1 Yam cawoˊ keuting Kaeˊsa Tiberiˊasˊ uˊpeung eun kuingˊ naˊ gawmˊeucˊ ka a pun kulˊhpawnˊ neum naˊ, Pontiasˊ Piˊlat eun meuh konˊ eun cawoˊ nang kuingˊ Yuˊda naˊ, Herotˊ eun meuh konˊ eun cawoˊ nang kuingˊ Galilaeˊ na, Hpiˊlipˊ awngˊ eun Herotˊ naˊ eun meuh konˊ eun cawoˊ nang kuingˊ Iˊtuˊraetˊ maeeˊ kuingˊ Trahkawˊnitisˊ naˊ, Lisaniasˊ eun meuh konˊ eun cawoˊ nang kuingˊ Abiˊle naˊ,
2 Anasˊ eun maeeˊ Kayafasˊ ka meuh peue jhawpˊ rit keuting. Yam awnˊ na, Peucawoˊ Eun tuilˊ leukahˊ ri naˊ ri Yoˊhan kuˊ meuh konˊ eun Yahkariˊ naˊ ri vang hk'ohˊhk'oengˊ naˊ.
3 Eun heulˊ nang kuingˊ utˊ hotˊ keunam ka klongˊ Yawˊdan naˊ ku duihˊ ka. Eun paoˊ ri lahˊ, “Tawsˊ hpumˊ fuin mapˊ ri rap ri ti hk'aˊ cumˊ naˊ reuˊ. Peucawoˊ kaw Eun ploeˊ mapˊ peˊ naˊ.”
4 Seunˊ nang htawm eun Iˊsayaˊ kuˊ meuh peue suip leukahˊ Eun Peucawoˊ naˊ temˊ a ri naˊ,
5 Kah hk'ok naˊ nuk ku duihˊ ka,
6 Peue gawmˊeucˊ ce kaw pun ri nyu hk'aˊ htut lawtpon Eun Peucawoˊ naˊ.’ ”
7 Yoˊhan eun lahˊ a ri peue cum heunˊ kaw ingˊ rap ri ti hk'aˊ cumˊ ri heun naˊ ce, “Konˊhk'i ka seueuengˊ saˊhaoˊ naˊ peˊ, punta kaw peˊ pon hk'aˊ seungeuengˊ kaw ingˊ rot naˊ, aˊnhawˊ ciˊ deunˊ peˊ?
8 Kop awnˊ na, kaw a meuh saˊhkiˊ ka tawsˊ peˊ hpumˊ fuin peˊ mapˊ ri hawcˊ naˊ, yeuh kuˊ chakˊ naˊ reuˊ. Pawlaee hanˊ maeeˊ Abraham meuh eun kuiingˊ peˊ nang hpumˊ ri. Uiˊ lahˊ a ri peˊ, Peucawoˊ kaw Eun cang plengˊ seumu aenˊ ce meuh konˊhk'i eun Abraham yeut.
9 Maetˊmaenˊ, mueˊ naˊ uinˊ a ri keunam kleumˊ hkuˊ naˊ hawcˊ. Kleumˊ unˊ pliˊ kuˊ chakˊ naˊ ku kleumˊ ka, kah ri gawl ri tec a, dum a hk'aˊnaee ngawl.”
10 Peue cum heunˊ naˊ ce lahˊ, “Yeuh keutitˊ koˊ, ye ciˊ naˊ htukˊ ri yeuh saˊnhawˊ?”
11 Eun topˊ a, “Peue kueˊ hk'o lalˊ hpuinˊ naˊ ce, gvah kuˊ unˊ kueˊ hk'o naˊ ce isˊ reuˊ. Saecˊ meuh peue kueˊ kuˊ hk'a naˊ ce, yeuh a seunˊ awnˊ na yeut.”
12 Saecˊ meuh peue cepˊ hkawnˊ naˊ ce ku ingˊ hk'oˊ ri rap ri ti hk'aˊ cumˊ ri heun yeut. Ce mhaingˊ eun, “Seuraˊ, ye ciˊ naˊ htukˊ ri yeuh saˊnhawˊ?”
13 Eun lahˊ a ri ce, “Pawlaee cepˊ hkawnˊ peˊ naˊ pon lheuˊ.”
14 Saecˊ meuh peue suikˊ naˊ ce ku mhaingˊ eun, “Ye ri sae, ye ciˊ naˊ htukˊ ri yeuh saˊnhawˊ yeut?”
15 Yam peue heunˊ naˊ keutuiˊ hpumˊ koˊ ce Hkrit Eun naˊ, ce kuit a nang hpumˊ ri, “Yoˊhan eun ciˊ naˊ meuh Hkrit eun meuh unˊ meuh?”
