1 Hɔ k'a nyɩnta ʊ a sɩŋŋɩda ʊ, wɔɔ n a ma, wɔɔ n a yɩ, ʊ mɩm m. Wɔɔ n dɩga a sɩɩ…, ʊ ʊ wɔ da ma, an nɩ mɩsɩrbaa Lemim dɩndam bɩ,
2 bala, mɩsɩrbaa bɩ do a hɩnka wɔɔ n a yɩ, ʊ n'a kasɛtɩ karɛ, ʊ nɩ mɩsɩrbaa k'a nyarɛ ba ʊ bɩ mim hɩrɛ awɔɔ m. A ɩ nyɩnta Zɩ zi, an b'a hɩnka wɔɔ m.
3 Hɔ kʊ wɔɔ yɩ, ʊ a ma sɔ bɩ, wɔɔ y'a pa darɛ awɔɔ m sɔ, k'awɔɔ n a da ma, a a zɛ kʊ ra kan wɔɔ kɩ. Bɩ wɔɔ ʊ zɛ kʊ ra kan Zɩ kɩ kan a Nyɩ Yeezuu Krista kɩ.
4 Naa wɔɔ n'a gʊrsɩra barɛ awɔɔ ma, kʊ wɔɔ heernyɔɔ bɩ n yɩ gʊta.
5 Lemim kʊ wɔɔ ma zi, ʊ n'a pa darɛ awɔɔ m bɩ ba n nɩ. Woso bɩ, lɛɛgure m. Monsigə ba zi fɩɩgaa y.
6 Kʊ wɔɔ hɩ, wɔɔ ʊ: «Wɔɔ ʊ zɛ kʊ ra kan kɩ», ʊ bɔkarɛ, ʊ nɩ tam monsigə ʊ, ŋʊaar wɔɔ n'a barɛ, bɩ wɔɔ bɩr sɩra barɛ y.
7 Bɩ, kʊ wɔɔ ɩ tam lɛɛgure ʊ, amba a mɩŋŋa nɩ lɛɛgure nɔ ʊ bɩ nɩ, wɔɔ ʊ zɛ kʊ ra kan ʊ muno kɩ, b'a Nyɩ Yeezuu bɩ ma bɩ nɩ wɔɔ hubɔm wɔɔ mimbʊnyaarɔ haay nɔ ʊ.
8 Bɩ kʊ wɔɔ ʊ: «Mimbʊnyaa ba wɔɔ ma y», bra wɔɔ n'a barɛ ʊ mɩŋŋɔɔ m, sɩra bɩ wɔɔ nɔ ʊ y.
9 Kʊ wɔɔ ʊ mimbʊnyaarɔ bɔ ʊ lɛ ma Woso taa, a wɔɔ mimbʊnyaarɔ sugur kam wɔɔ ʊ, an tɩrgabaawar haay gʊ wɔɔ ma, bala, sɩrazaa m b'a tɩrga sɔ.
10 Kʊ wɔɔ hɩ, wɔɔ ʊ: «Mimbʊnyaabənno bɛɛ m wɔɔ nɩ», a ba wɔɔ ʊ ŋʊaarzaa, b'a meerbaa ba wɔɔ nɔ ʊ y.