ်တော်သည် မြေကြီးကို လှုပ်ခါခဲ့၍ ကွဲအက်စေခဲ့ပါ၏။ ၎င်း၏ကွဲအက်ရာများကို ပြုပြင်ပေးတော်မူပါ။ အကြောင်းမူကား မြေကြီးသည် ယိမ်းယိုင်လျက်ရှိနေပါ၏။-
3 ကိုယ်တော်သည် မိမိ၏လူမျိုးတော်အား ဆိုးရွားသောအရာများကို ရင်ဆိုင်စေခဲ့ပြီ။ ကိုယ်တော်သည် အကျွန်ုပ်တို့အား ဒယီးဒယိုင်ဖြစ်စေသော သေရည်သေရက်ကို သောက်စေခဲ့လေပြီ။
4 ကိုယ်တော်သည် မိမိကိုကြောက်ရွံ့သော သူတို့အား မြားထိသည့်ရန်မှ လွတ်မြောက်စေရန် သူတို့အတွက် အလံကို လွှင့်ထူပေးခဲ့လေပြီ။-
5 အကျွန်ုပ်တို့ကို ကိုယ်တော်၏ ညာလက်ရုံးတော်ဖြင့် ကယ်တင်၍ နားညောင်းတော်မူပါ။ ဤသို့ဖြင့် ကိုယ်တော်ချစ်မြတ်နိုးသော သူတို့သည် ကယ်တင်ခြင်း ခံရပါလိမ့်မည်။
6 ဘုရားသခင်သည် မိမိ၏သန့်ရှင်းရာဌာနမှ မိန့်တော်မူသည်မှာ ငါသည် အောင်ပွဲခံ၍ ရှီကိမ်ကိုခွဲဝေမည်။ ဆုကော့မြစ်ဝှမ်းကို ပိုင်းခြားမည်။-
7 ဂိလတ်ပြည်ကို ငါပိုင်၏။ မာနားဆေပြည်ကိုလည်း ငါပိုင်၏။ ဧဖရိမ်ပြည်သည် ငါ၏သံခမောက်ဖြစ်ပြီး ဂျုဒပြည်သည် ငါ၏ရာဇလှံတံဖြစ်၏။-
8 မောဘပြည်သည် ငါ၏ဆေးကြော ရာဇလုံဖြစ်ပြီး ဧဒွမ်ပြည်ပေါ်တွင် ငါ၏ဖိနပ်ကို ငါချွတ်၏။ ဖိလစ္စတင်းပြည်ပေါ်တွင် အောင်မြင်ခြင်းဖြင့် ငါကြွေးကြော်၏ ဟူသတည်း။
9 မည်သူသည် အကျွန်ုပ်ကို ခိုင်မာစွာ တည်ဆောက်ထားသော မြို့တော်ကြီးသို့ ခေါ်ဆောင်သွားပါမည်နည်း။ မည်သူသည် အကျွန်ုပ်ကို ဧဒွမ်ပြည်သို့ ဦးဆောင်လမ်းညွန်ပါမည်နည်း။-
10 အိုဘုရားသခင်၊ ကိုယ်တော်သည် အကျွန်ုပ်တို့ကို ငြင်းပယ်တော်မူခဲ့သည် မဟုတ်လော။ ကိုယ်တော်သည် အကျွန်ုပ်တို့၏ စစ်တပ်များနှင့် ဆက်လက်ချီတက်ခြင်း မပြုဘဲနေလေပြီ။-
11 ရန်သူကို ဆန့်ကျင်နိုင်ရန် အကျွန်ုပ်တို့ကို ကူညီတော်မူပါ။ အကြောင်းမူကား လူသားတို့၏ ကူညီမှုသည် အချည်းနှီးသာ ဖြစ်ပါ၏။-
12 ငါတို့ဘက်တွင် ဘုရားသခင်ရှိတော်မူလျှင် ငါတို့သည် အောင်ပွဲခံရလိမ့်မည်။ ကိုယ်တော်သည် ငါတို့၏ ရန်သူများကို ချေမှုန်းတော်မူလိမ့်မည်။