16 Yoˊhan eun lahˊ a ri ce, “Tuilˊ uiˊ hk'aˊ cumˊ naˊ ri peˊ ri leuumˊ naˊ. Daecti kuˊ tiˊca keuting hk'aiˊ uiˊ naˊ buih ingˊ Eun hawcˊ. Pal yawo kaw uiˊ unˊ kuingˊ ri kahˊ muˊ jhaepˊ Eun naˊ. Eun kaw tuilˊ hk'aˊ cumˊ naˊ ri peˊ ri Citˊ seungaˊ chakˊ naˊ maeeˊ ri ngawl naˊ.
17 Eun jhawpˊ yaiˊyuip. Eun kaw yuip ri tec vang capˊ nghoˊ ri naˊ hklelˊ seungaˊ. Hawcˊ Eun naˊ hk'onˊro nghoˊ naˊ, Eun naˊ peus ri uinˊ a nang htuimˊ naˊ. Daecti depˊ nghoˊ naˊ Eun kaw dum a hk'aˊnaee ngawl unˊ cang laic naˊ.”
18 Lheuˊ awnˊ na, Yoˊhan eun ku sangsawnˊ ce ri kuˊ seubu heunˊ ceu maeeˊ leukahˊ munˊ renˊkawn naˊ.
19 Kopti Yoˊhan ram eun ri cawoˊ Herotˊ ti eun beunˊ eun awngˊ ri muis Herodiˊ naˊ maeeˊ kuˊ rai yeuh eun naˊ ce naˊ,
20 Herotˊ eun seueˊ Yoˊhan eun nang htawngˊ. Kuˊ rai yeuh eun aenˊ a lheuˊ kuˊ yeuh eun nanggalˊ naˊ.
21 Hawcˊ peue gawmˊeucˊ naˊ rap ce ri ti hk'aˊ cumˊ naˊ, Yesuˊ Eun ku rap ri ti hk'aˊ cumˊ naˊ yeut. Yam buih hk'oˊ Eun munˊ naˊ, kuingˊ pang maoˊ naˊ a dahˊ.
22 Citˊ seungaˊ naˊ a ruprang seunˊ guiˊ naˊ, a lih utˊ maeeˊ Heun. Sengˊ naˊ a lawsˊ lih neum kuingˊ pang maoˊ. A lahˊ, “Meuh Mi Konˊ aiˊ leumeusˊ Uiˊ. Mi hitˊ ri hpumˊ Uiˊ nyawkˊ.”
23 Yam Yesuˊ la Eun ri yeuh kanˊ munˊ naˊ, aˊyu Eun naˊ a pun hk'ao ri leuoeˊkulˊ neum. Peue hteumˊ Yesuˊ Eun meuh konˊ Yoˊsaep.
24 Heli eun meuh konˊ Mathtatˊ.
25 Yoˊsaep eun meuh konˊ Mahtahtiˊasˊ. Mahtahtiˊasˊ eun meuh konˊ Amoˊ.
26 Nagaiˊ eun meuh konˊ Matˊ.
27 Yoˊda eun meuh konˊ Yoˊhanaˊ. Yoˊhanaˊ eun meuh konˊ Resaˊ.
28 Neriˊ eun meuh konˊ Melchiˊ.
29 Eˊraˊ eun meuh konˊ Yawˊsuˊ. Yawˊsuˊ eun meuh konˊ Eˊlesa.
30 Leviˊ eun meuh konˊ Siˊmeˊon.
31 Eˊlakim eun meuh konˊ Meˊleˊa. Meˊleˊa eun meuh konˊ Mena.
32 Davitˊ eun meuh konˊ Yesaeˊ.
33 Nason eun meuh konˊ Amiˊnadaˊ. Amiˊnadaˊ eun meuh konˊ Ram.
34 Yuˊdah eun meuh konˊ Yakopˊ.
35 Naho eun meuh konˊ Seruˊ. Seruˊ eun meuh konˊ Reˊu.
36 Chelahˊ eun meuh konˊ Kaiˊnan.
37 Lameˊ eun meuh konˊ Metuselaˊ. Metuselaˊ eun meuh konˊ Eˊnawkˊ.
38 Kaiˊnan eun meuh konˊ Eˊnosˊ.