1 Ki Bildad, wunba tee Sua booru ni nirɔ na jiin a:
2 Job, i booru kii fit ŋmini-i? Li-i tee ki a nyik ki gbiini, ti bo saa fit pak nanawa.
3 Bee teen ki a dukii nan ti mantik jatik nan bonkobit nae?
4 A dont wutoor ki mantik daamii a mɔŋe. Tingbouŋ na saa fit dɔɔr yann, a wutoor donu paaka-a? Yennu saa chat jɔjaana na, a lin maŋawa-a?
5 Nibiiuk muu na saa kpeena, ki li muyeruk ji kan ban di.
6 Ki fitir nba be u ŋaak ni na sii tee bunbɔnne.
7 U taakaabii tuu be fanue, ŋaan mɔtana u ji gbiatire, ki u mɔŋ kpaanii na te ki u baa tiŋ ni.
8 U somm ki kɔɔ laauŋ ni, ki li fir u taa.
9 Ki baruk soor u taagbina ki diau.
10 Bi pii baruk u sɔnu nie, ki baruk na dɔɔ tiŋ ni ki be bɔr ni,
11 ki jaŋmaanii guu lintɔ, ki waa u taaŋmaatir kur ni.
12 U tuu mɔke, ŋaan mɔtana u ji be kome; ki biiru see ki guu-u sɔnu ni.
13 Ki nar yoona yat u gbanant kur po, ki te ki u kpinkpant nan taa pɔɔk,
14 ki nyinnɔ ŋaak nba ki u be u yamani na ni, ki daarɔ a wun took kpanbar nba tee kuun na.
15 Ki muu nan sarwuuta saa di u ŋaak, ki lin kpant tanpent.
16 Ki u ji saa biar ki tee nan tiik nba tuu koor nan jiinawa na.
17 Ki u sann saa bot durinya na ni, ki sɔɔ ji kan ban tiar u po.
18 Ki bi saa ber nyinnɔ footib tiŋ ni, ki bia ber nyinnɔ yentu ni, ki kɔɔnɔ bunbɔnn ni.
19 Ki u kii mɔk yaaboona, koo tennini.
20 Laa nyii yondo po ki saan tuu yonbaa po, binba kur saa gbat u biiru na po, waat saa kɔɔb ki bin jekir nan jaŋmaanii.
21 Linba nae tee toonbiit damm biiru, binba yaa baka kaa nan Yennu na.