1 Na da isu gibula bobodobe ba:sea, na dogo da gilugilusa.
2 Dilia huluane! Gode Ea sia: nabima!
3 Gode da ha:ha:na diga:be muagadodili iasisa.
4 Amasea, Gode Ea gogonomosu naba.
5 Gode da sia:sea, fofogadigisu liligi da doaga:sa.
6 Ea sia:beba:le, mugene da osoboga daha.
7 E da dunu ilia hawa: hamosu dagolesisa.
8 Sigua ohe fi da ilia diasuga ahoa.
9 Gibula bobodoi isu da ga (north) amodili maha.
10 Gode Ea mifo da hano anegagini, ga:nasi mugene hamosa.
11 Haha:na da mu mobiga nene gala:sa.
12 Mumobi da Gode Ea hanaiga ahoa.
13 Gode da osobo bagadega hano soga:ma:ne gibu iaha.
14 Yoube! Di fonobahadi ouesalu, nabima!
15 Gode da ha:ha:na nene gala:ma:ne sia:sa!
16 Gode da fofogadigiliwane hamobela:le, mumobi da muagado gila ahoa.
17 Hame mabu! Ga (south) dogoloi fo da soge wadela:sea,
18 Gode da mu fadegale gagasea, di da E fidimu dawa:sala:?
19 Gode! Ninia Dima sia:mu amo Dia ninima olelema!
20 Na da Godema sia:musa: hame adole ba:mu.
21 Wali, mu da:iya hadigi da si nenemeginana.
22 Ninia da ga (north) la:idiga gouli agoai hadigi ba:sa.
23 Gode Ea gasa da bagadedafaba:le, ninia da E gadenena misunu da hamedei.
24 Amaiba:le, dunu huluane ilia Ema beda:su hou da fofogadigisu liligi hame.